રાજ્ય સરકાર દ્વારા ગ્રામ વિકાસ ક્ષેત્રને વધુ મજબૂત બનાવવા માટે વર્ષ 2026-27ના બજેટમાં નોંધપાત્ર વધારો કરવામાં આવ્યો છે. ગ્રામ વિકાસ મંત્રી કુંવરજીભાઇ બાવળીયાએ પત્રકાર પરિષદમાં જણાવ્યું હતું કે ગત વર્ષે લગભગ ₹4,700 કરોડના બજેટની તુલનામાં આ વખતે ₹779 કરોડનો વધારો કરવામાં આવ્યો છે. આ વધારો દર્શાવે છે કે સરકાર ગ્રામિણ વિસ્તારોમાં માળખાકીય સુવિધાઓ, સ્વચ્છતા અને આજીવિકાના સાધનોને વધુ મજબૂત બનાવવા માટે પ્રતિબદ્ધ છે. પત્રકાર પરિષદમાં રાજ્ય મંત્રી સંજયસિંહ મહિડા, ગ્રામ વિકાસ સચિવ ધનંજય દ્વિવેદી, શ્રમ-રોજગાર અને કૌશલ્ય વિકાસ સચિવ લોચન સેહરા તથા રોજગાર અને તાલીમ નિયામક નીતિન સાંગવાન સહિતના વરિષ્ઠ અધિકારીઓ હાજર રહ્યા હતા.
આવાસ અને લાભાર્થી સહાય માટે મોટી જોગવાઈ
ગ્રામ વિકાસ વિભાગ હેઠળ વિવિધ યોજનાઓ માટે કુલ ₹1,755 કરોડની જોગવાઈ કરવામાં આવી છે. રૂફ કાસ્ટ લેવલ સુધી પહોંચેલા આશરે 18,000 લાભાર્થીઓને વધારાની ₹50,000 સહાય આપવા માટે ₹90 કરોડ ફાળવવામાં આવ્યા છે. આ યોજના હેઠળ આદિજાતિ લાભાર્થીઓને ₹2,72,820 અને બિન-આદિજાતિ લાભાર્થીઓને ₹2,32,920 સુધીની સહાય આપવામાં આવશે.
સ્વચ્છતા અને ગંદા પાણીના સંચાલન પર ભાર
ગ્રામિણ સ્વચ્છતા માટે કેન્દ્ર સરકારની યોજના Swachh Bharat Mission (Gramin) હેઠળ વર્ષ 2026-27 માટે ₹737.91 કરોડની જોગવાઈ કરવામાં આવી છે. ઉપરાંત ગામડાઓમાં ગંદા પાણીના યોગ્ય સંચાલન માટે પ્રવાહી કચરા વ્યવસ્થાપન પ્રણાલી અંતર્ગત ₹50 કરોડની નવી જોગવાઈ કરવામાં આવી છે. આ ઉપરાંત રાજ્યના 400 ગામોમાં End Drain Treatment પ્રોજેક્ટ શરૂ કરવામાં આવશે, જેના કારણે ગામડાઓમાં સ્વચ્છતા અને પર્યાવરણ બંનેમાં સુધારો થવાની શક્યતા છે.
રોજગાર માટે મનરેગા હેઠળ નવી જોગવાઈ
ગ્રામિણ રોજગાર વધારવા માટે Mahatma Gandhi National Rural Employment Guarantee Act (MGNREGA) અંતર્ગત VB-GRAM-G યોજના માટે ₹1,500 કરોડ ફાળવવામાં આવ્યા છે. મહત્વની વાત એ છે કે હવે મનરેગા હેઠળ મળતી 100 દિવસની રોજગારીને વધારીને 125 દિવસ કરવાની જાહેરાત કરવામાં આવી છે. જો નિર્ધારિત સમયમર્યાદામાં કામ ન મળે તો લાભાર્થીઓને બેરોજગારી ભથ્થું ચૂકવવાની જોગવાઈ પણ કરવામાં આવી છે.
મહિલા સશક્તિકરણ માટે ખાસ યોજનાઓ
મહિલાઓના આર્થિક સશક્તિકરણ માટે Lakhpati Didi Yojana હેઠળ વર્ષ 2026-27 માટે ₹48 કરોડ ફાળવવામાં આવ્યા છે. દર વર્ષે લગભગ 10,000 અનુભવી ‘લખપતિ દીદી’ને તેમના વ્યવસાયના સ્કેલિંગ-અપ, જેમ કે ઉત્પાદન, પેકેજિંગ અને મૂલ્યવર્ધન માટે સહાય આપવામાં આવશે.
આ ઉપરાંત સ્વ-સહાય જૂથોની મહિલાઓને કાયમી બજાર ઉપલબ્ધ થાય તે માટે ‘ગ્રામ હાટ’ સ્થાપવાની યોજના શરૂ કરવામાં આવશે, જેના માટે ₹20 કરોડની જોગવાઈ કરવામાં આવી છે. આ હાટ મહાનગરપાલિકા, નગરપાલિકા અને પ્રવાસન સ્થળોની સરકારી જમીન પર વિકસાવવામાં આવશે. સાથે સાથે સખી મંડળોની ઉત્પાદનોને બજારમાં પહોંચાડવા અને ઈ-કોમર્સ પ્લેટફોર્મ પર ઓનલાઈન વેચાણ માટે ₹25 કરોડનું માર્કેટિંગ સપોર્ટ પણ આપવામાં આવશે.
સરકારના જણાવ્યા અનુસાર આ તમામ યોજનાઓનો મુખ્ય ઉદ્દેશ ગ્રામિણ અર્થતંત્રને મજબૂત બનાવવો, રોજગાર વધારવો અને મહિલાઓને આર્થિક રીતે આત્મનિર્ભર બનાવવો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
