દેશમાં યુનિફોર્મ સિવિલ કોડ (UCC) અંગે ચાલી રહેલી ચર્ચા વચ્ચે સુપ્રીમ કોર્ટએ ફરી એકવાર મહત્વપૂર્ણ અવલોકન કર્યું છે. ચીફ જસ્ટિસ સૂર્યકાંતએ સ્પષ્ટ કહ્યું કે UCC ભારતનું બંધારણીય લક્ષ્ય છે અને તેને કોઈ ચોક્કસ ધર્મ સાથે જોડવું યોગ્ય નથી. આ ટિપ્પણી મુસ્લિમ પર્સનલ લોને પડકારતી રિટ પિટિશનની સુનાવણી દરમિયાન કરવામાં આવી હતી.
શું હતો સમગ્ર મામલો?
સુપ્રીમ કોર્ટની બેન્ચ, જેમાં CJI સૂર્યકાંત સાથે જસ્ટિસ જોયમાલ્ય બાગચી અને જસ્ટિસ વિપુલ પંચોલી સામેલ હતા, મુસ્લિમ મહિલાઓના વારસાના અધિકારો અંગેની અરજી પર સુનાવણી કરી રહી હતી. અરજીમાં દાવો કરવામાં આવ્યો છે કે મુસ્લિમ પર્સનલ લો મહિલાઓ સાથે ભેદભાવ કરે છે અને તેને બંધારણીય સમાનતાના સિદ્ધાંતો સામે ગણાવવામાં આવ્યો છે.
પ્રશાંત ભૂષણની દલીલ અને કોર્ટનો જવાબ
સુનાવણી દરમિયાન વરિષ્ઠ વકીલ પ્રશાંત ભૂષણએ દલીલ કરી કે એક એવો UCC હોવો જોઈએ જે તમામ ધર્મોના વારસાના અધિકારોને સમાન રીતે નિયંત્રિત કરે. તેમણે ઉમેર્યું કે મુસ્લિમ સમાજમાં એ ભય છે કે UCCના નામે હિન્દુ સિવિલ કોડ લાદવામાં આવશે.
આ દલીલના જવાબમાં CJIએ જણાવ્યું કે UCCનો ઉદ્દેશ્ય કોઈ ધર્મને પ્રભાવિત કરવાનો નથી, પરંતુ તમામ નાગરિકો માટે સમાનતા લાવવાનો છે. તેમણે ભારપૂર્વક કહ્યું કે UCC એક બંધારણીય વાસ્તવિકતા છે.
વૈજ્ઞાનિક અને માનવતાવાદી દ્રષ્ટિકોણ પર ભાર
જસ્ટિસ જોયમાલ્ય બાગચીએ જણાવ્યું કે સમાજમાં વૈજ્ઞાનિક, તર્કસંગત અને માનવતાવાદી દ્રષ્ટિકોણ વિકસાવવો જરૂરી છે, જે આપણા મૂળભૂત કર્તવ્યોનો પણ ભાગ છે. કોર્ટએ બંધારણીય મૂલ્યો અને સમાનતાના સિદ્ધાંતોને જાળવવાની જરૂરિયાત પર ભાર મૂક્યો.
કેન્દ્ર સરકારને નોટિસ
આ અરજી ન્યાય નારી ફાઉન્ડેશન અને વકીલ પૌલોમી પાવની શુક્લા દ્વારા દાખલ કરવામાં આવી છે. સુપ્રીમ કોર્ટએ આ મામલે ગંભીરતા દાખવી કેન્દ્ર સરકારને નોટિસ પાઠવી જવાબ માંગ્યો છે.
ઉલ્લેખનીય છે કે અગાઉ પણ CJI સૂર્યકાંતે જણાવ્યું હતું કે મહિલાઓના અધિકારો સાથે જોડાયેલા ભેદભાવના મુદ્દાઓનો ઉકેલ લાવવા માટે UCC મહત્વપૂર્ણ બની શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
