ગાંધીનગર ખાતે હર્ષ સંઘવીની અધ્યક્ષતામાં ગુજરાત સ્ટેટ કો-ઓપરેટીવ એગ્રીકલ્ચર એન્ડ રૂરલ ડેવલપમેન્ટ બેંક લિમિટેડ (ખેતી બેંક), અમદાવાદ દ્વારા મહત્વપૂર્ણ કાર્યક્રમ યોજાયો હતો. આ પ્રસંગે ખેડૂત લાભાર્થીઓના પરિવારજનોને અકસ્માત વીમા સહાયના ચેક વિતરણ કરવામાં આવ્યા હતા તેમજ દિવ્યાંગ કર્મચારીઓને કાયમી નિમણૂક પત્રો એનાયત કરવામાં આવ્યા હતા.
ખેતી બેંક દ્વારા ખેડૂતોના કલ્યાણ માટે એક અનોખી પહેલ કરવામાં આવી છે, જેમાં લોન લેનાર દરેક ખેડૂત પરિવારને ₹11 લાખ સુધીનું અકસ્માત વીમા કવચ આપવામાં આવે છે. ખાસ વાત એ છે કે આ વીમાનું પ્રીમિયમ પણ બેંક દ્વારા જ ભરવામાં આવે છે, જેના કારણે ખેડૂતોને આર્થિક ભારણ વિના સુરક્ષા મળે છે. આ યોજના મુશ્કેલીના સમયમાં ખેડૂત પરિવારો માટે મોટો આર્થિક આધાર સાબિત થઈ રહી છે.
કાર્યક્રમ દરમિયાન નાયબ મુખ્યમંત્રીના હસ્તે સ્વર્ગસ્થ હેમંતજી પરમારના વારસદારને ₹11 લાખનો ચેક આપવામાં આવ્યો હતો, જ્યારે સ્વર્ગસ્થ હિતેશકુમાર પટેલ અને ભાણાભાઈ બારૈયાના પરિવારજનોને ₹5-5 લાખની વીમા સહાય આપવામાં આવી હતી. આ અવસરે હર્ષ સંઘવીએ શોકગ્રસ્ત પરિવારો પ્રત્યે સંવેદના વ્યક્ત કરી અને જણાવ્યું કે આ સહાય તેમને ભવિષ્યમાં આર્થિક રીતે મદદરૂપ બનશે.
આ સાથે જ, કાર્યક્રમમાં પાંચ દિવ્યાંગ કર્મચારીઓને તેમના પ્રોબેશન પિરિયડ પૂર્ણ થયા બાદ કાયમી નિમણૂકના ઓર્ડર પણ આપવામાં આવ્યા હતા. આમાં માંગરોળ, જૂનાગઢ, કુતિયાણા, જેતપુર અને મોરબી શાખાના કર્મચારીઓનો સમાવેશ થાય છે. નાયબ મુખ્યમંત્રીએ નવનિયુક્ત કર્મચારીઓને પ્રોત્સાહન આપતા તેમના ઉજ્જવળ ભવિષ્ય માટે શુભેચ્છાઓ પાઠવી હતી.
કાર્યક્રમના અંતે બેંકના ચેરમેન ડોલર કોટેચાએ આભાર વ્યક્ત કરતા જણાવ્યું કે ખેતી બેંક હંમેશા ખેડૂતોના હિત અને કર્મચારીઓના કલ્યાણ માટે પ્રતિબદ્ધ રહી છે અને આવનારા સમયમાં પણ આવી જ લોકહિતકારી યોજનાઓ ચાલુ રાખશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
