દિલ્હીના તુર્કમાન ગેટ વિસ્તારમાં આવેલી મસ્જિદ પાસે અતિક્રમણ હટાવવાની કાર્યવાહી દરમિયાન થયેલી હિંસા મામલે દિલ્હી પોલીસે તપાસને વેગ આપ્યો છે. પોલીસના જણાવ્યા અનુસાર, હિંસામાં સામેલ આશરે 30 હુમલાખોરોની ઓળખ કરી લેવામાં આવી છે. આ ઓળખ CCTV ફૂટેજ, મોબાઇલ ફોનમાં કેદ થયેલા વિડિયો, પોલીસના બોડી કેમેરા રેકોર્ડિંગ્સ અને સોશિયલ મીડિયામાં વાયરલ થયેલા દૃશ્યોના આધારે કરવામાં આવી છે.
પોલીસ તપાસમાં સામે આવ્યું છે કે 7 જાન્યુઆરીની મોડી રાત્રે થયેલી આ હિંસામાં માત્ર સ્થાનિક લોકો જ નહીં, પરંતુ અન્ય વિસ્તારોમાંથી આવેલા લોકો પણ સામેલ હતા. પોલીસને શંકા છે કે સોશિયલ મીડિયાના માધ્યમથી લોકોને એકત્રિત કરવામાં આવ્યા હતા. આ દિશામાં સોશિયલ મીડિયા એક્ટિવિટી અને કોલ ડિટેઇલ્સની પણ વ્યાપક તપાસ ચાલી રહી છે.
હાલ સુધીમાં પોલીસે પાંચ આરોપીઓની ધરપકડ કરી છે, જેમાં કાશિફ, મોહમ્મદ કૈફ, મોહમ્મદ અરીબ, અદનાન અને સમીરનો સમાવેશ થાય છે. આ તમામ ચાંદની મહલ અને દરિયાગંજ વિસ્તારના રહેવાસી હોવાનું સામે આવ્યું છે. આરોપીઓ સામે ભારતીય ન્યાય સંહિતાની વિવિધ કલમો હેઠળ કેસ દાખલ કરવામાં આવ્યા છે.
ફરાર આરોપીઓની શોધખોળ માટે દિલ્હી પોલીસે સ્પેશિયલ ઇન્વેસ્ટિગેશન ટીમ (SIT) રચી છે. આ ટીમ ડ્રોન કેમેરા, CCTV ફૂટેજ અને આધુનિક તકનીકી દેખરેખની મદદથી આરોપીઓ સુધી પહોંચવાનો પ્રયાસ કરી રહી છે. ઘટનાને પગલે વિસ્તારમાં વધારાના પોલીસ દળો તહેનાત કરવામાં આવ્યા છે અને હાલ પરિસ્થિતિ સંપૂર્ણપણે નિયંત્રણમાં હોવાનું પોલીસે જણાવ્યું છે. સાથે જ, જનતાને અફવાઓ પર વિશ્વાસ ન કરવા અને શાંતિ જાળવવાની અપીલ પણ કરવામાં આવી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
