ગુજરાતમાં શાળા-કૉલેજો, સરકારી કચેરીઓ અને અદાલતો સહિત વિવિધ સ્થળોને બૉમ્બથી ઉડાવી દેવાની ધમકી આપતા ઇ-મેઇલના કેસોની તપાસમાં ગુજરાત પોલીસને મોટી સફળતા મળી છે. ગુજરાત પોલીસના ‘સાયબર સેન્ટર ઓફ એક્સેલન્સ’ની ટેકનિકલ તપાસના આધારે બિહાર અને ઝારખંડમાંથી બે મુખ્ય આરોપીઓની અટકાયત કરવામાં આવી છે. તપાસ દરમિયાન લાખો ઇ-મેઇલ આઈડી અને પાસવર્ડનો ડેટાબેઝ પણ મળી આવ્યો હોવાનું સામે આવ્યું છે.
CM ઓફિસ અને વિધાનસભા સહિતના સ્થળોને ધમકી
સમગ્ર મામલાની તપાસ 10 સપ્ટેમ્બરે ગુજરાત સરકારના વિધાન અને સંસદીય બાબતોના વિભાગને મળેલા એક ધમકીભર્યા ઇ-મેઇલ બાદ વધુ તેજ કરવામાં આવી હતી. આ ઇ-મેઇલમાં ગુજરાતના મુખ્યમંત્રી કાર્યાલય, વિધાનસભા સહિતના મહત્વપૂર્ણ સ્થળોનો ઉલ્લેખ કરીને ધમકી આપવામાં આવી હતી.
ધમકીભર્યા સંદેશમાં વડાપ્રધાન નરેન્દ્ર મોદી, કેન્દ્રીય ગૃહમંત્રી અમિત શાહ સહિત વરિષ્ઠ નેતાઓનો પણ ઉલ્લેખ કરવામાં આવ્યો હતો. આ ઉપરાંત ભારતમાં યોજાઈ રહેલી BRICS Summitના સંદર્ભમાં સહયોગી દેશોનો પણ ઉલ્લેખ હોવાનો દાવો કરવામાં આવ્યો છે. મામલાની ગંભીરતા જોતાં ગુજરાત પોલીસે તાત્કાલિક ટેકનિકલ તપાસ શરૂ કરી હતી.
A major breakthrough by the 𝗖𝘆𝗯𝗲𝗿 𝗖𝗲𝗻𝘁𝗿𝗲 𝗼𝗳 𝗘𝘅𝗰𝗲𝗹𝗹𝗲𝗻𝗰𝗲, 𝗚𝘂𝗷𝗮𝗿𝗮𝘁 𝗣𝗼𝗹𝗶𝗰𝗲 𝗵𝗮𝘀 𝗲𝘅𝗽𝗼𝘀𝗲𝗱 𝗮𝗻𝗱 𝗱𝗶𝘀𝗺𝗮𝗻𝘁𝗹𝗲𝗱 𝗮𝗻 𝗶𝗻𝘁𝗲𝗿-𝗦𝘁𝗮𝘁𝗲 𝗯𝗼𝗺𝗯 𝘁𝗵𝗿𝗲𝗮𝘁 𝗲𝗺𝗮𝗶𝗹 𝗻𝗲𝘁𝘄𝗼𝗿𝗸 with Bangladesh links.
✅ Key accused arrested…
— Harsh Sanghavi (@sanghaviharsh) September 14, 2026
ડિજિટલ ફૂટપ્રિન્ટથી ભાગલપુર સુધી પહોંચી ગુજરાત પોલીસ
સાયબર સેન્ટર ઓફ એક્સેલન્સ દ્વારા ઇ-મેઇલ અને અન્ય ડિજિટલ ફૂટપ્રિન્ટ્સનું વિશ્લેષણ કરવામાં આવ્યું હતું. ટેકનિકલ તપાસનો છેડો બિહારના ભાગલપુર સુધી પહોંચ્યો હતો. ત્યારબાદ સ્થાનિક પોલીસની મદદથી ગુજરાત પોલીસની ટીમે રોશન કુમાર ઉર્ફે રાજેન્દ્ર કુમાર ભૂમિહારની અટકાયત કરી હતી.
પોલીસ તપાસ દરમિયાન મળેલી માહિતીના આધારે કેસમાં ઝારખંડ કનેક્શન પણ સામે આવ્યું હતું. ધમકી માટે ઉપયોગમાં લેવાયેલા ઇ-મેઇલ આઈડી અંગેની તપાસ ઝારખંડના દેવઘરના રહેવાસી ગુલશન કુમાર કૌશલ સિંઘ સુધી પહોંચી હતી. ટેકનિકલ સર્વેલન્સના આધારે તેની પણ ઝારખંડમાંથી અટકાયત કરવામાં આવી હતી.
5.13 લાખથી વધુ ઇ-મેઇલ ID અને પાસવર્ડનો ડેટાબેઝ મળ્યાનો દાવો
તપાસમાં સૌથી ચોંકાવનારી બાબત લાખો ઇ-મેઇલ એકાઉન્ટ્સ સંબંધિત ડેટા મળ્યાની છે. પોલીસના જણાવ્યા અનુસાર આરોપીઓ પાસેથી 5.13 લાખથી વધુ યુનિક ઇ-મેઇલ આઈડી અને તેના પાસવર્ડ ધરાવતો મોટો ડેટાબેઝ મળી આવ્યો છે.
પ્રાથમિક તપાસમાં આરોપીઓ દ્વારા અલગ-અલગ ટેકનિકલ પદ્ધતિનો ઉપયોગ કરીને ઇ-મેઇલ એકાઉન્ટ્સ તૈયાર કરવામાં આવતા હોવાનું સામે આવ્યું છે. ઓથેન્ટિકેશન પ્રક્રિયાને બાયપાસ કરવા માટે પણ ટેકનિકલ પદ્ધતિઓનો ઉપયોગ થયો હોવાની તપાસ કરવામાં આવી રહી છે.
આ એકાઉન્ટ્સનો ઉપયોગ માત્ર ધમકીભર્યા ઇ-મેઇલ મોકલવા માટે થયો હતો કે અન્ય સાયબર ગુનાઓ માટે પણ તેનો ઉપયોગ કરવામાં આવ્યો હતો, તે દિશામાં પોલીસ તપાસ આગળ વધારી રહી છે.
બાંગ્લાદેશ કનેક્શનની પણ તપાસ
આ આંતરરાજ્ય સાયબર નેટવર્કની તપાસમાં સંભવિત બાંગ્લાદેશ કનેક્શન પણ સામે આવ્યું હોવાનું પોલીસનું કહેવું છે. નેટવર્કને બાંગ્લાદેશમાંથી નાણાકીય સહાય અથવા સૂચનાઓ મળી હતી કે કેમ તે અંગે તપાસ ચાલી રહી છે. આ તબક્કે આ બાબતો તપાસ હેઠળ હોવાથી અંતિમ નિષ્કર્ષ આવવાનો બાકી છે.
પોલીસ એ દિશામાં પણ તપાસ કરી રહી છે કે નાણાંની હેરફેર માટે ક્રિપ્ટોકરન્સી અથવા ક્રિપ્ટો વોલેટનો ઉપયોગ કરવામાં આવ્યો હતો કે કેમ. આ ઉપરાંત લાખો ઇ-મેઇલ ક્રિડેન્શિયલ્સ કોની સાથે શેર કરવામાં આવ્યા હતા અને તેનો અન્ય કોઈ ગુનાહિત પ્રવૃત્તિમાં ઉપયોગ થયો છે કે નહીં તેની પણ તપાસ કરવામાં આવી રહી છે.
ત્રણ રાજ્યોની પોલીસના સંકલનથી કાર્યવાહી
આ સમગ્ર ઓપરેશન ગુજરાત પોલીસના સાયબર સેન્ટર ઓફ એક્સેલન્સના નેતૃત્વ હેઠળ હાથ ધરવામાં આવ્યું હતું. ગાંધીનગર, બિહારના ભાગલપુર અને ઝારખંડના દેવઘરની પોલીસના સંકલનથી બંને આરોપીઓ સુધી પહોંચવામાં સફળતા મળી હતી.
આ કેસમાં મળેલા ડિજિટલ ડેટાની તપાસને કારણે નેટવર્ક સાથે અન્ય લોકો જોડાયેલા છે કે નહીં, અગાઉ મોકલવામાં આવેલી બૉમ્બ ધમકીઓ સાથે તેનો કોઈ સંબંધ છે કે નહીં અને આ નેટવર્કનું વાસ્તવિક પ્રમાણ કેટલું મોટું છે તે અંગે વધુ માહિતી સામે આવી શકે છે.
હર્ષ સંઘવીએ પોલીસની કામગીરી અંગે આપી માહિતી
હર્ષ સંઘવીએ સોશિયલ મીડિયા પ્લેટફોર્મ X પર પોલીસની કામગીરી અંગે માહિતી આપતાં આંતરરાજ્ય બૉમ્બ ધમકી ઇ-મેઇલ નેટવર્ક સામે થયેલી કાર્યવાહીની જાણકારી આપી હતી. તેમણે ગુજરાત પોલીસની સાયબર ગુનાઓ સામેની ટેકનિકલ ક્ષમતા અને કામગીરીનો ઉલ્લેખ કર્યો હતો.
ધમકીભર્યો ઇ-મેઇલ મળે તો 1930 પર કરો સંપર્ક
ગુજરાત પોલીસે લોકોને શંકાસ્પદ અથવા ધમકીભર્યો ઇ-મેઇલ મળે ત્યારે ગભરાવાને બદલે તાત્કાલિક પોલીસને જાણ કરવાની અપીલ કરી છે. નાગરિકો સ્થાનિક પોલીસનો સંપર્ક કરી શકે છે અથવા સાયબર ક્રાઇમ હેલ્પલાઇન નંબર 1930 પર જાણ કરી શકે છે.
પોલીસે આવા ધમકીભર્યા સંદેશને અન્ય લોકોને ફોરવર્ડ ન કરવા, તેના સ્ક્રીનશોટ સોશિયલ મીડિયા પર વાયરલ ન કરવા અને ઇ-મેઇલ મોકલનાર વ્યક્તિ સાથે સીધો સંપર્ક કરવાનો પ્રયાસ ન કરવા પણ સૂચના આપી છે. આવા કેસમાં ડિજિટલ પુરાવા સુરક્ષિત રાખીને તાત્કાલિક પોલીસને જાણ કરવી જરૂરી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
🔗 https://www.youtube.com/@oneindianewscom-Gujarat
🔗 https://www.youtube.com/@oneindianewscom
