સેન્ટ્રલ બ્યુરો ઓફ ઇન્વેસ્ટિગેશન (CBI)એ બિઝનેસમેન અનિલ અંબાણીના પુત્ર જય અનમોલ અંબાણી વિરુદ્ધ યુનિયન બેન્ક ઓફ ઇન્ડિયાને થયેલી ₹228.06 કરોડની કથિત છેતરપિંડીના આરોપોમાં FIR દાખલ કરી છે. બેન્કે દાખલ કરેલી ફરિયાદના આધારે કરવામાં આવેલી આ કાર્યવાહી અનુસાર, અંબાણી પરિવાર સાથે સંકળાયેલી ગ્રુપ કંપની રિલાયન્સ હોમ ફાઇનાન્સ લિમિટેડ (RHFL)એ બેન્ક પાસેથી લીધેલી લોનની ચુકવણીમાં ચૂકો કર્યો હતો. ફરિયાદમાં આરોપ મૂકાયો છે કે RHFL દ્વારા લઈ દેવાયેલા ભંડોળનો ઉપયોગ નિર્ધારિત વ્યવસાયિક હેતુઓ માટે ન કરીને તેનો ડાયવર્ઝન અને દુરુપયોગ કરવામાં આવ્યો હતો, જેના કારણે બેન્કને ભારે નાણાકીય નુકસાન થયું.
બેન્ક મુજબ, મુંબઈની SCF શાખાએ RHFLને ₹450 કરોડની ક્રેડિટ સુવિધા મંજૂર કરી હતી, જેમાં નાણાકીય શિસ્ત જાળવવાની, હપ્તાઓ તથા વ્યાજ સમયસર ચૂકવવાની અને તમામ આવક બેન્ક ખાતા મારફતે રૂટ કરવાની શરતો સામેલ હતી. પરંતુ કંપની સમયસર ચુકવણી કરવામાં નિષ્ફળ ગઈ અને 30 સપ્ટેમ્બર 2019એ એકાઉન્ટને NPA જાહેર કરવું પડ્યું. પરિસ્થિતિ ગંભીર બનતાં બેન્કે Grant Thornton દ્વારા એપ્રિલ 2016 થી જૂન 2019 સુધીનો ફોરેન્સિક ઓડિટ કરાવ્યો હતો.
ઓડિટમાં ખુલ્યું કે RHFLએ ઉધાર લીધેલા ભંડોળને નિર્ધારિત હેતુઓ સિવાય અન્ય રસ્તાઓ પર વાળ્યું હતું. ફંડ ડાયવર્ઝન, બુક એડજસ્ટમેન્ટ, આંતરિક ખાતાઓમાં ગડબડીઓ અને નાણાકીય અનિયમિતતાઓના પુરાવા સામે આવ્યા. બેન્કના આક્ષેપ મુજબ, તે સમયના કંપનીના પ્રમોટરો અને ડિરેક્ટરો, જેમાં જય અનમોલ અંબાણીનો સમાવેશ થાય છે, દ્વારા ખાતાઓમાં હેરાફેરી અને છેતરપિંડીપૂર્વક નાણાંનો દુરુપયોગ કરવામાં આવ્યો. આ ગેરવહીવટને કારણે બેન્કને કુલ ₹228 કરોડનું નુકસાન થયું હોવાનું બેન્કનું કહેવું છે.
CBIએ બેન્કની ફરિયાદ અને ફોરેન્સિક ઓડિટના પરિણામોને આધારે હવે સમગ્ર કેસની વિગતવાર તપાસ શરૂ કરી છે, જેમાં ભંડોળ ક્યાં અને કેવી રીતે વપરાયું, કોને લાભ મળ્યો અને ગેરવહીવટમાં કોનો સીધો સમાવેશ છે તેની તપાસ કરવામાં આવશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
