‘લેન્ડ ફોર જોબ’ એટલે કે જમીનના બદલામાં નોકરી કૌભાંડમાં રાષ્ટ્રીય જનતા દળ (RJD)ના વડા અને પૂર્વ રેલ મંત્રી લાલુ પ્રસાદ યાદવ તથા તેમના પરિવારને મોટો કાનૂની ઝટકો લાગ્યો છે. દિલ્હીની રાઉઝ એવન્યુ કોર્ટએ આ કેસમાં લાલુ યાદવ સહિત 40થી વધુ આરોપીઓ સામે ચાર્જ ફ્રેમ કરવાની મંજૂરી આપી છે, જેના કારણે હવે મામલો સંપૂર્ણ ટ્રાયલ તરફ આગળ વધશે. કોર્ટના આ નિર્ણયથી લાલુ પરિવારની મુશ્કેલીઓ વધતી જોવા મળી રહી છે.
કોર્ટએ પોતાના આદેશમાં અત્યંત કડક ટિપ્પણી કરતાં જણાવ્યું કે ઉપલબ્ધ પુરાવાઓથી સ્પષ્ટ થાય છે કે આ આખું કૌભાંડ એક ‘ક્રિમિનલ એન્ટરપ્રાઇઝ’ એટલે કે ગુનાહિત સાહસની જેમ ચલાવવામાં આવ્યું હતું. અદાલતના મતે, સરકારી પદોનો દુરુપયોગ કરીને નોકરીઓ વહેંચવામાં આવી અને તેના બદલામાં કિંમતી જમીનો હડપવામાં આવી. કોર્ટએ લાલુ પરિવાર દ્વારા દાખલ કરાયેલી કેસમાંથી મુક્ત થવાની અરજીને ફગાવી દેતાં કહ્યું કે આ તબક્કે આરોપો ગંભીર છે અને ષડયંત્ર તથા પદના દુરુપયોગના પૂરતા સંકેતો મળી રહ્યા છે. સીબીઆઈની વિશેષ અદાલતે તમામ પક્ષોની દલીલો સાંભળ્યા બાદ માન્યું કે આગળની સુનાવણી માટે પૂરતો આધાર છે, તેથી ટ્રાયલ શરૂ કરવો જરૂરી છે.
કેસની વિગત મુજબ, અદાલતે 41 આરોપીઓ વિરુદ્ધ પ્રિવેન્શન ઓફ કરપ્શન એક્ટની કલમ 13(2) અને 13(1)(d) હેઠળ કેસ ચલાવવાનો નિર્ણય લીધો છે. આ કલમો સરકારી પદના દુરુપયોગ અને ભ્રષ્ટાચાર સંબંધિત ગંભીર ગુનાઓને લગતી છે. જોકે, આ જ કેસમાં 52 આરોપીઓને પુરાવાના અભાવે ડિસ્ચાર્જ કરીને મોટી રાહત આપવામાં આવી છે. સીબીઆઈની ચાર્જશીટ અનુસાર, લાલુ યાદવના નજીકના સાથીઓ અને પરિવારજનોને નોકરીના બદલામાં જમીન મેળવવાની પ્રક્રિયામાં સહ-સાજિશકર્તા તરીકે દર્શાવવામાં આવ્યા છે, જેમણે મળીને ભ્રષ્ટાચારનું સુનિયોજિત નેટવર્ક ઊભું કર્યું હોવાનું આરોપ છે.
અદાલતે નોંધ્યું કે સરકારી નોકરીઓના વહેંચાણમાં વિવેકાધિકારનો દુરુપયોગ થયો અને બદલામાં કિંમતી જમીનો મેળવવામાં આવી, જે સ્પષ્ટ રીતે એક સુનિયોજિત ભ્રષ્ટાચાર તરફ ઈશારો કરે છે. તેથી આ તબક્કે લાલુ પ્રસાદ યાદવ અને તેમના પરિવારને નિર્દોષ માનીને મુક્ત કરવું યોગ્ય નથી, એવું કોર્ટએ સ્પષ્ટ કર્યું છે. હવે આગામી તબક્કે ટ્રાયલ શરૂ થશે, જેમાં આરોપીઓ વિરુદ્ધ પુરાવાઓ રજૂ કરવામાં આવશે અને કેસની કાનૂની કાર્યવાહી આગળ વધશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
