રાજકોટ મહાનગરપાલિકાની જંગલેશ્વર વિસ્તારમાં ફેબ્રુઆરી 2026માં હાથ ધરાયેલી ડિમોલિશન ડ્રાઈવ હવે ખર્ચના બિલોને લઈને વિવાદમાં આવી છે. નવી બનેલી સ્ટેન્ડિંગ કમિટીએ આ કામગીરી દરમિયાન થયેલા આશરે ₹27 લાખના ભોજન બિલને અટકાવી દીધું છે. કમિટીનું કહેવું છે કે આ ખર્ચ માટે જરૂરી ટેન્ડર પ્રક્રિયાનું પાલન કરવામાં આવ્યું નહોતું અને રાજ્ય સરકારના નાણાં વિભાગના નિયમોનું પણ ઉલ્લંઘન થયું હોવાની આશંકા છે.
આ સમગ્ર મામલે રાજકોટ મહાનગરપાલિકાએ ડિમોલિશન ડ્રાઈવ સંબંધિત આશરે ₹3 કરોડના વિવિધ ખર્ચની તપાસ માટે 5 સભ્યોની વિશેષ તપાસ ટીમની રચના કરી છે. આ SITની અધ્યક્ષતા ડેપ્યુટી મ્યુનિસિપલ કમિશનર કરી રહ્યા છે. ટીમ ભોજન, પીવાના પાણી, ટેન્ટ, આશ્રય વ્યવસ્થા, વિડીયોગ્રાફી, ડ્રોન સર્વેલન્સ સહિતના તમામ ખર્ચની ચકાસણી કરશે.
તપાસ પૂર્ણ ન થાય ત્યાં સુધી કેટલાક બાકી બિલોની ચૂકવણી અટકાવી દેવામાં આવી છે. SIT તપાસ કરશે કે ખર્ચની પ્રક્રિયામાં નિયમોનું પાલન થયું હતું કે નહીં, બિલો કયા વિભાગ મારફતે પસાર કરાયા, કોન્ટ્રાક્ટ કઈ રીતે આપવામાં આવ્યા અને ક્યાંય નાણાકીય ગેરરીતિ થઈ છે કે નહીં.
તપાસ હેઠળ આવેલા ભોજનના બિલમાં 13,390 સ્પેશિયલ લંચ પ્લેટ, 21,310 કપ ચા તેમજ કાજુ કતરી, જલેબી અને ખજૂર રોલ જેવી મીઠાઈઓનો સમાવેશ થાય છે. અધિકારીઓના જણાવ્યા મુજબ, આ નાસ્તો અને ભોજન ડિમોલિશન કામગીરીમાં જોડાયેલા કર્મચારીઓ તેમજ સ્થળ પર હાજર મીડિયા પ્રતિનિધિઓ માટે મગાવવામાં આવ્યા હતા. જોકે, બિલની રકમ અને પ્રક્રિયાને લઈને હવે સવાલો ઊભા થયા છે.
ભોજન ઉપરાંત પીવાના પાણીના ખર્ચને લઈને પણ વિવાદ ઊભો થયો છે. સ્ટાફ માટે મંગાવવામાં આવેલી 200 એમએલ મિનરલ વોટર બોટલો પાછળ ₹12.4 લાખનું બિલ બનાવવામાં આવ્યું હોવાનું સામે આવ્યું છે. અધિકારીઓના જણાવ્યા પ્રમાણે, કોન્ટ્રાક્ટ હેઠળ મનપાને એક બોટલ ₹8માં પડી હતી, જ્યારે આવી બોટલો હોલસેલ માર્કેટમાં ₹3થી ઓછી કિંમતે અને છૂટકમાં ₹5ની આસપાસ ઉપલબ્ધ હોય છે. આથી પાણીની બોટલના ભાવોમાં પણ ગેરરીતિની આશંકા વ્યક્ત કરવામાં આવી રહી છે.
આ સિવાય ટેન્ટ અને આશ્રય વ્યવસ્થા માટે ₹9.94 લાખ તેમજ વિડીયોગ્રાફી અને ડ્રોન સર્વેલન્સ માટે અંદાજે ₹22 લાખના ખર્ચની પણ તપાસ હાથ ધરવામાં આવી છે. આરોપ છે કે કેટલાક ખર્ચ માટે બજારભાવ કરતાં વધુ રકમ ચૂકવવામાં આવી હોઈ શકે છે. SIT હવે તમામ બિલો, મંજૂરી પ્રક્રિયા, રેટ કોન્ટ્રાક્ટ અને ચુકવણીની ફાઇલોની તપાસ કરશે.
મળતી માહિતી મુજબ, જંગલેશ્વર ડિમોલિશન કામગીરી માટે નવા ટેન્ડર બહાર પાડવાને બદલે વર્ષ 2023ના જૂના રેટ કોન્ટ્રાક્ટનો ઉપયોગ કરવામાં આવ્યો હતો. આ મુદ્દે સ્ટેન્ડિંગ કમિટીએ ગંભીર નોંધ લીધી છે. સ્ટેન્ડિંગ કમિટીના ચેરમેન પરેશ પીપળીયા અને મેયર નેહલ શુક્લાએ જણાવ્યું છે કે માત્ર આ એક બિલ નહીં, પરંતુ વર્ષ 2023થી રાજકોટ મહાનગરપાલિકા દ્વારા ઇસ્યુ કરાયેલા તમામ ટેન્ડરોને હવે સમીક્ષા હેઠળ મૂકવામાં આવ્યા છે.
તેમણે કહ્યું કે સરકારી નાણાંનો દુરુપયોગ અટકાવવો અને ખર્ચમાં પારદર્શિતા લાવવી જરૂરી છે. જો તપાસમાં કોઈ ગેરરીતિ કે બેદરકારી સામે આવશે, તો જવાબદાર અધિકારીઓ અથવા સંબંધિત એજન્સીઓ સામે કાર્યવાહી થઈ શકે છે.
નોંધનીય છે કે ફેબ્રુઆરી 2026માં જંગલેશ્વર વિસ્તારમાં હાથ ધરાયેલી ડિમોલિશન ડ્રાઈવ દરમિયાન કુલ 1,489 ગેરકાયદે બાંધકામો દૂર કરવામાં આવ્યા હતા. આ કાર્યવાહી દ્વારા આશરે ₹350 કરોડની જમીન ખાલી કરાવવામાં આવી હતી. ડિમોલિશન કામગીરી પૂર્ણ થઈ ગઈ, મહાનગરપાલિકાની ચૂંટણી પણ યોજાઈ ગઈ અને નવી બોડીની રચના પણ થઈ ગઈ, પરંતુ હવે કામગીરીના ખર્ચ અને બિલોને લઈને મોટો વિવાદ સર્જાયો છે.
હાલ સમગ્ર મામલો SITની તપાસ હેઠળ છે. તપાસ પૂર્ણ થયા બાદ જ સ્પષ્ટ થશે કે ડિમોલિશન ડ્રાઈવના ખર્ચમાં ખરેખર નાણાકીય ગેરરીતિ થઈ હતી કે નહીં અને જો થઈ હોય તો તેના માટે જવાબદાર કોણ છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
