ગુજરાત વિધાનસભામાં ઉપાધ્યક્ષ પદની ચૂંટણી અંગે મહત્વપૂર્ણ જાહેરાત કરવામાં આવી છે. વિધાનસભા સચિવાલય દ્વારા જાહેર કરાયેલા જાહેરનામા મુજબ, ઉપાધ્યક્ષ પદ માટેની ચૂંટણી 16 ફેબ્રુઆરીએ યોજાશે. આ ચૂંટણી વિધાનસભાના નિયમ-11 તેમજ નિયમ 10(2) મુજબ યોજાશે, જેને લઈને રાજકીય વર્તુળોમાં ચર્ચાઓ તેજ બની છે અને પક્ષોએ પોતાના ઉમેદવારને લઈને આંતરિક ચર્ચાઓ શરૂ કરી દીધી છે.
જાહેરનામા અનુસાર ઉપાધ્યક્ષ પદ માટે ઉમેદવારી નોંધાવવાની અંતિમ તારીખ 13 ફેબ્રુઆરી નક્કી કરવામાં આવી છે. ઉમેદવારી ફોર્મ બપોરે 12:00 વાગ્યા સુધી જ સ્વીકારવામાં આવશે અને તે બાદ રજૂ થતી કોઈપણ દરખાસ્ત માન્ય ગણાશે નહીં. ચૂંટણી પ્રક્રિયામાં ખાસ નિયમો લાગુ રહેશે, જેમાં એક સભ્ય માત્ર એક જ ઉમેદવારી દરખાસ્ત કરી શકશે અને કોઈપણ સભ્ય પોતાનું નામ જાતે ઉમેદવાર તરીકે રજૂ કરી શકશે નહીં. ઉમેદવારી માટે અન્ય સભ્ય દ્વારા દરખાસ્ત મૂકવી ફરજિયાત રહેશે.
ઉપાધ્યક્ષ પદની ચૂંટણી વિધાનસભાની કામગીરી માટે મહત્વપૂર્ણ માનવામાં આવે છે, કારણ કે ઉપાધ્યક્ષ ગૃહની કાર્યવાહી સુચારુ રીતે ચલાવવામાં સ્પીકરને સહયોગ આપે છે અને ગૃહની વ્યવસ્થા જાળવવામાં અગત્યની ભૂમિકા ભજવે છે. 16 ફેબ્રુઆરીના રોજ વિધાનસભામાં મતદાન પ્રક્રિયા હાથ ધરાશે, ત્યારબાદ પરિણામ જાહેર કરીને નવા ઉપાધ્યક્ષની સત્તાવાર જાહેરાત કરવામાં આવશે.
આ ચૂંટણીને લઈને રાજકીય ગતિવિધિઓમાં તેજી જોવા મળી રહી છે. વિવિધ પક્ષો પોતાના સમીકરણોને મજબૂત બનાવવા તેમજ સર્વસંમતિથી ઉમેદવાર ઉભો કરવા પ્રયત્નશીલ છે. આગામી દિવસોમાં ઉમેદવારી પ્રક્રિયા પૂર્ણ થતાં રાજકીય ચિત્ર વધુ સ્પષ્ટ થવાની શક્યતા છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
