ભારત અને અમેરિકા વચ્ચે ધાર્મિક સ્વતંત્રતાના મુદ્દે ફરી એકવાર તણાવ ઊભો થયો છે. ભારત સરકારે અમેરિકાની સંસ્થા United States Commission on International Religious Freedom (USCIRF) દ્વારા જાહેર કરવામાં આવેલા 2026ના વાર્ષિક અહેવાલને કડક શબ્દોમાં ફગાવી દીધો છે. આ અહેવાલને ભારતે પક્ષપાતી અને હકીકતોથી દૂર ગણાવ્યો છે.
વિદેશ મંત્રાલયના પ્રવક્તા રણધીર જયસ્વાલએ આ મુદ્દે પ્રતિક્રિયા આપતા જણાવ્યું કે USCIRFનો અહેવાલ સંપૂર્ણપણે પ્રેરિત છે અને તેનો હેતુ ભારતની છબી ખરડવાનો છે. તેમણે કહ્યું કે આ કમિશન છેલ્લા ઘણા વર્ષોથી ઇતિહાસ અને વાસ્તવિક તથ્યોને તોડી-મરોડીને રજૂ કરે છે, જેના કારણે તેની વિશ્વસનીયતા પર પ્રશ્નો ઉભા થયા છે.
વિદેશ મંત્રાલયે વધુમાં જણાવ્યું કે USCIRF શંકાસ્પદ સ્ત્રોતો અને પૂર્વાગ્રહયુક્ત એજન્ડા પર આધારિત અહેવાલો તૈયાર કરે છે. ભારતે પોતાના નિવેદનમાં ભારપૂર્વક કહ્યું કે 1.4 અબજની વસ્તી ધરાવતું દેશ એક મજબૂત અને જીવંત લોકશાહી છે, જ્યાં વિવિધ ધર્મો અને સંસ્કૃતિઓ વચ્ચે સહઅસ્તિત્વ અને ભાઈચારો જોવા મળે છે.
ભારતે અમેરિકાને પણ કડક સંદેશ આપ્યો છે કે ભારતની ટીકા કરતા પહેલા અમેરિકાએ પોતાના દેશમાં વધી રહેલા મુદ્દાઓ પર ધ્યાન આપવું જોઈએ. તેમાં ખાસ કરીને હિન્દુ મંદિરો પર થતા હુમલા અને ભારતીય મૂળના લોકો વિરુદ્ધ વધતી અસહિષ્ણુતાનો સમાવેશ થાય છે. વિદેશ મંત્રાલયે સ્પષ્ટ કર્યું છે કે ભારત વિરુદ્ધ નકારાત્મક છબી ઊભી કરવાનો કોઈપણ પ્રયાસ સફળ થવાનો નથી.
આ મુદ્દે ભારત અને અમેરિકા વચ્ચેના રાજનૈતિક સંબંધોમાં ફરી ચર્ચા શરૂ થઈ છે અને આંતરરાષ્ટ્રીય સ્તરે પણ આ મામલો ધ્યાન કેન્દ્રિત કરી રહ્યો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
