ભારતના વડાપ્રધાન નરેન્દ્ર મોદીએ ભારતીય રાજકારણમાં વધુ એક ઐતિહાસિક સિદ્ધિ પોતાના નામે નોંધાવી છે. 9 જૂન 2026ના રોજ વડાપ્રધાન મોદીએ ચૂંટાયેલા વડાપ્રધાન તરીકે સતત 4,398 દિવસનો કાર્યકાળ પૂર્ણ કરીને ભારતના પ્રથમ વડાપ્રધાન જવાહરલાલ નેહરુના રેકોર્ડની બરાબરી કરી છે. આ સાથે તેઓ ચૂંટાયેલા અને સતત શાસન કરનારા વડાપ્રધાનોની યાદીમાં નેહરુની સમકક્ષ સ્થાને પહોંચી ગયા છે. 10 જૂન 2026ના રોજ તેઓ આ રેકોર્ડને પાછળ છોડીને દેશના સૌથી લાંબા સમય સુધી સતત સેવા આપનારા ચૂંટાયેલા વડાપ્રધાન બની ગયા છે.
વર્ષ 2014માં પ્રથમ વખત વડાપ્રધાન બન્યા બાદ નરેન્દ્ર મોદીએ દેશના રાજકીય, આર્થિક, સામાજિક અને ટેક્નોલોજીકલ ક્ષેત્રોમાં અનેક મહત્વપૂર્ણ નિર્ણયો લીધા છે. તેમના 12 વર્ષના કાર્યકાળ દરમિયાન અમલમાં આવેલી યોજનાઓ અને સુધારાઓએ ભારતના વિકાસને નવી દિશા આપી હોવાનું સરકારનું માનવું છે.
1. ડિજિટલ ઈન્ડિયા અને UPIએ બદલી નાખી ચુકવણી વ્યવસ્થા
વડાપ્રધાન મોદીના કાર્યકાળની સૌથી મોટી ઉપલબ્ધિઓમાં ડિજિટલ ઈન્ડિયા અભિયાન અને UPI ક્રાંતિનો સમાવેશ થાય છે. ભારત આજે વિશ્વના સૌથી મોટા ડિજિટલ પેમેન્ટ ઇકોસિસ્ટમ તરીકે ઉભરી આવ્યું છે. યુનિફાઈડ પેમેન્ટ ઈન્ટરફેસ (UPI) દ્વારા દેશના નાના વેપારીઓથી લઈને મોટા ઉદ્યોગો સુધી કેશલેસ વ્યવહારો સામાન્ય બન્યા છે.
મે 2026 સુધીના આંકડા મુજબ દર મહિને 23 અબજથી વધુ UPI ટ્રાન્ઝેક્શન નોંધાઈ રહ્યા છે, જે ભારતની ડિજિટલ અર્થવ્યવસ્થાની મજબૂતાઈ દર્શાવે છે.
2. જનધન યોજના દ્વારા કરોડો લોકો બેંકિંગ વ્યવસ્થાથી જોડાયા
2014માં શરૂ કરાયેલી પ્રધાનમંત્રી જનધન યોજના હેઠળ 58 કરોડથી વધુ બેંક ખાતા ખોલવામાં આવ્યા છે. આ યોજનાએ દેશના ગરીબ અને વંચિત વર્ગોને બેંકિંગ સિસ્ટમ સાથે જોડવામાં મહત્વની ભૂમિકા ભજવી છે.
ડાયરેક્ટ બેનિફિટ ટ્રાન્સફર (DBT) મારફતે સરકારી સહાય અને સબસિડી સીધી લાભાર્થીઓના ખાતામાં જમા થવા લાગી, જેના કારણે પારદર્શિતા અને કાર્યક્ષમતામાં વધારો થયો.
3. ઈન્ફ્રાસ્ટ્રક્ચર ક્ષેત્રમાં ઝડપી વિકાસ
છેલ્લા 12 વર્ષમાં ભારતના ઇન્ફ્રાસ્ટ્રક્ચર ક્ષેત્રમાં નોંધપાત્ર વિકાસ થયો છે. દેશમાં લગભગ 1.46 લાખ કિલોમીટર રાષ્ટ્રીય ધોરીમાર્ગોનું નિર્માણ અને વિસ્તરણ કરવામાં આવ્યું છે.
રેલવે ક્ષેત્રમાં વીજળીકરણને પ્રોત્સાહન મળ્યું છે તેમજ વંદે ભારત જેવી આધુનિક ટ્રેનો શરૂ કરવામાં આવી છે. UDAN યોજના હેઠળ નાના શહેરોને હવાઈ સેવા સાથે જોડવા માટે અનેક નવા એરપોર્ટ વિકસાવવામાં આવ્યા છે.
4. કલમ 370 દૂર કરવાનો ઐતિહાસિક નિર્ણય
ઓગસ્ટ 2019માં મોદી સરકારે જમ્મુ-કાશ્મીરમાંથી કલમ 370 અને 35A દૂર કરવાનો ઐતિહાસિક નિર્ણય લીધો હતો. આ નિર્ણય બાદ જમ્મુ-કાશ્મીર અને લદ્દાખ સંપૂર્ણપણે ભારતીય બંધારણના દાયરામાં આવ્યા હતા.
સરકારના જણાવ્યા અનુસાર આ પગલાથી વિકાસ કાર્યોને વેગ મળ્યો છે અને સુરક્ષા પરિસ્થિતિમાં પણ સુધારો નોંધાયો છે.
5. આયુષ્માન ભારતથી આરોગ્ય ક્ષેત્રમાં મોટી રાહત
આયુષ્માન ભારત યોજના હેઠળ કરોડો ગરીબ અને મધ્યમવર્ગીય પરિવારોને દર વર્ષે 5 લાખ રૂપિયા સુધીની કેશલેસ સારવારનો લાભ આપવામાં આવી રહ્યો છે.
ડિજિટલ હેલ્થ મિશન અને ઈ-સંજીવની જેવી સેવાઓ દ્વારા આરોગ્ય સેવાઓને દેશના દૂરદરાજ વિસ્તારો સુધી પહોંચાડવાનો પ્રયાસ કરવામાં આવ્યો છે.
6. હર ઘર જલ અને પીએમ આવાસ યોજનાથી જીવનધોરણમાં સુધારો
હર ઘર જલ મિશન અંતર્ગત 15 કરોડથી વધુ ઘરો સુધી પાઈપલાઈન દ્વારા શુદ્ધ પીવાનું પાણી પહોંચાડવામાં આવ્યું છે. જ્યારે પ્રધાનમંત્રી આવાસ યોજના હેઠળ લાખો પરિવારોને પક્કા મકાનો મળ્યા છે.
આ યોજનાઓએ ગ્રામ્ય અને શહેરી ગરીબોના જીવનધોરણમાં સુધારો લાવવામાં મહત્વપૂર્ણ યોગદાન આપ્યું છે.
7. મેક ઇન ઇન્ડિયા અને આત્મનિર્ભર ભારતને મળ્યો વેગ
મેક ઇન ઇન્ડિયા અને આત્મનિર્ભર ભારત અભિયાન દ્વારા ભારતને વૈશ્વિક મેન્યુફેક્ચરિંગ હબ બનાવવા પ્રયાસ કરવામાં આવ્યા છે. PLI યોજના દ્વારા ઇલેક્ટ્રોનિક્સ, મોબાઈલ, ઓટોમોબાઈલ અને ડિફેન્સ ક્ષેત્રમાં મોટા પ્રમાણમાં રોકાણ આકર્ષવામાં આવ્યું છે.
ભારત આજે વિશ્વનો બીજો સૌથી મોટો મોબાઈલ ઉત્પાદક દેશ બની ગયો છે.
8. સંરક્ષણ ક્ષેત્રમાં આત્મનિર્ભરતા અને મજબૂત સુરક્ષા નીતિ
મોદી સરકારના કાર્યકાળ દરમિયાન સર્જિકલ સ્ટ્રાઈક અને બાલાકોટ એરસ્ટ્રાઈક જેવા નિર્ણયો દ્વારા આતંકવાદ સામે કડક વલણ અપનાવવામાં આવ્યું હતું.
સાથે જ INS વિક્રાંત, તેજસ અને બ્રહ્મોસ જેવી સ્વદેશી સંરક્ષણ ક્ષમતાઓને પ્રોત્સાહન મળ્યું છે. ભારતની ડિફેન્સ નિકાસમાં પણ નોંધપાત્ર વધારો નોંધાયો છે.
9. સ્વચ્છ ભારત અને ઉજ્જવલા યોજનાનો પ્રભાવ
2014માં શરૂ કરાયેલી સ્વચ્છ ભારત મિશન હેઠળ દેશભરમાં 12 કરોડથી વધુ શૌચાલયોનું નિર્માણ કરવામાં આવ્યું છે. જ્યારે ઉજ્જવલા યોજના હેઠળ કરોડો મહિલાઓને મફત ગેસ કનેક્શન આપવામાં આવ્યા છે.
આ યોજનાઓએ સ્વાસ્થ્ય, સ્વચ્છતા અને મહિલાઓના સશક્તિકરણમાં મહત્વપૂર્ણ યોગદાન આપ્યું છે.
10. અવકાશ ક્ષેત્રમાં ભારતની ઐતિહાસિક સિદ્ધિઓ
મોદી સરકારના કાર્યકાળમાં ભારતે અવકાશ ક્ષેત્રમાં વૈશ્વિક સ્તરે નવી ઓળખ ઉભી કરી છે. ચંદ્રયાન-3 ચંદ્રના દક્ષિણ ધ્રુવ પર સફળ ઉતરાણ કરનાર વિશ્વનું પ્રથમ મિશન બન્યું હતું.
આ ઉપરાંત આદિત્ય-L1 મિશન અને ખાનગી અવકાશ સ્ટાર્ટઅપ્સને પ્રોત્સાહન મળતાં ભારતનો સ્પેસ સેક્ટર ઝડપથી વિકસી રહ્યો છે.
11. GST સુધારણા: એક રાષ્ટ્ર, એક કર
2017માં ગુડ્સ એન્ડ સર્વિસીસ ટેક્સ (જીએસટી) ના અમલીકરણથી દેશની જટિલ કર પ્રણાલી દૂર થઈ. આ વન નેશન વન ટેક્સ એક મોડેલે રાજ્યો વચ્ચે વેપારને સરળ બનાવ્યો.
12. વિશ્વનું સૌથી મોટું COVID-19 રસીકરણ અભિયાન
COVID-19 રોગચાળાના સંકટ દરમિયાન ભારતે માત્ર પોતાની સ્વદેશી રસી, Covaxin વિકસાવી જ નહીં પરંતુ નાગરિકોને સંપૂર્ણપણે મફત અને ડિજિટલ ટ્રેકિંગ (CoWIN એપ્લિકેશન) દ્વારા 2.2 અબજથી વધુ ડોઝ પણ પૂરા પાડ્યા. વધુમાં ભારતે રસી મૈત્રી પહેલ હેઠળ ડઝનબંધ દેશોમાં દવાઓ અને રસીઓ મોકલીને વિશ્વની વૈશ્વિક ફાર્મસી તરીકે સેવા આપી.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
