ગુજરાતના પૂર્વ ગૃહ રાજ્યમંત્રી તથા હાલમાં સંઘ પ્રદેશ દાદરા અને નગર હવેલી તેમજ દમણ અને દીવના પ્રશાસક તરીકે ફરજ બજાવી રહેલા પ્રફુલ પટેલના પત્ની ભાવનાબેન પટેલનું દુઃખદ નિધન થયું છે. તેમના અવસાનના સમાચાર સામે આવતા રાજકીય અને સામાજિક વર્તુળોમાં શોકની લાગણી ફેલાઈ ગઈ છે.
ભાવનાબેન પટેલના નિધન પર દેશના વડાપ્રધાન નરેન્દ્ર મોદીએ પણ ઊંડી શોક સંવેદના વ્યક્ત કરી છે. તેમણે સોશિયલ મીડિયા પર સંદેશ પાઠવી પરિવાર પ્રત્યે સાંત્વના વ્યક્ત કરી અને પરમાત્માને દિવંગત આત્માને શાંતિ અર્પવા પ્રાર્થના કરી છે.
PM મોદીએ વ્યક્ત કર્યો શોક
વડાપ્રધાન નરેન્દ્ર મોદીએ પોતાના સંદેશમાં લખ્યું કે સંઘ પ્રદેશ દાદરા અને નગર હવેલી તથા દમણ અને દીવના પ્રશાસક પ્રફુલભાઈ પટેલના ધર્મપત્ની ભાવનાબેન પટેલના અવસાનના સમાચારથી તેમને દુઃખ થયું છે.
PM મોદીએ વધુમાં જણાવ્યું કે વર્ષોથી આ પરિવાર સાથે તેમનો નિકટનો પરિચય અને ઘનિષ્ઠ સંબંધ રહ્યો છે. આ દુઃખની ઘડીમાં તેઓ પરિવારજનોને હૃદયપૂર્વક સાંત્વના પાઠવે છે અને પરમાત્મા સ્વર્ગસ્થ આત્માને શાંતિ આપે તેવી પ્રાર્થના કરે છે.
સંઘ પ્રદેશ દાદરા અને નગર હવેલી અને દમણ અને દીવના પ્રશાસક શ્રી પ્રફુલભાઈ પટેલના ધર્મપત્ની શ્રીમતી ભાવનાબેન પટેલના અવસાનના સમાચારથી દુઃખ થયું. વર્ષોથી આ પરિવાર સાથે મારો નિકટનો પરિચય અને ઘનિષ્ઠ સંબંધ રહ્યો છે.
આ દુઃખની ઘડીમાં હું પરિવારજનોને હૃદયપૂર્વક સાંત્વના પાઠવું છું અને…
— Narendra Modi (@narendramodi) June 22, 2026
કોણ છે પ્રફુલ પટેલ?
પ્રફુલ પટેલ ગુજરાતના જાણીતા રાજકીય નેતા તરીકે ઓળખાય છે. તેઓ ગુજરાત સરકારમાં પૂર્વ ગૃહ રાજ્યમંત્રી રહી ચૂક્યા છે અને હાલમાં દાદરા-નગર હવેલી તેમજ દમણ-દીવના પ્રશાસક તરીકે મહત્વપૂર્ણ જવાબદારી સંભાળી રહ્યા છે.
તેમના પિતા ખોડાભાઈ પટેલ રાષ્ટ્રીય સ્વયંસેવક સંઘ (RSS) સાથે સક્રિય રીતે જોડાયેલા હતા. આ કારણે પ્રફુલ પટેલ અને નરેન્દ્ર મોદી વચ્ચે વર્ષોથી વ્યક્તિગત અને રાજકીય સંબંધો રહ્યા હોવાનું માનવામાં આવે છે.
2007માં પ્રથમ વખત ધારાસભ્ય બન્યા
પ્રફુલ પટેલે વર્ષ 2007ની ગુજરાત વિધાનસભા ચૂંટણીમાં હિંમતનગર બેઠક પરથી ચૂંટણી લડી હતી. આ ચૂંટણીમાં તેમણે કોંગ્રેસના દિગ્ગજ નેતા સી. કે. પટેલને હરાવીને પ્રથમ વખત ધારાસભ્ય તરીકે વિજય મેળવ્યો હતો. આ જીત બાદ તેઓ ઝડપથી રાજ્યની રાજનીતિમાં મહત્વનું સ્થાન પ્રાપ્ત કરવામાં સફળ રહ્યા હતા.
અમિત શાહના તડીપાર દરમિયાન સંભાળ્યો ગૃહ વિભાગ
વર્ષ 2010માં એન્કાઉન્ટર કેસના વિવાદને કારણે તત્કાલીન ગૃહ રાજ્યમંત્રી અમિત શાહને ગુજરાતની બહાર રહેવાનો આદેશ આપવામાં આવ્યો હતો. તે સમયગાળા દરમિયાન રાજ્ય સરકાર માટે ગૃહ વિભાગનું સંચાલન એક મોટો પડકાર બની ગયો હતો. ત્યારે મુખ્યમંત્રી તરીકે કાર્યરત નરેન્દ્ર મોદીએ પ્રફુલ પટેલ પર વિશ્વાસ મૂકીને તેમને રાજ્યના ગૃહ રાજ્યમંત્રી તરીકે જવાબદારી સોંપી હતી.
રાજકીય વિશ્લેષકોના મતે, એ સમયગાળા દરમિયાન પ્રફુલ પટેલે ગૃહ વિભાગમાં મહત્વપૂર્ણ ભૂમિકા ભજવી હતી અને સરકાર માટે ડેમેજ કંટ્રોલની કામગીરી સંભાળી હતી.
2012 બાદ સક્રિય રાજકારણથી દૂર
2012ની ગુજરાત વિધાનસભા ચૂંટણીમાં પ્રફુલ પટેલને પરાજયનો સામનો કરવો પડ્યો હતો. ત્યારબાદ તેઓ રાજ્યના સક્રિય રાજકારણથી થોડા દૂર થયા હતા. પછી કેન્દ્ર સરકારે તેમને દાદરા-નગર હવેલી અને દમણ-દીવના પ્રશાસક તરીકે મહત્વપૂર્ણ જવાબદારી સોંપી હતી, જ્યાં તેઓ હાલમાં પણ સેવા આપી રહ્યા છે.
રાજકીય વર્તુળોમાં શોકની લાગણી
ભાવનાબેન પટેલના નિધનના સમાચાર બાદ રાજકીય આગેવાનો, સામાજિક કાર્યકરો અને વિવિધ ક્ષેત્રના લોકો દ્વારા શોક વ્યક્ત કરવામાં આવી રહ્યો છે.
પરિવાર માટે આ એક મોટી વ્યક્તિગત ક્ષતિ છે. અનેક રાજકીય આગેવાનો અને શુભેચ્છકોએ પ્રફુલ પટેલ તથા તેમના પરિવારને આ દુઃખ સહન કરવાની શક્તિ મળે તેવી પ્રાર્થના કરી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
