ભરૂચની ઐતિહાસિક જામા મસ્જિદને લઈને ચાલી રહેલો વિવાદ હવે વધુ ઘેરો બનતો જોવા મળી રહ્યો છે. મસ્જિદના મૂળ સ્વરૂપ અને ઐતિહાસિક વારસાને લઈને છેલ્લા કેટલાક મહિનાઓથી ચાલી રહેલા આંદોલનના ભાગરૂપે આજે ભરૂચ શહેરમાં વિશાળ પગપાળા રેલીનું આયોજન કરવામાં આવ્યું છે. ‘રાષ્ટ્રીય ધરોહર સંરક્ષણ સમિતિ’ દ્વારા ચલાવવામાં આવી રહેલા આ અભિયાનમાં મોટી સંખ્યામાં હિન્દુ સમાજના આગેવાનો, સાધુ-સંતો અને વિવિધ સામાજિક સંગઠનો જોડાયા છે.
આંદોલનકારીઓનો દાવો છે કે ઐતિહાસિક સ્મારકો અને રાષ્ટ્રીય ધરોહરની સુરક્ષા માટે આ મુદ્દે વ્યાપક ચર્ચા અને યોગ્ય તપાસ જરૂરી છે. છેલ્લા છ મહિનાથી વિવિધ કાર્યક્રમો અને રજૂઆતો દ્વારા આ મુદ્દાને લઈને જનજાગૃતિ અભિયાન ચલાવવામાં આવી રહ્યું છે.
હોસ્ટેલ ગ્રાઉન્ડ ખાતે મોટી સંખ્યામાં લોકો એકત્રિત
રેલી પૂર્વે આજે સવારે ભરૂચના હોસ્ટેલ ગ્રાઉન્ડ ખાતે મોટી સંખ્યામાં શ્રદ્ધાળુઓ, સંતો, મહંતો અને વિવિધ હિન્દુ સંગઠનોના કાર્યકરો એકત્રિત થયા હતા. આયોજકોના જણાવ્યા અનુસાર માત્ર ભરૂચ જ નહીં પરંતુ ગુજરાતના વિવિધ જિલ્લાઓ અને પડોશી રાજ્ય મહારાષ્ટ્રમાંથી પણ લોકો આ કાર્યક્રમમાં જોડાવા પહોંચ્યા છે.
ખાસ કરીને શ્રી ચક્રધર સ્વામીના અનુયાયીઓની મોટી ઉપસ્થિતિ જોવા મળી રહી છે, જેના કારણે કાર્યક્રમનું મહત્વ વધુ વધી ગયું છે.
કલેક્ટર કચેરી સુધી યોજાશે પગપાળા યાત્રા
આ રેલી હોસ્ટેલ ગ્રાઉન્ડથી શરૂ થઈને કલેક્ટર કચેરી સુધી પહોંચવાની છે. ત્યાં જિલ્લા કલેક્ટરને આવેદનપત્ર પાઠવીને ઐતિહાસિક સ્મારક અંગેની માંગણીઓ રજૂ કરવામાં આવશે.
આ ઉપરાંત આયોજકો દ્વારા હસ્તાક્ષર અભિયાન પણ શરૂ કરવામાં આવ્યું છે, જેમાં નાગરિકોનો સમર્થન મેળવીને વહીવટી તંત્ર સમક્ષ પોતાની રજૂઆત વધુ મજબૂત બનાવવાનો પ્રયાસ કરવામાં આવી રહ્યો છે.
પોલીસ તંત્ર એલર્ટ મોડ પર
બીજી તરફ કાયદો અને વ્યવસ્થાની સ્થિતિ જળવાઈ રહે તે માટે પોલીસ તંત્ર સંપૂર્ણ એલર્ટ મોડ પર છે. મળતી માહિતી મુજબ રેલીને સત્તાવાર પરવાનગી આપવામાં આવી નથી, છતાં મોટી સંખ્યામાં લોકો એકત્રિત થતા સુરક્ષા વ્યવસ્થાને લઈને પ્રશાસન સતર્ક બન્યું છે.
સુરક્ષાના ભાગરૂપે એક ડીવાયએસપી, એક પોલીસ ઇન્સ્પેક્ટર (PI), પાંચ પોલીસ સબ ઇન્સ્પેક્ટર (PSI) સહિત સ્થાનિક પોલીસ, એસઓજી અને અન્ય સુરક્ષા દળોનો વિશાળ કાફલો તૈનાત કરવામાં આવ્યો છે.
પ્રશાસનની ભૂમિકા પર સૌની નજર
હાલ સૌથી મોટો પ્રશ્ન એ છે કે પ્રશાસન રેલીને કલેક્ટર કચેરી સુધી જવાની મંજૂરી આપશે કે નહીં. સમગ્ર ઘટનાક્રમ વચ્ચે ભરૂચ શહેરમાં તણાવપૂર્ણ પરંતુ નિયંત્રિત સ્થિતિ જોવા મળી રહી છે.
ઉલ્લેખનીય છે કે વિવાદિત જામા મસ્જિદ હાલમાં પુરાતત્વ વિભાગ (ASI)ના સંરક્ષણ હેઠળ હોવાનું જણાવવામાં આવે છે. જોકે અત્યાર સુધી વિભાગ તરફથી આ મુદ્દે કોઈ સત્તાવાર નિવેદન જાહેર કરવામાં આવ્યું નથી.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
