ગુજરાતમાં છેલ્લા કેટલાક દિવસોથી ચોમાસાના આગમન સાથે રાજ્યના અનેક વિસ્તારોમાં ભારે વરસાદી ઝાપટાં પડી રહ્યાં છે. છેલ્લા 24 કલાકમાં રાજ્યના 155 તાલુકાઓમાં વરસાદ નોંધાયો છે. દેવભૂમિ દ્વારકાના કલ્યાણપુરમાં સૌથી વધુ 2.8 ઈંચ, કચ્છના માંડવીમાં 2.3 ઈંચ, વલસાડના પારડીમાં 1.7 ઈંચ અને નખત્રાણામાં 1.5 ઈંચ વરસાદ થયો છે. ગુજરાત રાજ્યમાં વરસાદની તીવ્રતા વધતી જતી હોવાથી હવામાન વિભાગે રેડ અને ઑરેન્જ એલર્ટના એલાન કર્યા છે. ખાસ કરીને 28મી જૂનના રોજ રાજકોટ, જામનગર, પોરબંદર, જૂનાગઢ, દેવભૂમિ દ્વારકા અને કચ્છ જિલ્લાઓમાં ભારેથી અતિભારે વરસાદ માટે રેડ એલર્ટ જાહેર કરવામાં આવ્યો છે.
આગામી દિવસોની વાત કરીએ તો, 29 અને 30 જૂનના રોજ કચ્છ, અમરેલી, ગીર સોમનાથ, તાપી, ડાંગ, નવસારી, વલસાડ, છોટા ઉદેપુર, નર્મદા, જૂનાગઢ અને પોરબંદર જિલ્લામાં વીજળીના કડાકા સાથે ભારે થી અતિભારે વરસાદની શક્યતા હોવાથી ચેતવણી આપવામાં આવી છે. 1 જુલાઈના રોજ નવસારી અને વલસાડ માટે ઑરેન્જ એલર્ટ છે જ્યારે અમરેલી, ગીર સોમનાથ, ભાવનગર, નર્મદા, સુરત, તાપી અને ડાંગ માટે યલો એલર્ટ આપવામાં આવ્યું છે.
સૌથી મોટું વરસાદી તોફાન 2 જુલાઈના રોજ જોવા મળી શકે છે, કારણ કે રાજ્યના 20 જિલ્લામાં ભારે થી અતિભારે વરસાદની આગાહી છે. અરવલ્લી, મહીસાગર, દાહોદ અને છોટા ઉદેપુર જિલ્લામાં ઑરેન્જ એલર્ટ આપવામાં આવ્યું છે, જ્યારે કચ્છ, પાટણ, મહેસાણા, બનાસકાંઠા, સાબરકાંઠા, ગાંધીનગર, ખેડા, પંચમહાલ, નર્મદા, સુરત, તાપી, નવસારી, ડાંગ, વલસાડ, અમરેલી અને ભાવનગર સહિતના વિસ્તારોમાં યલો એલર્ટ જાહેર કરાયું છે.
ત્રીજી જુલાઈએ ઉત્તર ગુજરાતમાં વરસાદનો ભાર વધશે. બનાસકાંઠા, સાબરકાંઠા, અરવલ્લી, મહીસાગર, મહેસાણા અને પાટણ જિલ્લામાં અતિભારે વરસાદની આગાહી સાથે ઑરેન્જ એલર્ટ જાહેર કરવામાં આવ્યું છે, જ્યારે કચ્છ, સુરેન્દ્રનગર, અમદાવાદ, ગાંધીનગર, ખેડા, આણંદ, વડોદરા, પંચમહાલ, દાહોદ, છોટા ઉદેપુર, ભરુચ, નર્મદા, સુરત, તાપી, ડાંગ, નવસારી, વલસાડ, બોટાદ, ભાવનગર અને અમરેલી જિલ્લામાં યલો એલર્ટ સાથે ભારે વરસાદની ચેતવણી આપવામાં આવી છે.
અધિકારીઓએ નાગરિકોને અગત્યની સલાહો આપતાં પાણી ભરાતા વિસ્તારોમાં ન જવાનું, બહાર નીકળતી વખતે સાવચેતી રાખવી તથા શાસન દ્વારા આપવામાં આવેલી સૂચનાઓનું પાલન કરવા કહ્યું છે. રાજ્યના તંત્રોએ પણ NDRF ટીમો સક્રિય કરી દેવાઈ છે અને તાત્કાલિક રાહત તેમજ બચાવ કામગીરી માટે વ્યવસ્થા ગોઠવી દીધી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
