સ્થાનિક સ્વરાજ્યની ચૂંટણી નજીક આવતાં અમદાવાદમાં રાજકીય માહોલ ગરમાયો છે. નિકોલ વિસ્તારમાં Aam Aadmi Party (AAP)ના જૂના કાર્યકર્તા સંદીપ પટેલે પાર્ટી નેતૃત્વ સામે ગંભીર આક્ષેપો કરતા રાજકીય હલચલ મચાવી છે. તેમના જણાવ્યા મુજબ, જે પાર્ટી સ્વચ્છ રાજનીતિનો દાવો કરે છે, તેમાં પણ ટિકિટ માટે પૈસાની લેવડદેવડ થઈ રહી છે.
સંદીપ પટેલે દાવો કર્યો કે તેઓ છેલ્લા સાત વર્ષથી પાર્ટી સાથે જોડાયેલા છે અને નિકોલ વિસ્તારમાં પાર્ટીની વિચારધારા ફેલાવવા સતત પ્રયત્નશીલ રહ્યા છે. તેમ છતાં, તાજેતરના નિર્ણયો તેમને નિરાશ કરી રહ્યા છે. તેમના આરોપ મુજબ, દિલ્હીથી આવતા કેટલાક નેતાઓ અને સહયોગીઓ ટિકિટ આપવાના નામે કાર્યકર્તાઓ પાસેથી પૈસા એકત્રિત કરી રહ્યા છે.
આ મુદ્દે તેમણે પાર્ટીના અગ્રણીઓ જેમ કે ગોપાલ ઇટાલિયા, ઈસુદાન ગઢવી અને મનોજ સોરઠીયા સમક્ષ રજૂઆત પણ કરી હતી, પરંતુ કોઈ અસરકારક પગલાં લેવાયા નથી. જેના કારણે પાર્ટીમાં આંતરિક અસંતોષ વધતો જોવા મળી રહ્યો છે.
સંદીપ પટેલે વધુમાં જણાવ્યું કે નિકોલ વિસ્તારમાં યોજાનારી અરવિંદ કેજરીવાલની સભા રદ થવા અંગે પણ સવાલો ઊભા થાય છે. તેમના મુજબ, મેદાન બુકિંગ ન થવાનું સાચું કારણ જાહેર કરવામાં આવ્યું નહોતું અને બાદમાં રાજકીય રીતે વિરોધીઓ પર આક્ષેપો કરવામાં આવ્યા.
તેમણે દિલ્હીથી આવેલા કેટલાક સહયોગીઓના વર્તન અંગે પણ ગંભીર આક્ષેપો કર્યા છે, જેમાં મોજશોખ અને અનૈતિક પ્રવૃત્તિઓનો ઉલ્લેખ કર્યો છે. આ તમામ આક્ષેપો વચ્ચે ચૂંટણી પહેલા AAPમાં આંતરિક વિખવાદ ખુલ્લો પડી રહ્યો છે, જે પાર્ટી માટે પડકારરૂપ બની શકે છે.
રાજકીય વિશ્લેષકોના મતે, ચૂંટણી પહેલા આવી આંતરિક મતભેદો બહાર આવવાથી પાર્ટીની છબી પર અસર પડી શકે છે અને મતદારોમાં પણ સંશય ઉભો થઈ શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
