ભજનલાલ શર્માએ રાજસ્થાનના નવા મુખ્યમંત્રી તરીકે શપથ લીધા છે. આ સમારોહ ઐતિહાસિક આલ્બર્ટ હોલની બહાર યોજાયો હતો. શપથ ગ્રહણ સમારોહમાં પીએમ નરેન્દ્ર મોદીએ પણ હાજરી આપી હતી. આ કાર્યક્રમમાં પીએમ મોદી ઉપરાંત ગૃહમંત્રી અમિત શાહ, બીજેપી અધ્યક્ષ જેપી નડ્ડા પણ હાજર હતા. રાજ્યપાલ કલરાજ મિશ્રાએ ભજનલાલ શર્માને મુખ્યમંત્રી પદના શપથ લેવડાવ્યા હતા. તેમજ દિયા કુમારી અને પ્રેમચંદ બૈરવા રાજ્યના નાયબ મુખ્યમંત્રી બન્યા.
શપથ ગ્રહણ સમારોહમાં 6 રાજ્યોના મુખ્યમંત્રીઓએ પણ ભાગ લીધો હતો. મંચ પર પૂર્વ મુખ્યમંત્રી અશોક ગેહલોત અને વસુંધરા રાજે પણ હાજર હતા. અગાઉ, પાર્ટીના પ્રવક્તાએ કહ્યું હતું કે, “કેન્દ્રીય નેતાઓ અને રાજ્યના મુખ્યમંત્રીઓને આ સમારોહ માટે આમંત્રણ મોકલવામાં આવ્યું હતું. અગાઉ, મંગળવારે (12 ડિસેમ્બર) બીજેપી વિધાયક દળની બેઠક યોજાઈ હતી, જેમાં ભજનલાલ શર્માને વિધાયક દળના નેતા તરીકે પસંદ કરવામાં આવ્યા હતા. પાર્ટી વતી ધારાસભ્યો દિયા કુમારી અને પ્રેમ ચંદ બૈરવાને નાયબ મુખ્યમંત્રી તરીકે અને વાસુદેવ દેવનાનીને રાજસ્થાન વિધાનસભાના અધ્યક્ષ તરીકે નામાંકિત કરવામાં આવ્યા છે.
રાજસ્થાનમાં 200માંથી 199 બેઠકો પર થયેલી ચૂંટણીમાં ભાજપે 115 બેઠકો જીતી છે. કરણપુર બેઠક પર કોંગ્રેસના ઉમેદવારના મૃત્યુને કારણે ચૂંટણી મોકૂફ રાખવામાં આવી હતી, જ્યાં હવે 5 જાન્યુઆરીએ મતદાન થશે.
સમારોહ માટે ચુસ્ત સુરક્ષા વ્યવસ્થા
આજે યોજાયેલા સમારોહ માટે ચુસ્ત સુરક્ષા વ્યવસ્થા ગોઠવવામાં આવી હતી. તૈયારીઓને આખરી ઓપ આપવાની કામગીરી ગુરુવારે પણ ચાલુ રહી હતી. રાજધાનીના મુખ્ય માર્ગો અને પ્રવેશ માર્ગોને શણગારવામાં આવ્યા છે. જેમાં કેન્દ્ર સરકારની વિવિધ જન કલ્યાણકારી યોજનાઓને લગતા પોસ્ટર અને બેનરો સહિત ભાજપના ઝંડા અને હોર્ડિંગ કટઆઉટ પણ લગાવવામાં આવ્યા છે.
જન્મદિવસે શપથ લીધા
ખાસ વાત એ છે કે આજે ભજનલાલ શર્માનો જન્મદિવસ પણ છે. આ તેમનો 56મો જન્મદિવસ છે. ગુરુવારે રાત્રે 12 વાગ્યા પછી ભજનલાલે સોડાલાના ચંબલ ગેસ્ટ હાઉસમાં તેમના સમર્થકો સાથે જન્મદિવસની ઉજવણી કરી હતી. તેમના જન્મદિવસ નિમિત્તે મુખ્યમંત્રી અને તેમના સમર્થકો દ્વારા રક્તદાન શિબિરનું પણ આયોજન કરવામાં આવશે. આ શિબિરનું આયોજન ધોલપુરમાં કરવામાં આવશે.
