વલસાડ જિલ્લાના ઉમરગામ-સંજાણ વિસ્તાર અને મહારાષ્ટ્રના સરહદી વિસ્તારોમાં યુવતીઓને પ્રેમસંબંધમાં ફસાવીને વિદેશ લઈ જઈ ધર્માંતરણ અને નિકાહ કરાવવામાં આવતો હોવાના ગંભીર આક્ષેપો સાથે જૈન સમાજ દ્વારા ઉચ્ચસ્તરીય તપાસની માંગ કરવામાં આવી છે. આ મુદ્દે વલસાડ જિલ્લા પોલીસ તંત્રને આવેદનપત્ર પાઠવી સમગ્ર ઘટનાક્રમની નિષ્પક્ષ તપાસ કરવાની માંગ ઉઠાવવામાં આવી છે.
જૈન સમાજના પ્રતિનિધિઓએ રજૂઆતમાં દાવો કર્યો છે કે સંજાણના બે મુસ્લિમ યુવકો દ્વારા મહારાષ્ટ્રના ઘોલવડ અને બોરડી વિસ્તારની બે જૈન યુવતીઓને પ્રેમસંબંધમાં ફસાવીને લંડન લઈ જવામાં આવી હતી, જ્યાં તેમની સાથે નિકાહ કરવામાં આવ્યો હોવાનું કહેવામાં આવી રહ્યું છે.
લંડન સુધી પહોંચેલી કથિત યોજના અંગે ઉઠ્યા સવાલો
રજૂઆતમાં જણાવ્યા મુજબ એક ઘટનામાં સંજાણના રહેવાસી યુવકે ઘોલવડની યુવતી સાથે લગ્ન કર્યા બાદ તેને લંડન લઈ ગયો હતો. બીજી ઘટનામાં એક યુવક, જે અભ્યાસ માટે લંડન ગયો હતો, તેણે બોરડીની યુવતીને વિઝા, ટિકિટ અને અન્ય વ્યવસ્થા કરીને લંડન બોલાવી ત્યાં નિકાહ કર્યા હોવાનો આક્ષેપ કરવામાં આવ્યો છે.
આ ઉપરાંત યુવતી પાસેથી પૈસા અને દાગીના મેળવવામાં આવ્યા હોવાના પણ આક્ષેપો કરવામાં આવ્યા છે. જોકે, આ તમામ દાવાઓ અંગે સત્તાવાર તપાસ પૂર્ણ થયા બાદ જ હકીકત સ્પષ્ટ થઈ શકશે.
જૈન સમાજમાં રોષ, ઉચ્ચસ્તરીય તપાસની માંગ
સમાજના આગેવાનોનું કહેવું છે કે આ પ્રકારની ઘટનાઓ માત્ર વ્યક્તિગત સંબંધોનો મુદ્દો નથી, પરંતુ તેના પાછળ કોઈ મોટું સંગઠિત ષડયંત્ર છે કે કેમ તેની પણ તપાસ થવી જોઈએ. આવેદનપત્રમાં પોલીસ અને તપાસ એજન્સીઓને સમગ્ર મામલાની ઊંડાણપૂર્વક તપાસ કરીને જવાબદારો સામે કાયદેસરની કાર્યવાહી કરવાની માંગ કરવામાં આવી છે.
નવસારીમાં યુવતીની દુષ્કર્મની ફરિયાદ
આ દરમિયાન નવસારી શહેરમાંથી પણ એક ગંભીર ફરિયાદ સામે આવી છે. મોટા બજાર વિસ્તારમાં આવેલી કપડાની દુકાનમાં કામ કરતી યુવતીએ દુકાનના માલિક સામે બળાત્કાર, શારીરિક શોષણ અને હેરાનગતિના ગંભીર આરોપો લગાવ્યા છે.
પોલીસ ફરિયાદ અનુસાર યુવતી છેલ્લા કેટલાક વર્ષોથી દુકાનમાં નોકરી કરતી હતી. આ દરમિયાન દુકાન માલિક દ્વારા વારંવાર ફોન અને મેસેજ કરીને હેરાન કરવામાં આવતી હતી. ફરિયાદમાં એવો પણ આરોપ છે કે આરોપીએ વિશ્વાસનો ગેરલાભ લઈને યુવતી સાથે બળજબરીપૂર્વક શારીરિક સંબંધ બાંધ્યા હતા.
પોલીસે ગુનો નોંધી તપાસ શરૂ કરી
યુવતીએ આખી ઘટના પરિવારને જણાવ્યા બાદ નવસારી ટાઉન પોલીસ સ્ટેશનમાં ફરિયાદ નોંધાવી હતી. ફરિયાદના આધારે પોલીસે આરોપી સામે બળાત્કાર અને અન્ય સંબંધિત કલમો હેઠળ ગુનો નોંધી તપાસ શરૂ કરી છે.
પોલીસ અધિકારીઓના જણાવ્યા મુજબ ફરિયાદમાં કરાયેલા તમામ આક્ષેપોની તપાસ કરવામાં આવી રહી છે અને પુરાવાના આધારે આગળની કાર્યવાહી હાથ ધરવામાં આવશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
