આજે પવિત્ર શ્રાવણ માસનો પ્રથમ દિવસ છે, જેના તહેવારસમાં સમગ્ર દેશમાં ભક્તિમય માહોલ છવાયો છે. ખાસ કરીને પ્રથમ જ્યોતિર્લિંગ તરીકે પૂજાતા સોમનાથ મહાદેવના દર્શન માટે હજારો શ્રદ્ધાળુઓ ભક્તિભાવથી સોમનાથ ધામે ઉમટ્યા છે. સોમનાથ મંદિર પરિસરમાં “હર હર મહાદેવ” અને “જય સોમનાથ”ના નાદ સાથે સમગ્ર વાતાવરણ ઘોષણાર્થ અને ધર્મમય બની ગયું છે. શ્રાવણ માસના આરંભને ધ્યાનમાં લઈને સોમનાથ મંદિર આજે સામાન્ય દિવસો કરતા અડધો કલાક વહેલું એટલે કે સવારે 5:30 વાગ્યે ભક્તો માટે ખુલ્લું મૂકવામાં આવ્યું હતું. મંદિરમાં આજે મહાદેવજીનો વિશેષ શૃંગાર કરવામાં આવ્યો છે અને દર્શન માટે ખાસ વ્યવસ્થા ગોઠવાઈ છે.
સોમનાથ ટ્રસ્ટ દ્વારા શ્રાવણ મહિનાના અવસરે વિશેષ પૂજા-અર્ચન અને ધાર્મિક કાર્યક્રમોની શ્રેણીનું આયોજન પણ કરવામાં આવ્યું છે.
- સવારે 6 થી 7 વાગ્યા સુધી મહાપૂજન
- 7 થી 7:15 વાગે શ્રાવણ આરતી
- 7:30 વાગ્યે મૃત્યુંજય યજ્ઞનો આરંભ
- 8 વાગ્યે નૂતન ધ્વજારોહણ તેમજ સવાલક્ષ બિલ્વપત્ર પૂજનનો સંકલ્પ
- 11 થી 12 વાગ્યે મધ્યાહ્ન મહાપૂજન
- 12 થી 12:15 વાગ્યે મધ્યાહ્ન આરતી
- 12:30 થી 2:30 વાગ્યા સુધી સવાલક્ષ બિલ્વાચન
- 5 થી 8:30 વાગ્યા દરમિયાન વિશેષ શૃંગાર દર્શન
- 6:30 થી 7:30 દીપમાળાનું આયોજન
- 7 થી 7:30 વાગ્યે સાંજ આરતી
આ સમગ્ર આયોજન શ્રાવણ માસ દરમિયાન દર્શનાર્થીઓની વિશાળ સંખ્યાને ધ્યાનમાં રાખીને કરવામાં આવ્યું છે. મંદિર ટ્રસ્ટ અનુસાર શ્રાવણ માસના એક મહિનામાં અંદાજે 10 લાખથી વધુ ભક્તો સોમનાથ મહાદેવના દર્શન માટે આવે તેવી સંભાવના છે. ભક્તો માટે સુરક્ષા, વ્યવસ્થા અને આરામદાયક દર્શન માટે પૂરતી તકેદારી લેવાઈ છે. આજથી શરૂ થયેલી પાવન શ્રાવણ યાત્રાની શરૂઆત સાથે સમગ્ર સોમનાથ ક્ષેત્ર ધાર્મિક ઉલ્લાસથી વિભવિત થયું છે.
