ગુજરાતમાં વધતી સાયબર ગુનાખોરીને કાબૂમાં લેવા માટે ચાલી રહેલા ‘ઓપરેશન મ્યુલ હંટ’ હેઠળ અમદાવાદ સાયબર ક્રાઇમ પોલીસે મોટી કાર્યવાહી કરી છે. શહેરના વાડજ વિસ્તારમાં આવેલા સૌરાબજી એપાર્ટમેન્ટમાં દરોડો પાડી પોલીસે મ્યુલ એકાઉન્ટ્સ (ભાડેના બેંક ખાતા) ચલાવતી ગેંગનો પર્દાફાશ કર્યો છે. આ કાર્યવાહી દરમિયાન પોલીસે 162 ATM કાર્ડ, 18 મોબાઇલ ફોન, 41 સીમકાર્ડ, પાસબુક, લેપટોપ સહિત અંદાજે ₹2.6 લાખનો મુદ્દામાલ જપ્ત કરી રોનીત ઉર્ફે ગણેશ ભિંદા અને લીના ભાટીયા નામના બે આરોપીઓને ઝડપી પાડ્યા છે. આ કેસમાં અમદાવાદ સાયબર ક્રાઇમ પોલીસ સ્ટેશનની ટીમે પોતે ફરિયાદી બનીને કાયદેસરની કાર્યવાહી શરૂ કરી છે.
પોલીસને મળેલી ચોક્કસ બાતમીના આધારે કરાયેલી તપાસમાં બહાર આવ્યું છે કે આ ટોળકી આર્થિક રીતે નબળા અને જરૂરિયાતમંદ લોકોને નાણાકીય લાલચ આપી તેમના નામે બેંક ખાતા ખોલાવતી હતી. ત્યારબાદ આ ખાતાઓનો ઉપયોગ સાયબર ફ્રોડ, ઓનલાઇન ગેમ્બલિંગ અને કાળા નાણાંની હેરફેર માટે કરવામાં આવતો હતો. આરોપીઓ ખોટા રબર સ્ટેમ્પ, બોગસ MSME સર્ટિફિકેટ્સ અને ફર્જી પેઢીઓના નામે કરન્ટ તથા સેવિંગ એકાઉન્ટ ખોલાવતા હતા. ખાતું ખુલ્યા બાદ તેની ચેકબુક અને ATM કાર્ડ એકત્ર કરી રિષભ જૈન નામના સાગરીત મારફતે મુખ્ય સૂત્રધારોને કુરિયર કરી દેવામાં આવતા હતા. દરેક ખાતા બદલામાં આરોપીઓને ₹10,000થી વધુનું કમિશન મળતું હતું.
પોલીસ તપાસમાં આ પણ સામે આવ્યું છે કે આ સાયબર ક્રાઇમ નેટવર્ક વિદેશ સુધી વિસ્તરેલું છે. આરોપીઓ યુકે અને યુએસએના ઇન્ટરનેશનલ નંબરોથી સંચાલિત વોટ્સએપ ગ્રુપો—જેમ કે ‘MEGGIE GROUP’ અને ‘Professor Bank Group’—સાથે જોડાયેલા હતા. આ ગ્રુપોમાંથી ‘માર્કો’ અને ‘વિન ડીઝલ’ જેવા કોડનેમ ધરાવતા શખ્સોના ઈશારે સમગ્ર રેકેટ ચલાવવામાં આવતું હતું. પોલીસે ઘટનાસ્થળેથી 153 ફેડરલ બેંકના ATM કાર્ડ સહિત કુલ 162 કાર્ડ જપ્ત કર્યા છે. હાલ બંને આરોપીઓ સામે ગુનો નોંધી રેકેટના અન્ય સભ્યો અને આંતરરાષ્ટ્રીય કડીઓ અંગે વધુ ઊંડાણપૂર્વક તપાસ હાથ ધરવામાં આવી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
