પશ્ચિમ એશિયામાં વધતા ભૂરાજકીય તણાવ અને દરિયાઈ સંઘર્ષની વચ્ચે ભારતે માનવતાવાદી દૃષ્ટિકોણ અપનાવીને ઈરાની નૌકાદળના યુદ્ધજહાજ IRIS Lavanને કોચી બંદર પર ડોક કરવાની મંજૂરી આપી હતી. આ જહાજ પર સવાર કુલ 183 ઈરાની નાવિકોને હાલમાં કોચીમાં ભારતીય નૌકાદળની સુરક્ષિત સુવિધાઓમાં રાખવામાં આવ્યા છે અને તેમની વતન વાપસી માટેની પ્રક્રિયા શરૂ કરવામાં આવી છે.
ફેબ્રુઆરીના અંતમાં ઈરાન અને ઇઝરાયલ તથા સંયુક્ત રાજ્ય અમેરિકા વચ્ચે વધતા તણાવના કારણે પશ્ચિમ એશિયાના દરિયાઈ વિસ્તારોમાં સ્થિતિ અત્યંત સંવેદનશીલ બની ગઈ હતી. તે સમયે આ ઈરાની યુદ્ધજહાજ ભારતીય જળસીમા નજીક હાજર હતું. 28 ફેબ્રુઆરીએ ઈરાન સરકારે ભારતને જાણ કરી હતી કે જહાજમાં કેટલીક ટેકનિકલ ખામીઓ સર્જાઈ છે અને તેને તાત્કાલિક સમારકામ માટે સુરક્ષિત બંદરની જરૂર છે. માનવતાના ધોરણે ભારત સરકારે 1 માર્ચે આ વિનંતી સ્વીકારી અને 4 માર્ચે આ જહાજ કોચી બંદર પર લંગરવામાં આવ્યું.
ભારતના વિદેશ મંત્રી એસ. જયશંકર એ રાયસીના સંવાદ દરમિયાન આ નિર્ણયનું સમર્થન કરતાં જણાવ્યું હતું કે જ્યારે કોઈ જહાજ મુશ્કેલીમાં હોય અને તેમાં યુવાન કેડેટ્સ સવાર હોય ત્યારે તેમને આશરો આપવો માનવતાનું કર્તવ્ય છે, અને ભારતે આ નિર્ણય સંપૂર્ણપણે માનવતાવાદી આધારે લીધો છે. તેમણે એ પણ જણાવ્યું કે આ જહાજ અગાઉ વિશાખાપટ્ટનમમાં યોજાયેલા આંતરરાષ્ટ્રીય ફ્લીટ સમીક્ષામાં ભાગ લેવા આવ્યું હતું, પરંતુ વિસ્તારમાં ઝડપથી બદલાતી સુરક્ષા પરિસ્થિતિને કારણે તે મુશ્કેલીમાં મુકાઈ ગયું હતું.
આ ઘટના સાથે જ એક વધુ ગંભીર ઘટના પણ બની હતી, જેમાં ઈરાનનું બીજું યુદ્ધજહાજ IRIS Dena, શ્રીલંકાના દરિયાકાંઠા નજીક અમેરિકી સબમરીનના ટોર્પિડો હુમલામાં ડૂબી ગયું હતું. આ હુમલામાં ઘણા નાવિકોના મોત થયા હતા, જ્યારે કેટલાક ખલાસીઓને શ્રીલંકન નૌકાદળ દ્વારા બચાવવામાં આવ્યા હતા. આવી ગંભીર અને સંવેદનશીલ પરિસ્થિતિ વચ્ચે ભારતે માનવતાવાદી જવાબદારી નિભાવીને IRIS લાવન અને તેના ક્રૂ મેમ્બર્સની સુરક્ષા સુનિશ્ચિત કરી છે અને તેમની સલામત વતન વાપસી માટે જરૂરી વ્યવસ્થાઓ કરી રહ્યું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
