તાજેતરમાં ગુજરાત ATS (એન્ટી-ટેરરિઝમ સ્ક્વોડ) દ્વારા ત્રણ આતંકવાદીઓની ધરપકડ કરવામાં આવી હતી, જેમાંથી એક આરોપી ડૉક્ટર અહેમદ મોહિયુદ્દીન સૈયદનો કેસ હવે ગંભીર વળાંક લઈ રહ્યો છે. તપાસમાં બહાર આવ્યું છે કે ચીનમાંથી MBBS ડિગ્રી મેળવી આવેલા આ ડૉક્ટર સૈયદે ખતરનાક રાઈસિન ઝેર બનાવવાનો પ્રયાસ કર્યો હતો અને તેની તૈયારી માટે ચેટજીપીટી જેવી આર્ટિફિશિયલ ઈન્ટેલિજન્સ ટેક્નોલોજીનો ઉપયોગ કર્યો હતો.
ATSના સૂત્રો અનુસાર, આરોપીના મોબાઈલ અને લૅપટૉપની ફોરેન્સિક તપાસ દરમિયાન ચેટજીપીટી પરના અનેક ઝેરી રસાયણ સંબંધિત ક્વેરીઝ મળી આવી છે, જેમાં રાઈસિન કેવી રીતે બનાવાય, તેની અસર શું છે અને તેનો ઉપયોગ કેવી રીતે થાય — તેવી માહિતી શોધવાનો પ્રયત્ન થયો હતો. આને આધારે તપાસ એજન્સી માનતી છે કે આરોપી કોઈ ગંભીર આતંકવાદી કાવતરાની તૈયારીમાં હતો.
ધરપકડ વખતે ATSને અહેમદ સૈયદના કબજામાંથી કેસ્ટર ઓઇલ, એરંડાના બીજ, અને હથિયારો મળી આવ્યા હતા. તપાસમાં જાણવા મળ્યું કે આ એરંડાના બીજમાંથી રાઈસિન ટૉક્સિન તૈયાર કરી શકાય છે. રાઈસિન એક અત્યંત ઝેરી પ્રોટિન છે, જે જો શરીરમાં પ્રવેશી જાય તો મિનિટોમાં જીવલેણ સાબિત થઈ શકે છે. માત્ર બે બી પણ ખાવામાં આવે તો તે મૃત્યુકારક સાબિત થઈ શકે છે.
અમેરિકાના ન્યૂયોર્ક હેલ્થ ડિપાર્ટમેન્ટ અને CDC (Centers for Disease Control and Prevention) અનુસાર, રાઈસિનને એક સંભાવિત બાયોવેપન (જૈવિક હથિયાર) તરીકે વર્ગીકૃત કરવામાં આવ્યું છે. તે પાઉડર, ગોળી, પ્રવાહી કે વાયુ સ્વરૂપે તૈયાર કરી શકાય છે અને ખોરાક કે પાણીમાં ભેળવી દેવાય તો એકસાથે અનેક લોકો માટે ઘાતક નીવડી શકે છે.
ATSના અધિકારીઓનું કહેવું છે કે આરોપી સૈયદે AI આધારિત સાધનોનો ઉપયોગ કરીને ઝેરની ફોર્મ્યુલા, તેની પ્રતિક્રિયા અને પ્રોસેસ જાણવા પ્રયાસ કર્યો હતો. હાલ એજન્સી તપાસ કરી રહી છે કે આ યોજના પાછળ અન્ય આતંકી સંગઠનો અથવા વિદેશી હેન્ડલર્સનો હાથ હતો કે નહીં.
આ ઘટના એ સ્પષ્ટ સંકેત આપે છે કે આતંકવાદીઓ હવે નવી પેઢીની ટેક્નોલોજી — ખાસ કરીને આર્ટિફિશિયલ ઈન્ટેલિજન્સ અને જનરેટિવ ટૂલ્સ —નો ઉપયોગ કરીને ખતરનાક બાયો-કેમિકલ હથિયારો તૈયાર કરવાનો પ્રયાસ કરી રહ્યા છે, જે રાષ્ટ્રીય સુરક્ષાને લઈ નવી ચિંતા ઉભી કરે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
