શિરોમણી અકાલી દળના પ્રમુખ અને પંજાબના પૂર્વ નાયબ મુખ્યમંત્રી સુખબીર સિંઘ બાદલ પર ગુરુવારે, 13 ઑગસ્ટે મહારાષ્ટ્રના નાંદેડમાં હુમલાનો પ્રયાસ થયો. તખ્ત શ્રી હઝૂર સાહિબ ખાતે માતા સાહિબ ગુરુદ્વારા નજીક એક નિહંગ વ્યક્તિએ કિરપાણ જેવા ધારદાર હથિયારથી તેમના પર હુમલો કરવાનો પ્રયાસ કર્યો હતો. સુરક્ષાકર્મીઓની તાત્કાલિક કાર્યવાહીથી મોટો હુમલો ટળી ગયો, જોકે બાદલના હાથમાં ઈજા થઈ હતી.
ઘટના બાદ સુખબીર બાદલને સારવાર માટે તાત્કાલિક યશોસાઈ હોસ્પિટલ લઈ જવામાં આવ્યા હતા. હાલ તેમની તબિયત સ્થિર હોવાનું સામે આવ્યું છે. પોલીસે હુમલાખોરને કસ્ટડીમાં લઈને હુમલાના કારણ અંગે તપાસ શરૂ કરી છે.
બપોરે 1:30 વાગ્યે બની ઘટના
પ્રાપ્ત માહિતી મુજબ ઘટના બપોરે આશરે 1:30 વાગ્યે બની હતી. સુખબીર બાદલ ગુરુદ્વારા તરફ જઈ રહ્યા હતા ત્યારે એક વ્યક્તિ અચાનક તેમની નજીક પહોંચ્યો અને કિરપાણથી હુમલો કરવાનો પ્રયાસ કર્યો.
બાદલની સુરક્ષામાં તહેનાત સુરક્ષાકર્મીઓએ તરત જ વચ્ચે પડી હુમલાખોરને રોક્યો હતો. આ દરમિયાન બાદલના હાથમાં ઈજા થઈ હતી. ઘટનામાં તેમની સુરક્ષામાં તહેનાત પોલીસ ઇન્સ્પેક્ટર સંતોષ કેન્દ્રે પણ ઈજાગ્રસ્ત થયા હોવાનું જાણવા મળ્યું છે.
CCTV ફૂટેજની તપાસ કરી રહી છે નાંદેડ પોલીસ
હુમલા બાદ નાંદેડ પોલીસે સમગ્ર વિસ્તારને સુરક્ષા હેઠળ લઈ તપાસ શરૂ કરી હતી. ઘટનાસ્થળ અને આસપાસ લગાવવામાં આવેલા CCTV કેમેરાના ફૂટેજની તપાસ કરવામાં આવી રહી છે.
પોલીસ એ જાણવાનો પ્રયાસ કરી રહી છે કે હુમલાખોરે અગાઉથી કોઈ યોજના બનાવી હતી કે પછી અચાનક હુમલો કર્યો હતો. હુમલા પહેલા તેની હિલચાલ અને અન્ય કોઈ વ્યક્તિ સાથે સંપર્ક હતો કે નહીં તે અંગે પણ તપાસ કરવામાં આવી રહી છે.
હુમલાખોરની ઓળખ જસપાલ સિંઘ તરીકે
પોલીસે હુમલાખોરની ઓળખ જસપાલ સિંઘ તરીકે કરી છે. રિપોર્ટ્સ અનુસાર તે નિહંગ છે અને છેલ્લા આશરે બે વર્ષથી ગુરુદ્વારા સાથે સંકળાયેલો હતો. નાંદેડ પોલીસે તેને ઘટનાસ્થળેથી જ કાબૂમાં લઈ ધરપકડ કરી હતી. જોકે, તેણે સુખબીર બાદલને કેમ નિશાન બનાવ્યા તે અંગે હજુ સ્પષ્ટ માહિતી સામે આવી નથી.
પોલીસ તેની પૂછપરછ કરી રહી છે અને હુમલા પાછળ કોઈ વ્યક્તિગત, ધાર્મિક, રાજકીય કે અન્ય કારણ જવાબદાર છે કે નહીં તેની તપાસ ચાલી રહી છે.
હુમલા સમયે હરિસિમરત કૌર બાદલ પણ હાજર
ઘટના સમયે સુખબીર સિંઘ બાદલ સાથે તેમનાં પત્ની અને શિરોમણી અકાલી દળનાં સાંસદ હરિસિમરત કૌર બાદલ પણ હાજર હતાં. હુમલામાં તેઓ સુરક્ષિત રહ્યા છે. હુમલા બાદ સામે આવેલા દૃશ્યોમાં સુખબીર બાદલના જમણા હાથ પર ભગવા રંગનું કપડું બાંધેલું જોવા મળ્યું હતું. ત્યારબાદ તેમને સારવાર માટે હોસ્પિટલ લઈ જવામાં આવ્યા હતા.
CM દેવેન્દ્ર ફડણવીસે માગ્યો ઘટનાનો રિપોર્ટ
મહારાષ્ટ્રના મુખ્યમંત્રી દેવેન્દ્ર ફડણવીસે નાંદેડના પોલીસ અધિક્ષક પાસેથી સમગ્ર ઘટનાની માહિતી મેળવી હતી.
તેમણે પોલીસને હુમલાનો હેતુ અને સમગ્ર ઘટનાક્રમની વિગતવાર તપાસ કરવા સૂચના આપી હતી. ફડણવીસે સુખબીર બાદલ સાથે ફોન પર વાત કરીને તેમની તબિયત અંગે પણ માહિતી મેળવી હોવાનું સામે આવ્યું છે.
સુખબીર બાદલ પર અગાઉ પણ થઈ ચૂક્યો છે હુમલાનો પ્રયાસ
સુખબીર સિંઘ બાદલ પર હુમલાનો આ પહેલો પ્રયાસ નથી. અગાઉ 4 ડિસેમ્બર 2024ના રોજ અમૃતસરના સુવર્ણ મંદિરમાં પણ તેમના પર હુમલાનો પ્રયાસ થયો હતો.
તે સમયે બાદલ અકાલ તખ્ત દ્વારા આપવામાં આવેલી ધાર્મિક સજા હેઠળ સેવાદાર તરીકે સેવા આપી રહ્યા હતા. એક હુમલાખોરે તેમની તરફ ગોળી ચલાવવાનો પ્રયાસ કર્યો હતો, પરંતુ સુરક્ષાકર્મીઓ અને ત્યાં હાજર લોકોએ હુમલાખોરને તરત જ કાબૂમાં લઈ લીધો હતો. તે ઘટનામાં સુખબીર બાદલને કોઈ ઈજા થઈ નહોતી.
નાંદેડ હુમલા પાછળનું કારણ હજુ રહસ્ય
નાંદેડમાં થયેલા તાજા હુમલા બાદ ફરી એકવાર સુખબીર બાદલની સુરક્ષાને લઈને પ્રશ્નો ઉભા થયા છે. ગુરુદ્વારા જેવા ધાર્મિક સ્થળ નજીક હુમલાની ઘટના બનતાં પોલીસે સુરક્ષા વ્યવસ્થાની પણ સમીક્ષા શરૂ કરી છે.
હાલ હુમલાખોર જસપાલ સિંઘ પોલીસ કસ્ટડીમાં છે અને તેની પૂછપરછ ચાલુ છે. પોલીસ હુમલા પાછળનું ચોક્કસ કારણ, આરોપીની અગાઉની પ્રવૃત્તિઓ અને ઘટનામાં અન્ય કોઈની સંડોવણી છે કે નહીં તે અંગે તપાસ કરી રહી છે. હાલ ઉપલબ્ધ માહિતી મુજબ સુખબીર સિંઘ બાદલની તબિયત સ્થિર છે અને તેમને થયેલી હાથની ઈજાની સારવાર કરવામાં આવી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
