સાબરમતી નદી પર આવેલા સુભાષ બ્રિજને 25 ડિસેમ્બર 2025 સુધી સંપૂર્ણપણે બંધ રાખવાનો મહત્વનો નિર્ણય અમદાવાદ મહાનગરપાલિકા (AMC)ના બ્રિજ પ્રોજેક્ટ વિભાગે લીધો છે. 4 ડિસેમ્બર 2025ના રોજ બ્રિજના સુપર સ્ટ્રક્ચરમાં ગંભીર પ્રકારનું નુકસાન જોવા મળતા તાત્કાલિક અસરથી બ્રિજને ટ્રાફિક માટે બંધ કર્યો હતો. સલામતીને પ્રાથમિકતા આપીને AMCએ બ્રિજની વિગતવાર તપાસ માટે રાજ્ય સરકારના રોડ એન્ડ બિલ્ડિંગ (R&B) ડિઝાઇન સર્કલ અને AMCની M-પેનલમાં આવેલા સ્ટ્રક્ચરલ ડિઝાઇન કન્સલ્ટન્ટ્સને જોડ્યા છે. આ નિષ્ણાતોની ટીમ હાલમાં બ્રિજની આંતરિક અને બાહ્ય સ્થિતિનો સઘન અભ્યાસ કરી રહી છે.
આ સમગ્ર સમયગાળા દરમિયાન બ્રિજ સંપૂર્ણપણે બંધ રહેશે, તેથી જાહેર જનતાને AMC તરફથી અન્ય વૈકલ્પિક માર્ગોનો ઉપયોગ કરવાની ખાસ વિનંતી કરવામાં આવી છે.
SVNIT અને IIT નિષ્ણાતોની ટીમ મેદાનમાં
સુભાષ બ્રિજની હાલત અને તેનો ભવિષ્યમાં સુરક્ષિત ઉપયોગ શક્ય છે કે નહીં તે જાણવા માટે વિશેષપણે અદ્યતન ટેસ્ટિંગ અને નિરીક્ષણ કરાવાઈ રહ્યું છે. SVNIT (સુરત)ની નિષ્ણાત ટીમે પ્રાથમિક ચકાસણી પૂર્ણ કરી દીધી છે. હાલમાં બ્રિજના ફાઉન્ડેશન (પાયા)ની ચકાસણી વિશેષ ઈજનેરોની ટીમ દ્વારા ઝડપી ગતિએ શરૂ છે.
આગામી દિવસોમાં બ્રિજની વધુ ઊંડાણપૂર્વકની તપાસ IIT મુંબઈ, IIT રૂડકી અને દેશના અન્ય અગ્રણી બ્રિજ નિષ્ણાતો દ્વારા કરવામાં આવશે. આ તમામ સંસ્થાઓ દ્વારા મળેલા રિપોર્ટોના આધારે AMC બ્રિજની રીપેરિંગ, રીકન્સ્ટ્રક્શન અથવા રિ-ઓપનિંગ અંગેનો અંતિમ નિર્ણય લેશે.
AMCએ સ્પષ્ટ કર્યું છે કે 25 ડિસેમ્બર 2025 સુધી આ વિસ્તૃત પરીક્ષણ પ્રક્રિયા ચાલશે અને ત્યાં સુધી બ્રિજ સંપૂર્ણપણે બંધ રહેશે. નાગરિકોને વિનંતી છે કે તેઓ સલામતીને ધ્યાનમાં રાખીને વૈકલ્પિક માર્ગોનો ઉપયોગ કરે અને સત્તાવાર સૂચનાઓનું પાલન કરે.
સુભાષ બ્રિજ શહેરના ઉત્તર અને પશ્ચિમ ભાગને જોડતો સૌથી મહત્વનો માર્ગ હોવાથી આ બંધનો ટ્રાફિક પર અમુક અસર થશે, પરંતુ ટેક્નિકલ નિષ્ણાતો દ્વારા કરવામાં આવતી આ ખૂબ જ જરૂરી તપાસ ભવિષ્યમાં કોઈપણ મોટા જોખમને અટકાવવા મહત્વપૂર્ણ છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
