સુરત જિલ્લાના ઓલપાડ પોલીસ મથકમાં આમ આદમી પાર્ટી (AAP)ના સંગઠન મહામંત્રી તુલસી લાલૈયા સહિત તેના સાથીદારો વિરુદ્ધ ખંડણી, ગુનાહિત ધમકી અને બદનક્ષી જેવા ગંભીર આરોપો હેઠળ ગુનો નોંધાયો છે. પોલીસ ફરિયાદ મુજબ આરોપીઓએ એક વેપારી પાસેથી ₹10 લાખની ખંડણી માંગેલી હતી અને રકમ ન ચૂકવવામાં આવે તો તેમના પુત્રને ખોટા બળાત્કારના કેસમાં ફસાવી દેવાની ધમકી આપી હતી. આ મામલામાં પોલીસે તુલસી લાલૈયા સહિત બે મુખ્ય આરોપીઓને ઝડપી લઈને વધુ તપાસ શરૂ કરી છે.
ફરિયાદી દ્વારા નોંધાવવામાં આવેલા અહેવાલ અનુસાર, આરોપીઓએ ફરિયાદીને રોકીને મોટી રકમની માંગણી કરી હતી. શરૂઆતમાં આરોપીઓએ ₹1 લાખની રકમ પડાવી લીધી હોવાનો પણ આરોપ છે. ત્યારબાદ બાકીની રકમ ન મળતા ફરિયાદી અને તેમના પરિવારની પ્રતિષ્ઠાને નુકસાન પહોંચાડવાના ઈરાદાથી ખોટો વીડિયો રીલ બનાવી સોશિયલ મીડિયા પર વાયરલ કરવામાં આવ્યો હોવાનું પોલીસ સૂત્રો જણાવે છે. આરોપીઓએ ગંભીર ગુનામાં ફસાવવાની ધમકી આપીને દબાણ બનાવવાનો પ્રયાસ કર્યો હોવાનો પણ ઉલ્લેખ ફરિયાદમાં કરવામાં આવ્યો છે.
ઓલપાડ પોલીસે ભારતીય ન્યાય સંહિતાની કલમ 308(7), 336(4), 340(2), 356(2)(3) અને 61 હેઠળ કેસ નોંધ્યો છે. જેમાં ખંડણી માંગવી, ગુનાહિત ધમકી આપવી, ખોટા ઇલેક્ટ્રોનિક રેકોર્ડ બનાવવો અને અન્ય સંબંધિત ગુનાઓનો સમાવેશ થાય છે. પોલીસ ઇન્સ્પેક્ટર સી.આર. જાદવે મીડિયાને જણાવ્યું કે, પ્રાથમિક તપાસના આધારે આરોપીઓ સામે પુરાવા મળતા બે મુખ્ય આરોપીઓને ધરપકડ કરવામાં આવી છે અને સમગ્ર મામલે વધુ તપાસ ચાલી રહી છે.
આ ઘટનાએ રાજકીય વર્તુળોમાં ચર્ચા જગાવી છે, જ્યારે સ્થાનિક સ્તરે પણ આ મામલે ભારે ચર્ચા થઈ રહી છે. પોલીસ અધિકારીઓએ જણાવ્યું કે આરોપીઓની ભૂમિકા, નાણાકીય વ્યવહાર અને સોશિયલ મીડિયા પર વાયરલ થયેલા વિડિયોની સત્યતા અંગે વિગતવાર તપાસ કરવામાં આવશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
