અમદાવાદ શહેરમાં મંગળવારે બપોરે એક મોટી આગની દુર્ઘટના સર્જાતા ભારે અરેરાટી ફેલાઈ ગઈ હતી. વિશાલા સર્કલથી નારોલ તરફ જવાના મુખ્ય માર્ગ પર આવેલા મેટ્રો સ્ટેશન નજીકની ઝૂંપડપટ્ટીમાં અચાનક વિકરાળ આગ ફાટી નીકળી હતી. આગ એટલી ઝડપથી ફેલાઈ હતી કે થોડા જ સમયમાં સમગ્ર વિસ્તાર ધુમાડાના કાળા ગોટેગોટાથી છવાઈ ગયો હતો અને સ્થાનિક રહેવાસીઓમાં નાસભાગ મચી ગઈ હતી.
ઘટનાની જાણ થતાં જ અમદાવાદ ફાયર બ્રિગેડ તાત્કાલિક એક્શન મોડમાં આવી ગયું હતું. ફાયર કંટ્રોલ રૂમમાં કોલ મળતાની સાથે જ આઠ ફાયર ફાઈટર ગાડીઓ અને પાણીના ટેન્કરો ઘટનાસ્થળે રવાના કરવામાં આવ્યા હતા. કલાકો સુધી ચાલેલી જહેમત બાદ ફાયર વિભાગે આગ પર મહદઅંશે કાબૂ મેળવ્યો હતો.
200થી વધુ ઝૂંપડાં અસરગ્રસ્ત, 60થી વધુ ઝૂંપડાં બળીને ખાખ
સ્થાનિક સૂત્રોના જણાવ્યા અનુસાર અસરગ્રસ્ત વિસ્તારમાં આશરે 200થી વધુ શ્રમિક પરિવારોના ઝૂંપડાં આવેલા છે. આગની સીધી અસર 60થી વધુ ઝૂંપડાં પર પડી હોવાનું પ્રાથમિક માહિતીમાં સામે આવ્યું છે. ઝૂંપડાંમાં વાંસ, પ્લાસ્ટિકની તાડપત્રીઓ અને અન્ય જ્વલનશીલ સામગ્રીનો ઉપયોગ કરવામાં આવ્યો હોવાથી આગે ખૂબ જ ઝડપથી રૌદ્ર સ્વરૂપ ધારણ કર્યું હતું.
આ દુર્ઘટનામાં અનેક ગરીબ પરિવારોની ઘરવખરી, અનાજ, કપડાં અને જીવનજરૂરી સામાન બળીને ખાખ થઈ ગયો છે. વર્ષો સુધી મહેનત કરીને એકત્ર કરેલી મિલકત પળવારમાં આગની ભેટ ચડી જતા અસરગ્રસ્ત પરિવારો માટે આ ઘટના અત્યંત દુઃખદ સાબિત થઈ છે.
ધુમાડાના ગોટેગોટા જોઈ સ્થાનિકોમાં મચી દોડધામ
બપોરના સમયે અચાનક આગ લાગતા સમગ્ર વિસ્તારમાં ભારે ગભરાટનો માહોલ સર્જાયો હતો. સ્થાનિક લોકોએ ઝૂંપડાંમાંથી પરિવારજનોને બહાર કાઢવા માટે દોડધામ શરૂ કરી દીધી હતી. આગ ઝડપથી ફેલાતી હોવાથી લોકો પોતાના ઘરનો સામાન પણ બચાવી શક્યા ન હતા.
ઘટનાની ગંભીરતા જોતા પોલીસ અને સ્થાનિક તંત્ર પણ તાત્કાલિક સ્થળ પર પહોંચી ગયું હતું અને આસપાસના વિસ્તારોમાં સુરક્ષા વ્યવસ્થા ગોઠવી દેવામાં આવી હતી.
મેયર હિતેશ બારોટ ઘટનાસ્થળે પહોંચ્યા
આ અગ્નિકાંડની જાણ થતાં જ અમદાવાદના મેયર હિતેશ બારોટ તાત્કાલિક ઘટનાસ્થળે પહોંચ્યા હતા. તેમણે ફાયર વિભાગ અને તંત્ર દ્વારા ચાલી રહેલી રાહત કામગીરીનું નિરીક્ષણ કર્યું હતું અને અસરગ્રસ્ત પરિવારોની સ્થિતિ અંગે માહિતી મેળવી હતી.
મીડિયા સાથે વાતચીત દરમિયાન મેયર હિતેશ બારોટે જણાવ્યું હતું કે, “કોઈ એક ઝૂંપડામાં આગ લાગી હશે અને પવન તેમજ જ્વલનશીલ સામગ્રીના કારણે આગ ઝડપથી અન્ય ઝૂંપડાઓમાં ફેલાઈ ગઈ હતી. સદનસીબે આટલી મોટી ઘટનામાં કોઈ જાનહાનિ થઈ નથી. ફાયર વિભાગે સમયસર કામગીરી કરીને આગ પર સંપૂર્ણ કાબૂ મેળવી લીધો છે.”
જાનહાનિ ટળી, પરંતુ ગરીબોના આશરા ખાખ
આ સમગ્ર ઘટનામાં સૌથી રાહતની વાત એ છે કે કોઈ જાનહાનિ નોંધાઈ નથી. જોકે, અનેક પરિવારોના માથા પરથી છત છીનવાઈ ગઈ છે અને તેઓ હવે તાત્કાલિક આશ્રય અને સહાયની રાહ જોઈ રહ્યા છે.
ફાયર વિભાગ અને સ્થાનિક તંત્ર દ્વારા નુકસાનનું મૂલ્યાંકન શરૂ કરવામાં આવ્યું છે. સાથે જ અસરગ્રસ્ત પરિવારોને જરૂરી સહાય, ખોરાક અને તાત્કાલિક રહેઠાણ ઉપલબ્ધ કરાવવા માટે પણ કવાયત હાથ ધરવામાં આવી રહી છે.
તંત્ર દ્વારા તપાસ શરૂ
આગ લાગવાનું ચોક્કસ કારણ હજુ સુધી સામે આવ્યું નથી. ફાયર વિભાગ અને સંબંધિત એજન્સીઓ દ્વારા ઘટનાની તપાસ શરૂ કરવામાં આવી છે. શોર્ટ સર્કિટ, ગેસ લીકેજ અથવા અન્ય કોઈ કારણ જવાબદાર છે કે કેમ તે અંગે તપાસ બાદ જ સ્પષ્ટતા થઈ શકશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
