ગુજરાતમાં એસ.ટી. બસ દ્વારા રોજિંદા અપડાઉન કરતા લાખો નોકરિયાતો, વેપારીઓ અને ધંધાર્થીઓ માટે ગુજરાત રાજ્ય માર્ગ વાહન વ્યવહાર નિગમ (GSRTC)એ મહત્વપૂર્ણ નિર્ણય લીધો છે. દૈનિક મુસાફર પાસ યોજનામાં ફેરફાર કરીને મુસાફરોને મળતી ભાડા રાહત વધારીને 50 ટકા સુધી કરવામાં આવી છે.
નાયબ મુખ્યમંત્રી હર્ષ સંઘવીના માર્ગદર્શન હેઠળ GSRTC દ્વારા દૈનિક મુસાફર પાસ યોજનાના નિયમોમાં લોકહિતલક્ષી સુધારો કરવામાં આવ્યો છે. નવા માળખા હેઠળ માસિક અને ત્રિમાસિક પાસ ધારકોને અગાઉની સરખામણીએ ઓછું ભાડું ચૂકવી વધુ દિવસો સુધી મુસાફરી કરવાની સુવિધા મળશે.
માસિક પાસમાં હવે માત્ર 15 દિવસનું ભાડું
અગાઉ માસિક પાસ મેળવવા માટે મુસાફરોને 18 દિવસના મુસાફરી ભાડાની સમકક્ષ રકમ ચૂકવવી પડતી હતી. હવે આ મર્યાદા ઘટાડીને માત્ર 15 દિવસના ભાડા જેટલી કરવામાં આવી છે.
એટલે કે મુસાફર હવે માત્ર 15 દિવસનું ભાડું ચૂકવીને પૂરા 30 દિવસ સુધી GSRTCની બસોમાં પાસ મુજબ મુસાફરી કરી શકશે. આ ફેરફારથી રોજિંદા અપડાઉન કરતા મુસાફરોને સીધી આર્થિક રાહત મળશે.
ત્રિમાસિક પાસમાં 45 દિવસના ભાડામાં 90 દિવસ મુસાફરી
ત્રિમાસિક મુસાફર પાસમાં પણ GSRTCએ નોંધપાત્ર રાહત આપી છે. અગાઉ 90 દિવસની મુસાફરી માટે 54 દિવસનું ભાડું ચૂકવવું પડતું હતું. નવા નિયમ મુજબ હવે માત્ર 45 દિવસનું ભાડું ચૂકવીને 90 દિવસ સુધી મુસાફરી કરી શકાશે.
આ નિર્ણયથી લાંબા સમય માટે નિયમિત મુસાફરી કરતા નોકરિયાતો, વેપારીઓ અને અન્ય દૈનિક મુસાફરોનો પરિવહન ખર્ચ ઘટશે.
2.5 લાખથી વધુ મુસાફરોને સીધો લાભ
GSRTCના આ નિર્ણયથી રાજ્યના આશરે 2.5 લાખથી વધુ દૈનિક મુસાફરોને સીધો આર્થિક ફાયદો થવાની ધારણા છે. ખાસ કરીને રોજગાર કે વ્યવસાય માટે એક શહેરથી બીજા શહેર અથવા તાલુકા-જિલ્લા સ્તરે નિયમિત મુસાફરી કરતા લોકો માટે આ યોજના ઉપયોગી બનશે.
ભાડામાં રાહત વધારવાથી જાહેર પરિવહનનો ઉપયોગ પણ વધે તેવી અપેક્ષા છે. GSRTCના મતે આ નિર્ણય મુસાફરોને સલામત, સુવિધાજનક અને ગુણવત્તાસભર જાહેર પરિવહન સેવા તરફ વધુ પ્રોત્સાહિત કરશે.
રોજિંદા અપડાઉન કરનારાઓના ખર્ચમાં થશે ઘટાડો
પેટ્રોલ-ડીઝલ અને ખાનગી પરિવહનના વધતા ખર્ચ વચ્ચે GSRTCનો સુધારેલો પાસ દર રોજિંદા મુસાફરો માટે રાહતરૂપ બની શકે છે. ખાસ કરીને માસિક પાસમાં 15 દિવસનું ભાડું ચૂકવી 30 દિવસ અને ત્રિમાસિક પાસમાં 45 દિવસનું ભાડું ચૂકવી 90 દિવસ મુસાફરી કરવાની સુવિધાથી મુસાફરી ખર્ચમાં નોંધપાત્ર બચત થશે.
આ રીતે GSRTCની દૈનિક મુસાફર પાસ યોજના હવે નિયમિત મુસાફરો માટે વધુ આકર્ષક અને આર્થિક રીતે લાભદાયી બની છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
