વડા પ્રધાન નરેન્દ્ર મોદીએ શનિવારે (20 ડિસેમ્બર) પશ્ચિમ બંગાળમાં ‘વંદે માતરમ્’ને ભારતનું ‘રાષ્ટ્રીય જાગરણ મંત્ર’ ગણાવ્યું અને તેને સ્વાતંત્ર્ય સંગ્રામ તથા બંગાળના ગૌરવશાળી સાંસ્કૃતિક વારસા સાથે જોડ્યું. સંસદના શીતકાલીન સત્ર દરમિયાન ‘વંદે માતરમ્’ને લઈને ઉભા થયેલા રાજકીય વિવાદની પૃષ્ઠભૂમિમાં આવેલી આ ટિપ્પણી ખાસ મહત્વની બની છે.
પશ્ચિમ બંગાળના નદિયા જિલ્લામાં એક જાહેર કાર્યક્રમને વર્ચ્યુઅલી સંબોધિત કરતાં પીએમ મોદીએ જણાવ્યું હતું કે ‘વંદે માતરમ્’ની ઉત્પત્તિ બંગાળની ધરતી પર થઈ હતી અને આ ગીતે દેશભરમાં રાષ્ટ્રીય ચેતનાને જગાડવામાં મહત્વપૂર્ણ ભૂમિકા ભજવી હતી. તેમણે ગીતના રચયિતા બંકિમચંદ્ર ચટ્ટોપાધ્યાયને યાદ કરતા કહ્યું કે, તેમના શબ્દોએ સમગ્ર રાષ્ટ્રને જાગૃત કરી દીધું હતું.
પીએમ મોદીએ બંગાળની આધ્યાત્મિક અને સામાજિક પરંપરાઓનું પણ સ્મરણ કર્યું. તેમણે નદિયાને ચૈતન્ય મહાપ્રભુની ભૂમિ ગણાવી અને સમાજ સુધારક શ્રી હરિચંદ ઠાકુરને શ્રદ્ધાંજલિ અર્પી. પીએમ મોદીએ કહ્યું કે, આવા મહાન વ્યક્તિત્વોએ સમાજને એકતા, ભક્તિ અને સુધારાનો માર્ગ બતાવ્યો. ગંગા નદીનો ઉલ્લેખ કરતાં તેમણે કહ્યું કે બિહારથી બંગાળ તરફ વહેતી ગંગા માત્ર નદી નથી, પરંતુ વિવિધ પ્રદેશોને જોડતી સાંસ્કૃતિક અને રાજકીય કડી છે.
આ સાથે જ પીએમ મોદીએ પશ્ચિમ બંગાળની મમતા બેનર્જી સરકાર પર કડક પ્રહાર કર્યા. તેમણે રાજ્યમાં કુશાસન, ભ્રષ્ટાચાર અને વિકાસ અટકી પડવાના આરોપ લગાવ્યા. મોદીએ કહ્યું કે બિહારથી ‘જીતની ગંગા’ બંગાળ તરફ આવી રહી છે અને હવે રાજ્યમાંથી ‘જંગલરાજ’નો અંત આવશે. તેમણે દાવો કર્યો કે બંગાળના લોકો બદલાવ ઇચ્છે છે અને ‘બચતે ચાઈ, બીજેપી ચાઈ’ના નારા લગાવી રહ્યા છે.
વિશેષ વાત એ રહી કે પીએમ મોદીએ પોતાના સમગ્ર ભાષણનો અંત પણ ‘વંદે માતરમ્’ના નારા સાથે કર્યો. આ ભાષણ સંસદમાં ‘વંદે માતરમ્’ના 150 વર્ષ પૂર્ણ થવા નિમિત્તે થયેલી ગરમાગરમ ચર્ચા પછી આવ્યું હોવાથી રાજકીય રીતે પણ ખાસ ચર્ચામાં રહ્યું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
