મહારાષ્ટ્ર સરકાર દ્વારા ગાયને “રાજ્યમાતા”નો દરજ્જો આપ્યા બાદ હવે ગુજરાતમાં પણ આવી જ માંગે રાજકીય અને ધાર્મિક માહોલ ઊભો કર્યો છે. કચ્છના પ્રસિદ્ધ સાધુ મહંત યોગી દેવનાથ બાપુએ રાજ્ય સરકારને આ મુદ્દે 10 દિવસમાં નિર્ણાયક પગલું ભરવાની માગ સાથે અલ્ટીમેટમ આપ્યો છે. તેઓએ ચીમકી ઉચ્ચારી છે કે જો સરકારે ગાયને “રાજ્યમાતા” જાહેર કરવા અંગે સમયમર્યાદામાં કોઈ નિર્ણય ન કર્યો, તો તેઓ કચ્છના કલેક્ટર કચેરી સામે સાધુસંતો અને હિંદુ સમાજ સાથે મળીને અનશન પર ઉતરી જશે.
મહંત દેવનાથ બાપુએ મીડિયાની સાથે વાત કરતાં જણાવ્યું કે ગાય હિંદુ સંસ્કૃતિમાં પૂજનીય છે, છતાં આજે ગુજરાતના ગામડાઓ અને શહેરી વિસ્તારોમાં ગાયે રસ્તા પર રઝળતી હાલતમાં જીવવું પડે છે, અને અનેક વાર ગાયોને કતલખાનાં સુધી લઈ જવામાં આવે છે. તેમના કહેવા મુજબ, એવી દિવ્ય પ્રાણી જેને માતા તરીકે માનવામાં આવે છે તેને “રાજ્યમાતા”નો સન્માન આપવો માત્ર ધાર્મિક માન્યતાનું નહીં પરંતુ સાંસ્કૃતિક જવાબદારીનું પણ એક પગથિયો છે.
મહારાષ્ટ્રનું ઉદાહરણ આપતાં બાપુએ જણાવ્યું કે બાજુના રાજ્ય મહારાષ્ટ્રમાં ગયા વર્ષે 30 સપ્ટેમ્બર 2024ના રોજ એકનાથ શિંદેની સરકાર દ્વારા ગાયને “રાજ્યમાતા” જાહેર કરવામાં આવી હતી. તેથી હવે ગુજરાત જેવી સંસ્કૃતિપ્રેમી ભૂમિમાં પણ આવી જ માન્યતા અને સન્માન આપવું જોઈએ.
આ અંગે મહંત દેવનાથ બાપુએ કલેક્ટરને આવેદનપત્ર આપી દીધું છે અને સ્પષ્ટ કહ્યું છે કે જો 10 દિવસની અંદર કોઈ સકારાત્મક કાર્યવાહી નહીં થાય, તો તેઓ જાહેર અનશન શરૂ કરશે. આ મુદ્દે હવે રાજ્યભરમાં વિવિધ હિંદુ સંગઠનો અને સાધુસંતોના સમર્થનથી આંદોલનનું સ્વરૂપ ઉગ્ર બની શકે છે. જો સરકાર આ મુદ્દે સમયસર પગલું નહીં ભરે, તો રાજકીય દબાણ અને ધાર્મિક જૂથોની એકત્રીત માંગ સરકાર માટે નવી મુશ્કેલી ઉભી કરી શકે છે.
