એન્ફોર્સમેન્ટ ડિરેક્ટોરેટ (ED)એ કફ સિરપના ગેરકાયદેસર વેપારના મોટા રેકેટનો પર્દાફાશ કરતી વિશાળ કાર્યવાહી શરૂ કરી છે. શુક્રવારની સવારે લગભગ 7:30 વાગ્યે લખનઉ ઝોનલ ઓફિસની ટીમોએ ઉત્તર પ્રદેશ, ઝારખંડ અને ગુજરાતમાં એક સાથે 25થી વધુ સ્થળોએ દરોડા પાડ્યા. જાણકારી મુજબ, આ સમગ્ર રેકેટમાં ₹1,000 કરોડથી વધુના ગેરકાયદેસર નાણા વહેચાણમાં સામેલ છે અને ED આ નાણાંકીય ગડબડીની મની લોન્ડરિંગ ઍંગલથી તપાસ કરી રહી છે.
મુખ્ય આરોપીઓ અને EDની કાર્યવાહી
EDના દરોડા જે સ્થળોએ પડ્યા તે મુખ્યત્વે રેકેટના મુખ્ય આરોપી શુભમ જયસ્વાલ, તેના સહયોગીઓ આલોક સિંહ, અમિત સિંહ તેમજ ગેરકાયદેસર રીતે કોડીન આધારિત કફ સિરપ સપ્લાય કરનારા ઉત્પાદનકારો સાથે જોડાયેલા લોકોના છે. આ ઉપરાંત, નાણાંકીય ગડબડીને છુપાવવા તેમની મદદ કરનાર ચાર્ટર્ડ એકાઉન્ટન્ટ વિષ્ણુ અગ્રવાલના લખનઉ સ્થિત પરિસરોમાં પણ EDએ સર્ચ ઑપરેશન ચલાવ્યું.
કયા શહેરોમાં દરોડા પડ્યા?
EDએ એકસાથે દરોડા પાડેલા સ્થળોમાં સમાવેશ થાય છે:
- લખનઉ
- વારાણસી
- જૌનપુર
- સહારનપુર (ઉત્તર પ્રદેશ)
- રાંચી (ઝારખંડ)
- અમદાવાદ (ગુજરાત)
છેલ્લા બે મહિનામાં ઉત્તર પ્રદેશના લખનઉ, વારાણસી, સોનભદ્ર, સહારનપુર અને ગાઝિયાબાદ સહિતના ઘણા જિલ્લાઓમાં કોડીન આધારિત કફ સિરપના ગેરકાયદેસર સંગ્રહ, પરિવહન અને સરહદ પાર સપ્લાય સંબંધિત 30થી વધુ FIR નોંધાઈ હતી. આ FIRના આધારે EDએ મની લોન્ડરિંગ કેસ (ECIR) દાખલ કર્યો.
₹1,000 કરોડથી વધુનો ગેરકાયદેસર ધંધો
તપાસમાં જાણવા મળ્યું છે કે આ સમગ્ર રેકેટ નકલી કંપનીઓ, નકલી સરનામાં અને ફ્રોડ એકાઉન્ટ્સનો ઉપયોગ કરી વિશાળ પ્રમાણમાં કોડીન આધારિત કફ સિરપની ખરીદી-વેચાણ કરતું હતું. આ સિરપને ગેરકાયદેસર રીતે સરહદ પાર પણ સપ્લાય કરવામાં આવતી હતી. ગેરકાયદેસર કમાણીનું મૂલ્ય ₹1,000 કરોડથી વધુ હોવાનું બહાર આવ્યું છે.
મુખ્ય આરોપી દુબઈમાં છુપાયો
આ કેસનો મુખ્ય આરોપી શુભમ જયસ્વાલ હાલ પણ ફરાર છે અને તે દૂબઈમાં છુપાયેલો છે એવી શંકા છે. તેના પિતા ભોલા પ્રસાદની ધરપકડ થઈ ચૂકી છે. ઉત્તર પ્રદેશ પોલીસે અત્યાર સુધીમાં આ કેસમાં 32 લોકોને પકડી લીધા છે.
નકલી સરનામાં અને નકલી પેઢીઓનો ખુલાસો
દરોડા દરમિયાન EDને ઘણા નકલી સરનામાં, નકલી પેઢીઓ અને ફ્રન્ટ કંપનીઓ મળી આવી, જેઓના નામે કફ સિરપની ગેરકાયદેસર ખરીદી તથા વેચાણ કરવામાં આવતું હતું. આ કંપનીઓ માત્ર કાગળ પર જ હતી અને મની લોન્ડરિંગ તથા ગેરકાયદેસર ધંધા માટે વપરાતી હતી.
EDની આ કાર્યવાહી હજુ પણ ચાલુ છે, અને કફ સિરપ રેકેટના વધુ ગુંચવાયેલા નેટવર્કને બહાર લાવવા માટે વધુ દરોડા અને પુછપરછ થવાની શક્યતા છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
