ગુજરાતમાં ખેડૂતોના વીજપોલ સંબંધિત પ્રશ્નને લઈને કોંગ્રેસે 15 જૂને રાજ્યવ્યાપી આંદોલનની જાહેરાત કરી હતી. 2022ની વિધાનસભા ચૂંટણી બાદ સતત નબળી પડતી જતી કોંગ્રેસ માટે આ મુદ્દો રાજકીય રીતે ફરી સક્રિય થવાની તક તરીકે જોવામાં આવ્યો હતો. અમદાવાદથી ઓગણજ સ્થિત શતાબ્દી મહોત્સવ મેદાન સુધી રેલીનું આયોજન કરવામાં આવ્યું હતું, પરંતુ દિવસના અંતે સમગ્ર કાર્યક્રમ અપેક્ષા મુજબ સફળ રહ્યો નહીં.
કોંગ્રેસ દ્વારા શરૂઆતમાં સોશિયલ મીડિયા અને આઈટી સેલ મારફતે આંદોલનને મોટું સ્વરૂપ આપવાના પ્રયાસો કરવામાં આવ્યા હતા. જોકે, મેદાનમાં ખેડૂતોની મર્યાદિત હાજરી અને સભામાં ઓછો પ્રતિસાદ મળતા સમગ્ર કાર્યક્રમ ફિક્કો પડી ગયો. ખેડૂતોમાં એવી લાગણી જોવા મળી કે આંદોલનનો કેન્દ્રબિંદુ તેમની સમસ્યાનું સમાધાન નહીં પરંતુ રાજકીય લાભ મેળવવાનો પ્રયાસ હતો.
ભાજપ અને AAP પર કોંગ્રેસના આરોપો
આંદોલનને પૂરતો પ્રતિસાદ ન મળતા કોંગ્રેસે ભાજપ અને આમ આદમી પાર્ટી પર આંદોલન નબળું પાડવાના આરોપો લગાવ્યા હતા. જોકે, રાજકીય વિશ્લેષકોનું માનવું છે કે આવા આરોપો કોંગ્રેસના સંગઠન અને આયોજનની નબળાઈને જ ઉજાગર કરે છે. કોંગ્રેસના દાવા મુજબ હજારો ખેડૂતો અને ટ્રેક્ટરો એકત્ર થયા હોત તો કોઈપણ પક્ષ માટે આંદોલનને અસર કરવું મુશ્કેલ બનત.
AAP હાલમાં ગુજરાતમાં એટલી મજબૂત સ્થિતિમાં નથી કે મોટા પાયે કોઈ આંદોલનને અસર કરી શકે. બીજી તરફ ભાજપે સમગ્ર મુદ્દે જાહેરમાં ખાસ પ્રતિક્રિયા પણ આપી નહોતી. પોલીસ દ્વારા પણ કોઈ બળપ્રયોગ કે કડક કાર્યવાહી કરવામાં આવી હોવાનું સામે આવ્યું નથી.
આયોજન અને રોડમેપના અભાવે ઘટ્યો પ્રભાવ
આંદોલન દરમિયાન કોંગ્રેસ ખેડૂતોની સમસ્યાના સમાધાન માટે કોઈ સ્પષ્ટ રોડમેપ કે નીતિ રજૂ કરી શકી નહોતી. ખેડૂતોને માત્ર આશ્વાસન આપવામાં આવ્યું, પરંતુ પ્રશ્નના ઉકેલ માટે કોઈ નક્કર પ્રસ્તાવ સામે આવ્યો નહીં. પરિણામે ખેડૂતોમાં નિરાશા ફેલાઈ અને સભામાં હાજરી ઓછી રહી.
ખેડૂતોને ગાંધીનગર સુધી લઈ જવાની વાત કરવામાં આવી હતી, પરંતુ પોલીસની મંજૂરી માત્ર શતાબ્દી મહોત્સવ મેદાન સુધી જ હતી. આ બાબતની જાણ કોંગ્રેસના નેતાઓને અગાઉથી હોવા છતાં ખેડૂતોને અલગ સંદેશ આપવામાં આવ્યો હોવાના આક્ષેપો પણ સામે આવ્યા.
સોશિયલ મીડિયા અને પ્રેસ કોન્ફરન્સથી આંદોલન સફળ બનતું નથી
રાજકીય નિરીક્ષકોના મત મુજબ કોંગ્રેસે સોશિયલ મીડિયા અભિયાન અને પ્રેસ કોન્ફરન્સના આધારે મોટા આંદોલનની અપેક્ષા રાખી હતી. પરંતુ કોઈપણ જનઆંદોલન માટે મજબૂત સંગઠન, ગ્રાઉન્ડ લેવલ પર કાર્યકરોની સક્રિયતા અને સતત જનસંપર્ક જરૂરી હોય છે.
ગુજરાત કોંગ્રેસ પાસે હાલમાં એવો સશક્ત સંગઠન માળખો નથી જે ટૂંકા સમયમાં મોટી સંખ્યામાં લોકોને મેદાનમાં ઉતારી શકે. પરિણામે ખેડૂતોને એકત્રિત કરવામાં પાર્ટી નિષ્ફળ રહી અને આંદોલનનું રાજકીય મહત્વ ઘટી ગયું.
સૌથી મોટું નુકસાન ખેડૂતોને
ખેડૂતોના વીજપોલ સંબંધિત પ્રશ્નને લઈને વાસ્તવિક ચિંતાઓ અને માંગણીઓ હોવા છતાં, રાજકીય પક્ષોની એન્ટ્રી બાદ મૂળ મુદ્દો પાછળ ધકેલાઈ ગયો હોવાના આક્ષેપો થઈ રહ્યા છે. કોંગ્રેસ અને AAP વચ્ચેના રાજકીય ખેંચતાણમાં ખેડૂતોની સમસ્યા ચર્ચાનો વિષય તો બની, પરંતુ તેના કોઈ સ્પષ્ટ ઉકેલ તરફ પ્રગતિ જોવા મળી નથી.
વિશ્લેષકોનું માનવું છે કે ખેડૂતો જેવા સંવેદનશીલ મુદ્દાઓનું અતિશય રાજકીયકરણ થવાથી મૂળ પ્રશ્નનું સમાધાન વધુ મુશ્કેલ બની જાય છે. આ સમગ્ર ઘટનાક્રમે ફરી એકવાર દર્શાવ્યું છે કે માત્ર રાજકીય દેખાવ અને સોશિયલ મીડિયા અભિયાનથી જનઆંદોલનો સફળ બનતા નથી.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
