જમ્મુ-કાશ્મીરમાં દાનના નામે મોટા પાયે છેતરપિંડીનો ચોંકાવનારો કેસ સામે આવ્યો છે. યુદ્ધગ્રસ્ત ઈરાનના નાગરિકોને મદદ કરવાનો બહાનો બનાવીને એક નકલી ચેરિટી નેટવર્ક દ્વારા આશરે ₹17.91 કરોડની રકમ એકત્રિત કરવામાં આવી હતી. જેમાં રોકડ, સોનાના ઘરેણાં અને અન્ય કિંમતી ચીજવસ્તુઓનો સમાવેશ થાય છે. જોકે, તપાસમાં ખુલ્યું છે કે આ ભંડોળ વાસ્તવિક જરૂરિયાતમંદ લોકો સુધી પહોંચ્યું જ નથી.
આ મામલે Intelligence Bureau (IB)એ એલર્ટ જારી કર્યું છે અને સમગ્ર નેટવર્કની ગહન તપાસ શરૂ કરવામાં આવી છે. ગુપ્તચર એજન્સીઓના પ્રાથમિક તારણ મુજબ, આ રકમનો મોટો હિસ્સો અન્યત્ર ડાયવર્ટ કરવામાં આવ્યો હોવાની આશંકા છે. તપાસ હવે સંભવિત આતંકવાદી ફંડિંગ અને ઇન્ફ્લુઅન્સ નેટવર્કના દ્રષ્ટિકોણથી પણ કરવામાં આવી રહી છે.
આ કેસમાં National Investigation Agency (NIA) પણ જોડાઈ છે અને હવાલા નેટવર્ક, નાણાકીય પ્રવાહ અને સંકળાયેલા લોકોના કનેક્શનની તપાસ કરી રહી છે. ગૃહ મંત્રાલયના માર્ગદર્શન હેઠળ દેશભરમાં આવા નકલી ચેરિટી નેટવર્ક્સ સામે ચેતવણી આપવામાં આવી છે.
તપાસમાં જાણવા મળ્યું છે કે આ ભંડોળ એક જ સ્થળે નહીં પરંતુ કાશ્મીરના વિવિધ જિલ્લાઓમાં ફેલાયેલા સંકલિત નેટવર્ક દ્વારા એકત્રિત કરવામાં આવ્યું હતું. બડગામમાં આશરે ₹9.5 કરોડ, બારામુલ્લામાં ₹4 કરોડ અને શ્રીનગરમાં ₹2 કરોડ સુધીની રકમ ઉઘરાવવામાં આવી હતી. મસ્જિદોમાં જાહેરાતો, ઘર-ઘર જઈને અપીલો અને સ્ટોલ લગાવીને લોકો પાસેથી દાન એકત્ર કરવામાં આવ્યું હતું.
ગુપ્તચર એજન્સીઓ આ મોડેલને 2016માં બુરહાન વાનીની હત્યા બાદ ઉભરી આવેલા ‘બરકતી મોડલ’ સાથે જોડીને જોઈ રહી છે. આ મોડેલમાં ધાર્મિક અને ભાવનાત્મક અપીલો દ્વારા લોકો પાસેથી મોટી રકમ એકત્ર કરવામાં આવે છે, પરંતુ તેની યોગ્ય દેખરેખ હોતી નથી. અગાઉ દક્ષિણ કાશ્મીરના સર્જન અહેમદ વાગે ઉર્ફે ‘બરકતી’ના કેસમાં પણ આવા જ આરોપો સામે આવ્યા હતા.
આ કૌભાંડનો સૌથી ચિંતાજનક પાસો એ છે કે ગરીબ અને મધ્યમ વર્ગના લોકોએ પણ પોતાની બચત, બાળકોની ઈદી, ઝકાત, લગ્ન માટેના પૈસા અને ઘરેલુ સામાન દાનમાં આપી દીધા હતા. ઘણા કિસ્સાઓમાં લોકો પોતાની વર્ષોની કમાણી ગુમાવી બેઠા છે.
સુરક્ષા એજન્સીઓએ લોકોને ચેતવણી આપી છે કે કોઈપણ ચેરિટી અથવા ભંડોળ અભિયાનમાં દાન આપતા પહેલા તેની સંપૂર્ણ ચકાસણી કરવી જરૂરી છે. ગયા વર્ષે ઇઝરાયલ પેલેસ્ટાઇન સંઘર્ષ દરમિયાન પણ આવા નકલી નેટવર્ક્સ સામે આવ્યા હતા, જે ભાવનાત્મક અપીલો દ્વારા લોકો પાસેથી પૈસા ઉઘરાવતા હતા.
વિશ્લેષકોના મતે, આ ઘટના માત્ર આર્થિક છેતરપિંડી જ નહીં પરંતુ રાષ્ટ્રીય સુરક્ષા માટે પણ ગંભીર ચિંતા ઉભી કરે છે. આવી ઘટનાઓને રોકવા માટે કડક દેખરેખ અને જનજાગૃતિ ખૂબ જ જરૂરી બની ગઈ છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
