ખેડા જિલ્લાના 77મા વન મહોત્સવની જિલ્લા કક્ષાની ઉજવણી મહેમદવાદ ખાતે મહેસૂલ અને આપત્તિ વ્યવસ્થાપન રાજ્યમંત્રી સંજયસિંહ મહિડાના અધ્યક્ષસ્થાને કરવામાં આવી હતી. કાર્યક્રમ દરમિયાન મહેમદવાદ તાલુકાના માંકવા ગામે બંગલજીની મુવાડી ખાતે 1 હેક્ટર વિસ્તારમાં 64 જાતના કુલ 10 હજાર વૃક્ષોના વાવેતરથી તૈયાર કરાયેલા ‘વનકવચ’નું લોકાર્પણ કરવામાં આવ્યું હતું.
આ પ્રસંગે ‘મારો હરિત સંકલ્પ’ અભિયાન હેઠળ મહાનુભાવોએ હસ્તાક્ષર કર્યા હતા, સેલ્ફી પોઈન્ટ પર સેલ્ફી લીધી હતી અને વિનામૂલ્યે રોપા વિતરણ માટેના વૃક્ષરથને લીલીઝંડી આપી પ્રસ્થાન કરાવવામાં આવ્યું હતું. મહેમદવાદના પૂજ્ય રવિશંકર મહારાજ હોલ ખાતે સામાજિક વનીકરણ વિભાગ, નડિયાદ અને જિલ્લા વહીવટી તંત્ર, ખેડા-નડિયાદના સંયુક્ત ઉપક્રમે આ કાર્યક્રમ યોજાયો હતો.
‘એક પેડ માં કે નામ 3.0’ અભિયાનમાં સૌ સહભાગી બને: સંજયસિંહ મહિડા
રાજ્યમંત્રી સંજયસિંહ મહિડાએ પોતાના સંબોધનમાં જણાવ્યું હતું કે વડાપ્રધાન નરેન્દ્ર મોદીએ ‘એક પેડ માં કે નામ 3.0’ અભિયાન દ્વારા વધુમાં વધુ વૃક્ષો વાવી ધરતીમાતાને હરિયાળી બનાવવાનું આહ્વાન કર્યું છે. તેમણે નાગરિકોને આ અભિયાનમાં સક્રિયપણે જોડાવા અપીલ કરી હતી.
તેમણે કહ્યું કે મુખ્યમંત્રી ભૂપેન્દ્ર પટેલે ‘ગ્રીન ગુજરાત, ક્લીન ગુજરાત’ના સૂત્ર સાથે વન મહોત્સવની ઉજવણીને વિશેષ પ્રાધાન્ય આપ્યું છે. રાજ્ય સરકાર અને વન વિભાગનો મુખ્ય હેતુ રાજ્યના ગ્રીન કવરમાં વધારો કરવાનો અને પર્યાવરણ સંરક્ષણ અંગે જનજાગૃતિ ફેલાવવાનો છે.
‘માતાના સન્માનમાં ઓછામાં ઓછું એક વૃક્ષ વાવો’
સંજયસિંહ મહિડાએ જણાવ્યું હતું કે વન મહોત્સવને માત્ર સરકારી કાર્યક્રમ પૂરતો મર્યાદિત રાખવા કરતાં તેને જનઆંદોલનનું સ્વરૂપ આપવાની જરૂર છે.
તેમણે દરેક નાગરિકને પોતાની માતાની યાદમાં અથવા તેમના સન્માનમાં ઓછામાં ઓછું એક વૃક્ષ વાવવાનો સંકલ્પ લેવા અપીલ કરી હતી. સાથે જ તેમણે ભાર મૂક્યો કે માત્ર છોડ વાવવો પૂરતો નથી, પરંતુ તેનું જતન, સંરક્ષણ અને ઉછેર કરવાની જવાબદારી પણ નિભાવવી જરૂરી છે.
‘ઓછામાં ઓછું એક વૃક્ષ ઉછેરવાનો પ્રામાણિક પ્રયાસ કરીએ’: અર્જુનસિંહ ચૌહાણ
મહેમદવાદના ધારાસભ્ય અર્જુનસિંહ ચૌહાણે જણાવ્યું હતું કે વૃક્ષ ઉછેર અને વનોની રક્ષા માત્ર વન વિભાગની જવાબદારી નથી. લોકોના સંકલ્પ અને સહયોગ વગર હરિયાળો વિકાસ શક્ય નથી.
તેમણે નાગરિકોને વૃક્ષારોપણ અને વૃક્ષ સંરક્ષણમાં સક્રિય ભાગ લેવા અપીલ કરતાં કહ્યું કે દરેક વ્યક્તિ ઓછામાં ઓછું એક વૃક્ષ ઉછેરવાનો પ્રામાણિક પ્રયાસ કરે. તેમણે સો મિલ એસોસિએશન દ્વારા કરવામાં આવેલા રોપા વિતરણના પ્રયાસને પણ બિરદાવ્યો હતો.
મિયાવાકી પદ્ધતિથી ‘વનકવચ’ યોજના
વન વિભાગ દ્વારા મિયાવાકી પદ્ધતિને ગુજરાતની સ્થાનિક આબોહવા અને પરિસ્થિતિને અનુરૂપ ઢાળીને ‘વનકવચ’ યોજના અમલમાં મૂકવામાં આવી છે. આ યોજનામાં સ્થાનિક વૃક્ષો, છોડ અને વેલનો ઉપયોગ કરીને ઓછી જમીનમાં ગાઢ હરિયાળી ઊભી કરવાનો પ્રયાસ કરવામાં આવે છે.
મહેમદવાદ તાલુકાના માંકવા ગામે 1 હેક્ટર વિસ્તારમાં 10 હજાર રોપાઓનું વાવેતર કરીને આ પ્રકારનું વનકવચ તૈયાર કરવામાં આવ્યું છે.
ખેડા જિલ્લાના 8 તાલુકામાં 1.60 લાખ રોપાનું આયોજન
જિલ્લા ફોરેસ્ટ અધિકારી અભિષેક સામરિયાએ જણાવ્યું હતું કે 2026-27 દરમિયાન કઠલાલ તાલુકાના મહાદેવપુરા ગામે 3 હેક્ટર વિસ્તારમાં 30 હજાર રોપાઓનું વાવેતર કરવામાં આવ્યું છે.
આ ઉપરાંત કપડવંજમાં 3 હેક્ટર, ખેડામાં 2 હેક્ટર, માતરમાં 3 હેક્ટર, ઠાસરામાં 2 હેક્ટર અને નડિયાદમાં 2 હેક્ટર સહિત કુલ 16 હેક્ટર વિસ્તારમાં 1.60 લાખ રોપાઓનું વનકવચ હેઠળ વાવેતર કરવાની યોજના છે.
ખેડા જિલ્લામાં 41 લાખ રોપા તૈયાર
ખેડા જિલ્લામાં સામાજિક વનીકરણ વિભાગ, નડિયાદ હસ્તકની 17 વન મહોત્સવ નર્સરી, 3 હાઈટેક નર્સરી અને મહિલા તથા ખેડૂત લાભાર્થીઓ દ્વારા સંચાલિત 69 નર્સરી મળી કુલ 41 લાખ રોપા તૈયાર કરવામાં આવ્યા છે.
આ રોપાઓનું 77મા વન મહોત્સવ અંતર્ગત વિતરણ અને વાવેતર કરવામાં આવશે. વૃક્ષરથ દ્વારા પણ વિવિધ વિસ્તારોમાં વિનામૂલ્યે રોપાનું વિતરણ કરવાની યોજના છે.
તાલુકા અને ગ્રામ્ય સ્તરે પણ યોજાશે વન મહોત્સવ
જિલ્લા કક્ષાના કાર્યક્રમ બાદ ખેડા જિલ્લાના તમામ તાલુકાઓમાં વન મહોત્સવની ઉજવણી યોજાશે. આયોજન મુજબ તાલુકા કક્ષાએ 11 અને ગ્રામ્ય કક્ષાએ 218 કાર્યક્રમો યોજાશે.
આ કાર્યક્રમોનો મુખ્ય હેતુ વૃક્ષારોપણને જનઆંદોલનમાં ફેરવવો અને સ્થાનિક સ્તરે વધુમાં વધુ લોકોની ભાગીદારી સુનિશ્ચિત કરવાનો છે.
ખેડા જિલ્લામાં વૃક્ષોની સંખ્યા વધી
વન વિભાગના જણાવ્યા અનુસાર ખેડા જિલ્લામાં 2025માં કરવામાં આવેલી વૃક્ષ ગણતરીમાં નોંધપાત્ર વધારો નોંધાયો છે. વર્ષ 2021માં જિલ્લામાં આશરે 108.23 લાખ વૃક્ષો હતા, જ્યારે 2025માં આ સંખ્યા વધીને 112.88 લાખ સુધી પહોંચી છે.
આંકડા દર્શાવે છે કે જિલ્લામાં વૃક્ષ આવરણ વધારવાની દિશામાં વિવિધ વનીકરણ યોજનાઓ અને જાહેર ભાગીદારીનું સકારાત્મક પરિણામ મળી રહ્યું છે.
ડૉ. આરાધના સાહુએ જનભાગીદારી પર મૂક્યો ભાર
વન્યજીવ વર્તુળ, ગાંધીનગરના મુખ્ય વન સંરક્ષક ડૉ. આરાધના સાહુએ જણાવ્યું હતું કે ખેડા જિલ્લાના લોકો વન મહોત્સવ અને ‘એક પેડ માં કે નામ 3.0’ અભિયાનમાં સક્રિય ભાગ લે અને જિલ્લામાં વનીકરણની કામગીરીને વધુ ગતિ આપે.
તેમણે ‘ગ્રીન ગુજરાત, ક્લીન ગુજરાત’ના અભિયાનને સફળ બનાવવા નાગરિકોને વધુ વૃક્ષો વાવવા અને તેનું જતન કરવા અપીલ કરી હતી.
વનકર્મયોગીઓ અને સખી મંડળોનું સન્માન
કાર્યક્રમ દરમિયાન વન અને પર્યાવરણ ક્ષેત્રે વિશેષ કામગીરી કરનારા ત્રણ વનકર્મયોગીઓને પ્રશસ્તિપત્ર આપીને સન્માનિત કરવામાં આવ્યા હતા.
આ ઉપરાંત ત્રણ સખી મંડળોને નાણાકીય સહાયના ચેક અર્પણ કરવામાં આવ્યા હતા. કઠલાલ તાલુકાના સખી મંડળને રૂ. 2.45 લાખ, મહેમદવાદના સખી મંડળને રૂ. 1.53 લાખ અને મહુધાના સખી મંડળને રૂ. 2.31 લાખનો ચેક આપવામાં આવ્યો હતો.
પર્યાવરણ અને પ્રવાસી પક્ષીઓ પર ટૂંકી ફિલ્મનું પ્રદર્શન
વન વિભાગ દ્વારા તૈયાર કરવામાં આવેલી પર્યાવરણ અને પ્રવાસી પક્ષીઓ સંબંધિત ટૂંકી ફિલ્મનું પણ પ્રદર્શન કરવામાં આવ્યું હતું. કાર્યક્રમ દરમિયાન ‘હરિયાળું ખેડા, સ્વચ્છ ખેડા’નો સંદેશ જનમાનસ સુધી પહોંચાડવાનો સંકલ્પ વ્યક્ત કરવામાં આવ્યો હતો.
આ પ્રસંગે ખેડા જિલ્લા પંચાયત પ્રમુખ હિતેશકુમાર તડવી, જિલ્લા ભાજપ પ્રમુખ નયનાબેન પટેલ, મહેમદવાદ તાલુકા પંચાયત પ્રમુખ અજયભાઈ ડાભી, મહેમદવાદ નગરપાલિકા પ્રમુખ પ્રશાંતભાઈ પટેલ, APMC ચેરમેન ભગવતભાઈ પટેલ, અમૂલ ડિરેક્ટર ગૌતમસિંહ ચૌહાણ, જિલ્લા કલેક્ટર એન.વી. ઉપાધ્યાય, જિલ્લા વિકાસ અધિકારી જયંત કિશોર, જિલ્લા પોલીસ અધિક્ષક વિજય પટેલ સહિત વન વિભાગના અધિકારીઓ, વિદ્યાર્થીઓ અને મોટી સંખ્યામાં નાગરિકો ઉપસ્થિત રહ્યા હતા.
રીપોર્ટર – સુરેશ પારેખ (ખેડા)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
