ગુજરાતમાં છેલ્લા કેટલાક અઠવાડિયાથી ચાલી રહેલી મંત્રીમંડળના વિસ્તરણની ચર્ચાઓને હવે અંત આવ્યો છે. સત્તાવાર રીતે જાહેર થયું છે કે ભાજપ સરકારના નવા મંત્રીમંડળનું શપથગ્રહણ સમારોહ 17 ઑક્ટોબર, શુક્રવારે સવારે 11:30 વાગ્યે ગાંધીનગરના મહાત્મા મંદિર ખાતે યોજાશે. આ સમારોહમાં રાજ્યપાલ આચાર્ય દેવવ્રત નવા મંત્રીઓને હોદ્દા અને ગોપનીયતાનો શપથ અપાવશે. કાર્યક્રમને લઈ રાજ્યની રાજનીતિમાં ભારે ઉત્સુકતા જોવા મળી રહી છે કારણ કે આ વખતે મંત્રીમંડળમાં નવા ચહેરાઓને સ્થાન મળવાની શક્યતા છે.
સૂત્રો અનુસાર, મુખ્યમંત્રી ભૂપેન્દ્ર પટેલના નેતૃત્વ હેઠળના આ નવા મંત્રીમંડળમાં કુલ 23 મંત્રીઓને સ્થાન મળી શકે છે. તેમાં અનુભવશાળી સાથે યુવા અને મહિલા ધારાસભ્યોને વિશેષ મહત્ત્વ આપવામાં આવશે. આ મંત્રીમંડળમાં પ્રાદેશિક અને જાતિવાર સંતુલન જાળવવાનો ખાસ પ્રયાસ કરવામાં આવ્યો છે જેથી સૌ સમાજોને યોગ્ય પ્રતિનિધિત્વ મળે. અંદાજ મુજબ, પાટીદાર સમાજમાંથી 6 ચહેરાઓ — જેમાં 4 લેઉવા પટેલ અને 2 કડવા પટેલ —ને સ્થાન મળી શકે છે. આ ઉપરાંત OBC વર્ગમાંથી 4 ઠાકોર-કોળી સમાજના ધારાસભ્યો, SC વર્ગમાંથી 2, ST વર્ગમાંથી 2, તેમજ બ્રાહ્મણ અને ક્ષત્રિય સમાજમાંથી 2-2 પ્રતિનિધિઓને પણ મંત્રીપદ આપવામાં આવવાની શક્યતા છે. સાથે સાથે 4 મહિલા ધારાસભ્યોને પણ મંત્રીપદ આપી મહિલા પ્રતિનિધિત્વ વધારવામાં આવશે.
રાજ્યના વિવિધ પ્રદેશોમાંથી પણ સમાન પ્રતિનિધિત્વ સુનિશ્ચિત કરવામાં આવ્યું છે. અમદાવાદ-ગાંધીનગર ક્ષેત્રમાંથી એક નવો મંત્રી જોડાઈ શકે છે, કચ્છ-સૌરાષ્ટ્ર વિસ્તારને 4 કેબિનેટ અને 3 રાજ્યમંત્રી મળી શકે છે, મધ્ય ગુજરાતમાંથી 2 કેબિનેટ અને 2 રાજ્યમંત્રી, જ્યારે દક્ષિણ ગુજરાતમાંથી 3 કેબિનેટ અને 4 રાજ્યમંત્રીઓનો સમાવેશ થવાની શક્યતા છે.
મંત્રીઓના શપથગ્રહણ પહેલાં જ ગાંધીનગરમાં તૈયારીઓ તેજ બની ગઈ છે. સ્વર્ણિમ સંકુલ-2 ખાતે મંત્રીઓની નવી ઓફિસોમાં સાફસફાઈ શરૂ કરી દેવામાં આવી છે. માહિતી પ્રમાણે બીજા અને ત્રીજા માળ પર 5-6 ઓફિસો ખાલી કરી તૈયાર રાખવામાં આવી છે, જે બતાવે છે કે મંત્રીમંડળનું કદ આ વખતે વિશાળ રહેવાની સંભાવના છે.
તે દરમિયાન ભાજપના ધારાસભ્યોને શુક્રવાર સુધી ગાંધીનગરમાં હાજર રહેવા માટે દંડકપૂર્વક સૂચના આપવામાં આવી છે. ધારાસભ્યો પાટનગર તરફ રવાના થઈ ચૂક્યા છે, જ્યારે તેમના વચ્ચે કોણે મંત્રીપદ માટે ફોન આવશે તેની આતુરતાથી રાહ જોવાઈ રહી છે. પાર્ટી હાઈકમાન્ડ, ખાસ કરીને પ્રધાનમંત્રી નરેન્દ્ર મોદી અને કેન્દ્રીય ગૃહમંત્રી અમિત શાહ, સાથે ભાજપના રાષ્ટ્રીય અધ્યક્ષ જે.પી. નડ્ડાની ઉપસ્થિતીમાં મંત્રીમંડળની યાદીને અંતિમ સ્વરૂપ આપવામાં આવ્યું હોવાનું સૂત્રો જણાવી રહ્યા છે.
આ કાર્યક્રમ માત્ર રાજકીય રૂપાંતર નથી, પરંતુ આગામી ચૂંટણીને ધ્યાનમાં રાખીને ભાજપની નવી રાજકીય વ્યૂહરચનાનું પ્રતિબિંબ પણ બની શકે છે — જ્યાં જાતિવાર સંતુલન, પ્રાદેશિક પ્રતિનિધિત્વ અને યુવા નેતૃત્વને પ્રાધાન્ય આપી આગામી દાયકાના રાજકીય નેતૃત્વને તૈયાર કરવાની દિશામાં પગલું ભરાશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
