યુનાઇટેડ નેશન્સમાં ભારતે યુક્રેન યુદ્ધ અંગે સ્પષ્ટ અને માનવતા-કેન્દ્રિત નિવેદન આપતાં જણાવ્યું કે યુક્રેનમાં નિર્દોષ નાગરિકોની હત્યા તદ્દન અસ્વીકાર્ય છે અને કોઈપણ પરિસ્થિતિમાં તેનો ન્યાય થઈ શકતો નથી. ભારતના કાયમી પ્રતિનિધિ પર્વથનેની હરીશે યુએનમાં કહ્યું કે ભારત યુક્રેનની પરિસ્થિતિ અંગે સતત ચિંતિત રહ્યું છે અને હિંસા કે યુદ્ધ કોઈપણ સમસ્યાનું સમાધાન આપી શકતા નથી. તેમણે ભારપૂર્વક જણાવ્યું કે યુદ્ધનો અંત લાવવો તમામ માટે હિતકારક છે અને એ જ એકમાત્ર માર્ગ છે જે વિશ્વને સ્થિરતા તરફ લઈ જઈ શકે છે.
ભારતે સ્પષ્ટ કર્યું કે સંવાદ અને વ્યૂહનીતિ જ શાંતિ સ્થાપિત કરવાની ચાવી છે. હરીશે કહ્યું કે, આ માર્ગ કઠિન અને લાંબો હોઈ શકે છે, પરંતુ દરેક પક્ષની સક્રિય ભાગીદારી અને પ્રતિબદ્ધતા કાયમી અને ટકાઉ શાંતિ લાવી શકે છે. ભારતે આ દિશામાં કરવામાં આવેલા સકારાત્મક પ્રયાસોને આવકાર્યા છે અને ખાસ કરીને તાજેતરમાં અલાસ્કામાં અમેરિકાના પ્રમુખ ડોનાલ્ડ ટ્રમ્પ અને રશિયાના પ્રમુખ વ્લાદિમીર પુતિન વચ્ચે યોજાયેલી શિખર બેઠકનું સમર્થન કર્યું છે. સાથે જ ભારતે નોંધ્યું કે ટ્રમ્પ અને યુક્રેનના પ્રમુખ વોલોદિમીર ઝેલેન્સ્કી વચ્ચેની બેઠક અને ચર્ચાઓ પણ અત્યંત મહત્વપૂર્ણ છે, કારણ કે આ પ્રકારની સંવાદ પ્રક્રિયા જ યુદ્ધના અંત માટે માર્ગ મોકળો કરી શકે છે.
ભારતે આ સાથે જણાવ્યું કે વડાપ્રધાન નરેન્દ્ર મોદી પણ આ સમગ્ર પરિસ્થિતિ અંગે સક્રિય છે અને સતત રશિયાના પ્રમુખ પુતિન, યુક્રેનના પ્રમુખ ઝેલેન્સ્કી તેમજ યુરોપના અનેક નેતાઓ સાથે સીધો સંપર્ક સાધી રહ્યા છે. ભારતે વિશ્વાસ વ્યક્ત કર્યો કે આ વ્યૂહાત્મક પ્રયાસો અંતે યુક્રેન યુદ્ધના અંત તરફ દોરી જશે અને કાયમી શાંતિ સ્થાપિત કરશે.
ભારતે ખાસ કરીને ગ્લોબલ સાઉથના દેશોની ચિંતાઓને ઉઠાવી. ભારતે કહ્યું કે આ યુદ્ધને કારણે ક્રૂડ ઓઈલના ભાવોમાં થયેલી અતિરિક્ત વૃદ્ધિ, ખોરાક અને ઊર્જાના ભાવોમાં ઉછાળો અને પુરવઠાની અછતને કારણે ગ્લોબલ સાઉથના દેશોને સૌથી વધુ અસર થઈ છે. આ દેશો પહેલેથી જ આર્થિક પડકારોનો સામનો કરી રહ્યા હતા અને યુદ્ધના કારણે તેમની સમસ્યાઓ વધુ ગંભીર બની છે. ભારતે યુએનમાં સ્પષ્ટ કર્યું કે આ દેશોના અવાજને અવગણવો ન જોઈએ અને તેમની ચિંતાઓને ગંભીરતાથી ઉકેલવા માટે વૈશ્વિક સમુદાયે પ્રયત્ન કરવા જોઈએ.
ભારતનો અભિગમ હંમેશાં માનવતા કેન્દ્રિત રહ્યો છે. ભારતે યુક્રેનને માનવીય સહાયતા પહોંચાડવામાં પહેલ કરી છે, જેમાં દવાઓ, જરૂરી સાધનો અને અન્ય સહાય સામેલ છે. સાથે જ ગ્લોબલ સાઉથના દેશોને પણ આર્થિક સમર્થન આપ્યું છે જેથી તેઓ આ કઠિન પરિસ્થિતિમાંથી બહાર આવી શકે. ભારતે કહ્યું કે અમારા કેટલાક પડોશી દેશો પણ આર્થિક સંકટમાંથી પસાર થઈ રહ્યા છે અને તેમને મદદરૂપ થવા માટે ભારત હંમેશાં આગળ રહ્યું છે.
ભારતે અંતમાં પુનરાવર્તન કર્યું કે યુક્રેન યુદ્ધનો તાત્કાલિક અંત લાવવો માત્ર યુરોપ જ નહીં પરંતુ સમગ્ર વિશ્વના હિતમાં છે. વડાપ્રધાન નરેન્દ્ર મોદીએ અનેક વખત સ્પષ્ટ કર્યું છે કે આ યુદ્ધનો યુગ નથી, અને આજના સમયમાં વિકાસ, સહકાર અને શાંતિ પર જ ભાર મૂકવો જોઈએ. ભારતે આંતરરાષ્ટ્રીય સમુદાયને સંદેશ આપ્યો કે શાંતિ જ એ રસ્તો છે જે ભવિષ્યને સુરક્ષિત બનાવી શકે છે અને વિશ્વને એક નવા દિશામાં આગળ લઈ જઈ શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
