વડા પ્રધાન નરેન્દ્ર મોદીએ દેશવ્યાપી ‘નશા મુક્ત ભારત અભિયાન’ હેઠળ દેશવાસીઓને સંબોધતા યુવાનોને નશાથી દૂર રહેવાની અપીલ કરી હતી. તેમણે કહ્યું કે નશામુક્ત સમાજનું નિર્માણ માત્ર વ્યક્તિગત કે પારિવારિક જવાબદારી નથી, પરંતુ વિકસિત ભારતના નિર્માણ માટે રાષ્ટ્રીય આવશ્યકતા છે. જો ભારતને વર્ષ 2047 સુધી વિકસિત રાષ્ટ્ર બનાવવું હોય તો દેશના યુવાનોનું શારીરિક અને માનસિક રીતે સ્વસ્થ રહેવું અનિવાર્ય છે.
દેશભરના 28 હજારથી વધુ સ્થળોથી 1 કરોડથી વધુ લોકો જોડાયા
વડા પ્રધાને જણાવ્યું કે ‘નશા મુક્ત ભારત અભિયાન’ સાથે દેશભરના 28 હજારથી વધુ સ્થળો પરથી 1 કરોડથી વધુ લોકો જોડાયા છે. આ અભિયાનમાં વિવિધ રાજ્ય, જિલ્લા, ગામો, શહેરો, શૈક્ષણિક સંસ્થાઓ, સામાજિક સંગઠનો અને આધ્યાત્મિક સંસ્થાઓએ સક્રિય ભાગ લીધો છે.
તેમણે જણાવ્યું કે આ અભિયાન માત્ર સરકારનો કાર્યક્રમ નથી, પરંતુ સમગ્ર સમાજનું જનઆંદોલન છે. યુવાનોને ડ્રગ્સ, માદક પદાર્થો અને અન્ય નશીલા વ્યસનોથી દૂર રાખવા માટે દરેક નાગરિકે પોતાની જવાબદારી નિભાવવી જરૂરી છે.
કાશીથી શરૂ થયેલી પહેલ હવે દેશવ્યાપી બની
પોતાના સંસદીય ક્ષેત્ર કાશીનો ઉલ્લેખ કરતાં વડા પ્રધાને જણાવ્યું કે ગયા વર્ષે આ અભિયાનની શરૂઆત પાયલોટ પ્રોજેક્ટ તરીકે કાશીમાંથી કરવામાં આવી હતી.
તેમણે કહ્યું કે કાશીમાં મળેલા સકારાત્મક પ્રતિસાદ બાદ હવે આ પહેલને સમગ્ર દેશમાં વિસ્તૃત કરવામાં આવી છે. આજે દેશભરના 125થી વધુ આધ્યાત્મિક સંગઠનો તેમજ અનેક સામાજિક સંસ્થાઓ આ અભિયાન સાથે જોડાઈ છે. સામૂહિક પ્રયાસોથી સમાજમાં મોટો પરિવર્તન લાવી શકાય છે.
આગામી 100 સપ્તાહ સુધી સતત ચાલશે અભિયાન
વડા પ્રધાને જણાવ્યું કે આજથી શરૂ થયેલું આ અભિયાન આગામી 100 સપ્તાહ સુધી સતત ચાલુ રહેશે. આગામી 100 રવિવાર સુધી દેશભરમાં નશા વિરોધી જાગૃતિ કાર્યક્રમો, સંકલ્પ અભિયાન અને સામાજિક જનજાગૃતિની પ્રવૃત્તિઓ યોજવામાં આવશે.
તેમણે કહ્યું કે આજની યુવા પેઢી જ વર્ષ 2047ના વિકસિત ભારતને પોતાના જીવનમાં સાકાર થતાં જોશે. તેથી યુવાનોને વ્યસનથી દૂર રાખવું અને સકારાત્મક દિશામાં આગળ વધારવું દેશની સૌથી મોટી પ્રાથમિકતા છે.
નશો માત્ર વ્યક્તિ નહીં, સમગ્ર સમાજને નુકસાન પહોંચાડે છે
વડા પ્રધાને નશાના દુષ્પરિણામો અંગે ચેતવણી આપતાં જણાવ્યું કે નશો વ્યક્તિને પરિવારથી, સમાજથી અને પોતાના લક્ષ્યથી દૂર લઈ જાય છે. એક યુવાન વ્યસનનો ભોગ બને ત્યારે માત્ર તેનું જ નહીં, પરંતુ આખા પરિવારનું ભવિષ્ય જોખમમાં મુકાય છે.
તેમણે કહ્યું કે માતા-પિતાના સપના તૂટી જાય છે, પરિવાર આર્થિક અને માનસિક મુશ્કેલીઓમાં સપડાય છે અને સમાજની ઉત્પાદક શક્તિ પણ ઘટે છે. આ કારણે દેશના વિકાસ પર પણ સીધી અસર પડે છે.
ડ્રગ્સના વેપાર પાછળ દુશ્મન દેશોની સાજિશનો ઉલ્લેખ
વડા પ્રધાને કહ્યું કે ડ્રગ્સનો ગેરકાયદે વેપાર માત્ર કાયદો અને વ્યવસ્થાનો મુદ્દો નથી, પરંતુ રાષ્ટ્રીય સુરક્ષાનો પણ મહત્વનો વિષય છે.
તેમણે જણાવ્યું કે દુશ્મન દેશો ડ્રગ્સના વેપાર દ્વારા નાણાં એકત્રિત કરે છે અને સમાજને અંદરથી નબળો બનાવવાનો પ્રયાસ કરે છે. તેથી ડ્રગ્સ વિરુદ્ધની લડાઈ માત્ર પોલીસ અથવા સરકારની નહીં, પરંતુ સમગ્ર દેશની જવાબદારી છે.
સમાજને જાગૃત થવાની અપીલ
વડા પ્રધાને સમાજને અપીલ કરતાં કહ્યું કે જો કોઈ વ્યક્તિ વ્યસનની લતનો શિકાર બને તો તેને છુપાવવાને બદલે યોગ્ય સારવાર અને માર્ગદર્શન મળે તે માટે આગળ આવવું જોઈએ. તેમણે સંતો, મહંતો, ધાર્મિક આગેવાનો અને સામાજિક સંસ્થાઓને પણ નશા વિરોધી જાગૃતિ અભિયાનમાં સક્રિય ભૂમિકા ભજવવા અનુરોધ કર્યો.
કોલેજો અને શૈક્ષણિક સંસ્થાઓને ખાસ જવાબદારી
વડા પ્રધાને દેશની તમામ કોલેજો, યુનિવર્સિટીઓ અને શૈક્ષણિક સંસ્થાઓને ડ્રગ્સ વિરોધી અભિયાન ચલાવવાની અપીલ કરી હતી.
તેમણે ખાસ કરીને પ્રોફેસરો અને શિક્ષકોને વિદ્યાર્થીઓમાં જાગૃતિ લાવવા, નશાના નુકસાન અંગે માર્ગદર્શન આપવા અને કેમ્પસને ડ્રગ્સમુક્ત બનાવવા માટે સતત પ્રયાસ કરવાની અપીલ કરી.
ડ્રગ્સ વિરુદ્ધ સરકારની કડક કાર્યવાહી
વડા પ્રધાને જણાવ્યું કે કેન્દ્ર સરકાર ડ્રગ્સ વિરુદ્ધ ઝીરો ટોલરન્સની નીતિ અપનાવી રહી છે. દેશભરમાં કાયદા અમલવારી એજન્સીઓ દ્વારા સતત કાર્યવાહી કરીને કરોડો રૂપિયાના નશીલા પદાર્થો જપ્ત કરવામાં આવી રહ્યા છે.
તેમણે ભારપૂર્વક જણાવ્યું કે સરકાર માત્ર કાર્યવાહી જ નહીં, પરંતુ જાગૃતિ, પુનર્વસન અને યુવાનોને વ્યસનથી દૂર રાખવા માટે પણ સતત પ્રયત્નશીલ છે.
‘નશા મુક્ત ભારત’ને જનઆંદોલન બનાવવાનો સંકલ્પ
વડા પ્રધાને દેશવાસીઓને આગામી 100 સપ્તાહ સુધી નશા વિરોધી સંદેશ દરેક ગામ, શહેર, શાળા, કોલેજ અને સમાજના દરેક વર્ગ સુધી પહોંચાડવાનો સંકલ્પ લેવા અપીલ કરી.
તેમણે કહ્યું કે જ્યારે આખો સમાજ એકસાથે કોઈ સારા કાર્ય માટે ઉભો રહે છે ત્યારે પરિવર્તન નિશ્ચિત બને છે. ‘નશા મુક્ત ભારત’ માત્ર સરકારની યોજના નહીં પરંતુ વિકસિત ભારતના ભવિષ્યનો મજબૂત પાયો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
