10 નવેમ્બરનાં રોજ દિલ્હીના લાલ કિલ્લા નજીક થયેલો વિસ્ફોટ દેશભરમાં હચમચાટ મચાવી ગયો છે. સાંજે લગભગ 6:52 વાગ્યે નેતાજી સુભાષ માર્ગ પર હ્યુન્ડાઇ i-20 કારમાં જોરદાર બ્લાસ્ટ થયો હતો. ફોરેન્સિક તપાસમાં બહાર આવ્યું છે કે વિસ્ફોટમાં અમોનિયમ નાઇટ્રેટ ફ્યુઅલ ઓઈલ (ANFO)નો ઉપયોગ કરવામાં આવ્યો હતો — જે સામાન્ય રીતે IED (ઈમ્પ્રોવાઈઝ્ડ એક્સ્પ્લોસિવ ડિવાઈસ) બનાવવા માટે વપરાય છે. આ માહિતી મળ્યા પછી પોલીસ અને કેન્દ્રીય સુરક્ષા એજન્સીઓએ આ હુમલાને આતંકવાદી ષડયંત્ર તરીકે જોવાનું શરૂ કર્યું છે.
મીડિયા અહેવાલો અનુસાર, આ કેસનો મુખ્ય સંદિગ્ધ અને સંભવિત આત્મઘાતી હુમલાખોર ડૉ. મોહમ્મદ ઉમર નબી હોવાનું બહાર આવ્યું છે. ઉમર જમ્મુ-કાશ્મીરના પુલવામાનો રહેવાસી હતો અને ફરીદાબાદની અલ-ફલાહ મેડિકલ કોલેજમાં ડૉક્ટર તરીકે કામ કરતો હતો. તપાસમાં સામે આવ્યું છે કે ઉમર ફરીદાબાદથી તાજેતરમાં જ પકડાયેલા એક આતંકવાદી મોડ્યુલ સાથે જોડાયેલો હતો, જેનો સંબંધ જૈશ-એ-મોહમ્મદ (JeM) અને અનસાર ગઝવત-ઉલ-હિંદ (AGH) જેવા આતંકી સંગઠનો સાથે હતો.
દિલ્હી પોલીસ અને NIAના સૂત્રો અનુસાર, ઉમરનાં અનેક સાથીઓની પણ ઓળખ થઈ છે. તેના પુલવામા સ્થિત પરિવાર પર પણ તપાસ ચાલી રહી છે. ઉમરના બે ભાઈઓ — આશિક અને ઝહુર નબી, માતા શમીમા બાનો, તેમજ સ્થાનિક રહેવાસીઓ તારિક અહેમદ દાર અને અમીર રશીદ સહિત ચારથી વધુ લોકોની અટકાયત કરવામાં આવી છે. પોલીસે પુલવામા અને ફરીદાબાદ બંને સ્થળે દરોડા પાડીને મહત્વપૂર્ણ પુરાવા હાથ ધર્યા છે. અત્યાર સુધીમાં 100થી વધુ લોકોને અટકાયતમાં લેવામાં આવ્યા છે, અને ઘણા મોબાઈલ ફોન, લેપટોપ અને નાણાકીય દસ્તાવેજો જપ્ત કરવામાં આવ્યા છે.
આ કેસની ગંભીરતા સમજતાં કેન્દ્રીય ગૃહમંત્રી અમિત શાહ તાત્કાલિક ઉચ્ચસ્તરીય બેઠક બોલાવી છે, જેમાં NIA, IB, દિલ્હી પોલીસ અને જમ્મુ-કાશ્મીર પોલીસના વરિષ્ઠ અધિકારીઓ હાજર રહેશે. આ બેઠકમાં બ્લાસ્ટની વિગતવાર તપાસ, ફોરેન્સિક પુરાવા અને આંતરરાજ્ય કડી પર ચર્ચા થવાની છે.
આ વચ્ચે, દિલ્હી પોલીસે આ કેસમાં UAPA (Unlawful Activities Prevention Act) અને Explosives Act હેઠળ ગુનો નોંધ્યો છે. પોલીસે 100થી વધુ CCTV ફૂટેજ તપાસ્યા છે, જેમાં સંદિગ્ધ શખ્સ માસ્ક પહેરીને ઘટનાસ્થળની આસપાસ ફરતો દેખાયો છે. વધુમાં, વિસ્ફોટક ભરાયેલી કારની માલિકી પણ ઘણી વખત બદલાઈ હોવાનું સામે આવ્યું છે — કાર પ્રથમ મોહમ્મદ સલમાન (ગુરુગ્રામ)ના નામે હતી, પછી તે તારિક અને અંતે ઉમરના હવાલે આવી હતી.
ખાસ નોંધનીય છે કે આ વિસ્ફોટ ફરીદાબાદમાં 2,900 કિલો વિસ્ફોટક પદાર્થો (અમોનિયમ નાઈટ્રેટ સહિત) જપ્ત થયા બાદના થોડા કલાકોમાં જ થયો હતો. ફરીદાબાદના કેસમાં પોલીસએ અગાઉ 3 ડૉક્ટરો સહિત 8 લોકોની ધરપકડ કરી હતી, જેઓ જૈશ-એ-મોહમ્મદ અને અન્ય આતંકી સંગઠનો સાથે સંકળાયેલા હોવાનું બહાર આવ્યું હતું.
હાલમાં સમગ્ર મામલો કેન્દ્ર અને રાજ્યની એજન્સીઓ માટે સર્વોચ્ચ પ્રાથમિકતા ધરાવે છે, કારણ કે આ હુમલો માત્ર દિલ્હીની સુરક્ષાને નહીં, પરંતુ રાષ્ટ્રીય સ્તરે આતંકવાદી નેટવર્કની નવી ગતિશીલતાને પણ ઉઘાડે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
