ગુજરાતમાં વધતા સાયબર ક્રાઈમ વચ્ચે ગાંધીનગર CID ક્રાઈમની ‘સાયબર સેન્ટર ઓફ એક્સેલન્સ’ ટીમે એક મોટા આંતરરાજ્ય સાયબર કૌભાંડનો પર્દાફાશ કર્યો છે. તપાસ દરમિયાન પોલીસે “મ્યુલ એકાઉન્ટ” ચલાવતી ગેંગના 16 સભ્યોની ધરપકડ કરી છે, જે દેશભરમાં સાયબર છેતરપિંડી અને ઓનલાઈન ગેમિંગના કાળા નાણાંને સગેવગે કરતી હતી.
પ્રાથમિક તપાસ મુજબ, આ ગેંગ દ્વારા દેશભરમાં અંદાજે ₹77 કરોડથી વધુના સાયબર ફ્રોડ કરવામાં આવ્યા છે. આ સમગ્ર નેટવર્કના તાર દુબઈ સહિત વિદેશ સુધી જોડાયેલા હોવાની આશંકા વ્યક્ત કરવામાં આવી છે. અત્યાર સુધીમાં 260થી વધુ બેંક ખાતાઓ અને 375 સાયબર ફ્રોડ કેસો આ રેકેટ સાથે જોડાયેલા હોવાનું સામે આવ્યું છે.
વડોદરા મોડ્યુલ: શેલ કંપનીઓ મારફતે બેંકિંગ નેટવર્ક
તપાસમાં ખુલ્યું છે કે આરોપીઓ નકલી કંપનીઓ જેમ કે “શિવમ એજન્સી”, “શિવધારા મસાલા બિઝનેસ” અને “એમઆર વોટર”ના નામે બેંક ખાતાઓ ખોલાવતા હતા. ત્યારબાદ આ ખાતાઓના ચેકબુક, ડેબિટ કાર્ડ અને સિમ કાર્ડ સાયબર ઠગોને આપવામાં આવતા હતા.
વડોદરા મોડ્યુલના મુખ્ય સૂત્રધારોમાં કિરણ કરશનભાઈ જોશી, સિદ્ધરાજ ગણપતભાઈ શિરવાડિયા સહિત પાંચ આરોપીઓની ધરપકડ કરવામાં આવી છે. પોલીસને અહીંથી મોબાઈલ ફોન, ચેકબુક, પાસબુક અને બ્લેન્ક ચેક સહિતનો મહત્વનો પુરાવો મળ્યો છે.
પાલનપુર લિંક: બેંક ડેટા અને ડિજિટલ પુરાવા જપ્ત
પાલનપુરમાંથી મીત રતિલાલ શ્રીમાળી અને મેહુલ બાબુભાઈ સોલંકીની ધરપકડ કરવામાં આવી છે. આરોપીઓ દ્વારા અનેક બેંક ખાતાઓ ખોલાવી તેને સાયબર નેટવર્ક સુધી પહોંચાડવામાં આવતા હતા.
અહીંથી પોલીસે મોટી માત્રામાં આધાર કાર્ડ, પાન કાર્ડ, બેંક વિગતો અને ડિજિટલ ડેટા જપ્ત કર્યો છે, જે સમગ્ર રેકેટના વિસ્તૃત નેટવર્ક તરફ ઈશારો કરે છે.
ગોવા મોડ્યુલ: ઓપરેશન હબનો પર્દાફાશ
તકનીકી સર્વેલન્સના આધારે ગોવામાં દરોડા પાડીને 9 વધુ આરોપીઓની ધરપકડ કરવામાં આવી છે. આ સ્થળે ગેંગનું મુખ્ય ઓપરેશન હબ કાર્યરત હતું.
અહીંથી 15 લેપટોપ, 72 મોબાઈલ, 126 સિમ કાર્ડ, 115 ડેબિટ કાર્ડ અને અનેક QR કોડ મળી આવ્યા છે. લેપટોપમાંથી સાયબર ક્રાઈમ સંબંધિત ફરિયાદો અને ટ્રાન્ઝેક્શન ડેટાનો મોટો સંગ્રહ મળ્યો છે.
મોડસ ઓપરેન્ડી: ડિજિટલ એરેસ્ટથી જોબ સ્કેમ સુધી
આ ગેંગ ‘ડિજિટલ એરેસ્ટ’, ઇન્વેસ્ટમેન્ટ ફ્રોડ, UPI સ્કેમ અને પાર્ટ-ટાઈમ જોબ સ્કેમ જેવી રીતોથી લોકો સાથે છેતરપિંડી કરતી હતી. 260થી વધુ બેંક એકાઉન્ટ્સ મારફતે નાણાંની હેરાફેરી કરવામાં આવતી હતી.
રાષ્ટ્રીય સાયબર ક્રાઈમ પોર્ટલના ડેટા અનુસાર, આ ખાતાઓ સાથે જોડાયેલી 375 ફરિયાદોમાં કુલ ₹77.72 કરોડની છેતરપિંડી નોંધાઈ છે.
આંતરરાષ્ટ્રીય કનેક્શન: દુબઈ સુધી કડીઓ
તપાસ દરમિયાન વોટ્સએપ અને ટેલિગ્રામ ચેટમાંથી દુબઈ સહિત વિદેશી હેન્ડલર્સ સાથે સંપર્કની માહિતી મળી છે. આરોપીઓ બેંક એકાઉન્ટ્સ અને નાણાંની વિગતો વિદેશમાં મોકલતા હતા.
CIDએ જણાવ્યું છે કે આ કેસમાં હજુ વધુ મોટા માથાઓ અને આંતરરાષ્ટ્રીય કનેક્શનની તપાસ ચાલુ છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
