ભારતે ઇસ્લામિક સહયોગ સંગઠન (OIC) દ્વારા તેની સામે કરવામાં આવેલી ટીકા અને ઠરાવોને લઇને સખત પ્રતિક્રિયા આપી છે અને આ બધાને “અયોગ્ય, તથ્યવિહોણા અને પાયાવિહોણા” ગણાવ્યા છે. વિદેશ મંત્રાલયે સોમવારે આપેલા નિવેદનમાં જણાવ્યું કે OIC પાસે ભારતના આંતરિક મુદ્દાઓ—વિશેષ કરીને જમ્મુ અને કાશ્મીર વિશે—કોઈપણ પ્રકારની ટિપ્પણી કરવાનો અધિકાર નથી. ભારતે સ્પષ્ટપણે કહ્યું કે આ પ્રકારની ટીકા પાકિસ્તાનના દબાણ હેઠળ છે, જે આતંકવાદને પોતાનાં રાજકીય હથિયાર તરીકે ઉપયોગમાં લે છે અને OIC જેવી વૈશ્વિક સંગઠનને પોતાના સંકુચિત હિતોમાં પ્રવૃત્ત કરે છે.
વિદેશ મંત્રાલયે વધુમાં જણાવ્યું કે 21-22 જૂન દરમિયાન તુર્કી ના ઈસ્તંબુલમાં યોજાયેલ 51માં OIC વિદેશ મંત્રી પરિષદના સત્ર દરમિયાન પસાર કરાયેલા 147 ઠરાવમાં ભારત વિષે અપનાવવામાં આવેલા વક્તવ્ય અને ઈસ્તંબુલ ઘોષણાપત્રમાં થયેલા ઉલ્લેખો તથ્યવિહોણા છે. ભારતે એ પણ નોંધાવ્યું કે જમ્મુ અને કાશ્મીર ભારતનો અભિન્ન અને અટૂટ ભાગ છે, જે સંવિધાનમાં પણ સ્પષ્ટ છે.
ભારતે OICને ચેતવણી આપી કે તે પાકિસ્તાનના ભ્રામક પ્રચારમાં આવીને પોતાનો વિશ્વસનીય અને નિષ્પક્ષ ધોરણ ગુમાવી ન બેસે. વિદેશ મંત્રાલયના પ્રવક્તાએ કહ્યું કે OICનો ઉપયોગ મુસ્લિમ જગતના હિતોમાં થવો જોઈએ, પાકિસ્તાનના કૂટનીતિક ષડયંત્ર માટે નહીં.
પાકિસ્તાન દ્વારા કરાયેલા ભારતીય સેના પરના આરોપોને પણ ભારતે બિનમુલ્યવાન ગણાવ્યા છે. ખાસ કરીને “ઓપરેશન સિંદૂર” અંગે પાકિસ્તાની દાવાને નકારીને ભારતે કહ્યું કે આ પગલાં આત્મરક્ષા હેઠળ લેવામાં આવ્યા હતા, અને તે પણ એવા આતંકવાદી ઠેકાણાઓ સામે, જે પાકિસ્તાની ધરતી પરથી કાર્યરત હતા. ભારતે પાકિસ્તાનના આ આરોપોને હાસ્યાસ્પદ ગણાવ્યા અને જણાવ્યું કે પાકિસ્તાન પોતાના નાગરિકોના જીવ જોખમમાં મૂકી, નિષ્ફળ જવાબી હુમલાઓ કરી રહ્યો છે.
છેલ્લે, ભારતે ફરી એકવાર આ મુદ્દે પોતાનું પરિપ્રેક્ષ્ય સ્પષ્ટ કરતાં કહ્યું કે OIC પોતાને મુસ્લિમ વિશ્વના અવાજ તરીકે પ્રસ્તુત કરે છે, પરંતુ તે એકપક્ષીય ઢબે પાકિસ્તાનના રાજકીય મંચ તરીકે કાર્ય કરે તો તેની વિશ્વસનીયતા નષ્ટ થશે. OICને એ સુનિશ્ચિત કરવું જોઈએ કે તે પોતાના મંચનો ઉપયોગ સમર્પિત હેતુઓ માટે કરે, કોઈ એક દેશના ષડયંત્ર માટે નહીં.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
