ટી-20 વર્લ્ડ કપમાં ભારત અને પાકિસ્તાન વચ્ચેની બહુપ્રતીક્ષિત મેચને લઈને ચાલી રહેલી અનિશ્ચિતતા વચ્ચે હવે મોટો રાજકીય અને ક્રિકેટિંગ વળાંક આવ્યો છે. અત્યાર સુધી બહિષ્કારની ધમકી આપનાર પાકિસ્તાને હવે આંતરરાષ્ટ્રીય ક્રિકેટ પરિષદ (ICC) સમક્ષ કેટલીક શરતો મૂકી સોદાબાજી શરૂ કરી હોવાનું અહેવાલોમાં સામે આવ્યું છે. 15 ફેબ્રુઆરીએ કોલંબોમાં યોજાનારી આ હાઈ-વોલ્ટેજ મેચને લઈને ક્રિકેટ જગતમાં ભારે ચર્ચા ચાલી રહી છે.
લાહોરમાં હાઈ-વોલ્ટેજ બેઠક: શું થઈ ચર્ચા?
રવિવારે લાહોરના ગદ્દાફી સ્ટેડિયમમાં ICCના ઉપાધ્યક્ષ ઈમરાન ખ્વાજા, પાકિસ્તાન ક્રિકેટ બોર્ડ (PCB)ના ચેરમેન મોહસિન નકવી અને બાંગ્લાદેશ ક્રિકેટ બોર્ડ (BCB)ના અધ્યક્ષ અમીનુલ ઈસ્લામ બુલબુલ વચ્ચે મહત્વપૂર્ણ બેઠક યોજાઈ હતી. આ બેઠકનો મુખ્ય ઉદ્દેશ્ય ભારત-પાકિસ્તાન મેચને રદ થતી અટકાવવાનો હતો. જોકે લાંબી ચર્ચા છતાં કોઈ અંતિમ નિર્ણય થયો નથી, પરંતુ પાકિસ્તાને પોતાનું વલણ થોડું નરમ કરીને શરતોનું લિસ્ટ ICC સમક્ષ રજૂ કર્યું છે.
PCBની ત્રણ મુખ્ય માંગણીઓ
મીડિયા રિપોર્ટ્સ મુજબ, પાકિસ્તાને ભારત સામે મેચ રમવા માટે ICC સમક્ષ ત્રણ મુખ્ય માંગણીઓ મૂકી છે. તેમાં બાંગ્લાદેશ ક્રિકેટ બોર્ડને થયેલા નુકસાનનું વળતર આપવું, ટુર્નામેન્ટમાં ભાગ લેવા માટેની પાર્ટિસિપેશન ફી વધારવી અથવા ખાસ ભથ્થું આપવું અને ભવિષ્યમાં યોજાનારી ICC ઈવેન્ટ્સના યજમાની અધિકારો અંગે ખાતરી આપવી જેવી માંગણીઓ સામેલ છે. આ માંગણીઓથી ICC પર દબાણ વધ્યું હોવાનું માનવામાં આવે છે.
અન્ય સંભવિત શરતોની ચર્ચા
કેટલાક અહેવાલોમાં એવો પણ દાવો કરવામાં આવ્યો છે કે પાકિસ્તાને વધારાના મુદ્દાઓ પણ ઉઠાવ્યા છે. તેમાં ICC પાસેથી વધુ આવક (રેવન્યૂ શેર), ભારત સાથે દ્વિપક્ષીય ક્રિકેટ સંબંધો ફરી શરૂ કરવાની માંગ અને ટી-20 વર્લ્ડ કપ દરમિયાન ભારતીય ખેલાડીઓ દ્વારા પાકિસ્તાની ખેલાડીઓ સાથે હેન્ડશેક કરવાનું મુદ્દો પણ સામેલ હોવાનું કહેવામાં આવે છે. જોકે આ મુદ્દાઓ અંગે સત્તાવાર પુષ્ટિ હજુ સુધી થઈ નથી.
બહિષ્કારથી ‘યુ-ટર્ન’ તરફ પાકિસ્તાન
થોડા દિવસો પહેલા પાકિસ્તાનના વડાપ્રધાન શહબાઝ શરીફે ભારત સામે મેચ નહીં રમવાની જાહેરાત કરી હતી. પરંતુ ક્રિકેટ નિષ્ણાતો માને છે કે આર્થિક દબાણ અને ટુર્નામેન્ટના વ્યાપારી મહત્વને ધ્યાનમાં રાખીને પાકિસ્તાન માટે બહિષ્કાર જાળવી રાખવો મુશ્કેલ હતો. હવે પાકિસ્તાન દ્વારા શરતો સાથે સહમતી દર્શાવવી એ સંકેત આપે છે કે ભારત-પાકિસ્તાન મહામુકાબલો થવાની શક્યતા વધી ગઈ છે.
વર્લ્ડ કપમાં અત્યાર સુધી બંને ટીમોનું પ્રદર્શન મિશ્ર રહ્યું છે. પાકિસ્તાનને નેધરલેન્ડ્સ સામે કઠિન જીત મળી હતી, જ્યારે ભારતે પણ અમેરિકા સામે જીતવા માટે સંઘર્ષ કરવો પડ્યો હતો. આવી સ્થિતિમાં 15 ફેબ્રુઆરીની મેચ બંને ટીમો માટે મહત્વપૂર્ણ બની શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
🔗 https://www.youtube.com/@oneindianewscom-Gujarat
🔗 https://www.youtube.com/@oneindianewscom
