દિલ્હીના લાલ કિલ્લા મેટ્રો સ્ટેશન પાસે થયેલો વિસ્ફોટ રાજધાનીને હચમચાવી ગયો છે. હ્યુન્ડાઈ i20 કારમાં થયેલા આ જોરદાર બ્લાસ્ટમાં 12 લોકોનાં મોત થયા છે અને અનેક લોકો ઘાયલ થયા છે. પોલીસના પ્રારંભિક તપાસ મુજબ, આ કાર જમ્મુ-કાશ્મીરના પુલવામાનો રહેવાસી ડૉક્ટર ઉમર મોહમ્મદ ચલાવી રહ્યો હતો, જે CCTV ફૂટેજમાં સ્પષ્ટ રીતે કાર ચલાવતા દેખાયો હતો. વિસ્ફોટ એટલો તીવ્ર હતો કે આસપાસના 50 મીટર વિસ્તાર સુધી કંક્રીટ ફાટીને ઉડી ગઈ, અને નજીકની ગાડીઓમાં આગ લાગી ગઈ.
આ ઘટનાને ગંભીરતાથી લઈ કેન્દ્રીય ગૃહમંત્રી અમિત શાહે તાત્કાલિક ઉચ્ચસ્તરીય બેઠક બોલાવી હતી. બેઠકમાં ગૃહ સચિવ ગોવિંદ મોહન, ઈન્ટેલિજન્સ બ્યુરો (IB) ડિરેક્ટર તપન ડેકા, દિલ્હી પોલીસ કમિશનર સતીશ ગોલચા અને NIA ડિરેક્ટર જનરલ સદાનંદ વસંત દાતે હાજર રહ્યા હતા, જ્યારે જમ્મુ-કાશ્મીરના DGP નલિન પ્રભાત વર્ચ્યુઅલી જોડાયા હતા. બેઠક દરમિયાન અમિત શાહે તમામ એજન્સીઓને સ્પષ્ટ આદેશ આપ્યો કે “આ ઘટનામાં સામેલ દરેક ગુનેગારને શોધી કાઢો અને તેમને કાયદાના કટઘરામાં લાવો.” તેમણે કડક શબ્દોમાં કહ્યું કે “આ કૃત્યમાં સામેલ દરેક વ્યક્તિએ પૂરો હિસાબ ચૂકવવો પડશે.” બાદમાં શાહે સોશિયલ મીડિયા પ્લેટફોર્મ ‘X’ પર પણ આ બેઠકની વિગતો જાહેર કરી અને જણાવ્યું કે દિલ્હીની સુરક્ષા માટે કોઈપણ પ્રકારની ઢિલાઈ સ્વીકારવામાં નહીં આવે.
Chaired review meetings on the Delhi car blast with the senior officials. Instructed them to hunt down each and every culprit behind this incident. Everyone involved in this act will face the full wrath of our agencies. pic.twitter.com/8UO2PYCvoh
— Amit Shah (@AmitShah) November 11, 2025
પોલીસે આ કેસમાં ગેરકાયદેસર પ્રવૃત્તિઓ અટકાવ કાયદો (UAPA) અને વિસ્ફોટક કાયદા હેઠળ FIR નોંધાવી છે, અને આ ઘટનાને આતંકી હુમલો ગણાવવાની દિશામાં તપાસ ચાલી રહી છે. દિલ્હી પોલીસે અને NIAની સંયુક્ત ટીમોએ શહેરમાં અનેક જગ્યાઓ પર દરોડા પાડ્યા છે, ખાસ કરીને લાલ કિલ્લા વિસ્તાર, કાશ્મીરી ગેટ, અને ઉત્તર પૂર્વી દિલ્હીના કેટલાક સંવેદનશીલ વિસ્તારોમાં.
તપાસ એજન્સીઓ હવે ડૉ. ઉમર મોહમ્મદના નેટવર્ક, તેના મોબાઈલ રેકોર્ડ્સ અને વિદેશી સંપર્કોની પણ તપાસ કરી રહી છે. સુરક્ષા સૂત્રોનું કહેવું છે કે આ હુમલામાં કોઈ સંગઠિત આતંકી મોડ્યુલની સંડોવણી હોવાની શક્યતા છે, જે પાકિસ્તાનથી ફંડિંગ અને માર્ગદર્શન લઈ રહ્યું હતું.
હાલ સમગ્ર લાલ કિલ્લા વિસ્તારને સુરક્ષા ઘેરામાં લઈ લેવામાં આવ્યો છે, અને બોમ્બ ડિસ્પોઝલ સ્ક્વોડ તથા ફોરેન્સિક ટીમો દ્વારા વિસ્તારની તપાસ ચાલી રહી છે. દિલ્હી સરકારે પણ મૃતકોના પરિવારજનોને વળતર આપવાની અને ઘાયલોની સંપૂર્ણ સારવારની જાહેરાત કરી છે. આ વિસ્ફોટ પછી રાજધાનીમાં સુરક્ષા ચેતવણીના સ્તરને “હાઈ એલર્ટ” પર રાખવામાં આવ્યું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
