જામનગરના દરિયાકાંઠાના બેડી અને બેડેશ્વર વિસ્તારમાં સરકારી જમીન પર થયેલા ગેરકાયદે દબાણો સામે તંત્રએ મોટી કાર્યવાહી હાથ ધરી છે. ગુજસીટોક હેઠળ ગુનો નોંધાયેલ કુખ્યાત ‘સાયચા ગેંગ’ના ગેરકાયદે બાંધકામો તોડી પાડવા માટે વહીવટી તંત્ર, મહેસૂલ વિભાગ અને પોલીસ વિભાગ દ્વારા સંયુક્ત મેગા ડિમોલિશન ઓપરેશન ચલાવવામાં આવ્યું હતું.
સવારથી જ ભારે પોલીસ બંદોબસ્ત વચ્ચે જેસીબી મશીનો અને અન્ય સાધનોની મદદથી ગેરકાયદે કોમર્શિયલ તેમજ રહેણાંક બાંધકામો પર બુલડોઝર ફેરવવાની કાર્યવાહી શરૂ કરવામાં આવી હતી. તંત્રની આ કાર્યવાહીથી સમગ્ર વિસ્તારમાં ભારે ચકચાર મચી ગઈ હતી.
અસગર સાયચા અને તેના સાગરીતોના ગેરકાયદે બાંધકામો જમીનદોસ્ત
માહિતી અનુસાર, સાયચા ગેંગના મુખ્ય સૂત્રધાર અસગર સાયચા અને તેના સાગરીતો દ્વારા સરકારી જમીન પર ગેરકાયદે રીતે ઉભા કરાયેલા અંદાજે 8 થી 13 મકાનો અને પાકા સ્ટ્રક્ચર્સને તોડી પાડવામાં આવ્યા હતા.
તપાસ દરમિયાન સામે આવ્યું હતું કે ગેંગે સરકારી સર્વે નંબરની કુલ 12,950 ચોરસ મીટર જમીનમાંથી 918 ચોરસ મીટર વિસ્તારમાં ગેરકાયદે કબજો જમાવ્યો હતો. તંત્ર દ્વારા આ સમગ્ર જમીનને દબાણમુક્ત કરાવી સરકારી કબજામાં લેવામાં આવી છે.
કરોડોની સરકારી જમીન ગુનેગારોના કબજામાંથી મુક્ત
અધિકારીઓના જણાવ્યા મુજબ આજે તોડી પાડવામાં આવેલા ગેરકાયદે બાંધકામોની બજાર કિંમત આશરે ₹1.25 કરોડ જેટલી હતી. જ્યારે દબાણમુક્ત કરાવવામાં આવેલી કુલ 12,950 ચોરસ મીટર સરકારી જમીનની જંત્રી કિંમત અંદાજે ₹1.17 કરોડ થાય છે.
જોકે, હાલના બજાર દર મુજબ આ જમીનની કિંમત ₹16 કરોડથી ₹16.50 કરોડ જેટલી હોવાનું અનુમાન છે. આ કાર્યવાહીથી કરોડો રૂપિયાની સરકારી સંપત્તિ ગુનેગારોના ચુંગાલમાંથી મુક્ત થઈ હોવાનું તંત્રએ જણાવ્યું છે.
કાર્યવાહી દરમિયાન વિરોધ, પોલીસનો ચુસ્ત બંદોબસ્ત
ડિમોલિશનની કામગીરી શરૂ થતાં જ સ્થાનિક રહીશો અને સાયચા ગેંગ સાથે સંકળાયેલા તત્વોએ વિરોધ નોંધાવ્યો હતો. કેટલાક સ્થળોએ અધિકારીઓ સાથે બોલાચાલી અને ઘર્ષણની સ્થિતિ પણ સર્જાઈ હતી.
જોકે, DySP સહિતના ઉચ્ચ પોલીસ અધિકારીઓ અને મોટી સંખ્યામાં પોલીસ જવાનો સ્થળ પર તહેનાત હોવાથી કોઈ અનિચ્છનીય ઘટના બની નહોતી. કાયદો અને વ્યવસ્થા જાળવી રાખીને સમગ્ર કાર્યવાહી સફળતાપૂર્વક પૂર્ણ કરવામાં આવી હતી.
અગાઉ નોટિસ આપી હતી, છતાં દબાણ દૂર ન થતાં કાર્યવાહી
પ્રશાસનના સૂત્રોના જણાવ્યા મુજબ ગેરકાયદે દબાણ કરનારાઓને અગાઉથી કાયદેસરની નોટિસ પાઠવવામાં આવી હતી. સાથે જ દબાણ સ્વૈચ્છિક રીતે દૂર કરવા માટે નિયત સમયમર્યાદા પણ આપવામાં આવી હતી. તેમ છતાં દબાણ દૂર કરવામાં ન આવતા અંતે બુલડોઝર કાર્યવાહી હાથ ધરવામાં આવી હતી.
અત્યાર સુધી ₹17 કરોડની સંપત્તિ પર તંત્રનો પ્રહાર
જામનગર જિલ્લા પોલીસ વડાએ જણાવ્યું હતું કે ભૂતકાળમાં કરવામાં આવેલી કાર્યવાહી સહિત આજદિન સુધીમાં સાયચા ગેંગ સાથે સંકળાયેલી અંદાજે ₹17 કરોડથી વધુ મૂલ્યની મિલકતો પર બુલડોઝર ફેરવવામાં આવ્યું છે.
તંત્રના આકરા વલણ બાદ સ્થાનિક ભૂમાફિયાઓમાં ફફડાટ વ્યાપી ગયો છે. અધિકારીઓએ સ્પષ્ટ કર્યું છે કે આગામી દિવસોમાં પણ સરકારી જમીનો પર ગેરકાયદે કબજો જમાવનારા તત્વો સામે આવી જ કડક કાર્યવાહી ચાલુ રહેશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
