ગુજરાતના રાજ્યપાલ આચાર્ય દેવવ્રતજી મહેસાણા જિલ્લાના વિસનગર તાલુકાના સદુથલા ગામની મુલાકાતે પહોંચ્યા હતા. આ દરમિયાન તેમણે ઉમેદપૂરી વાડી ખાતે આયોજિત વિશેષ રાત્રિ સભામાં ગ્રામજનો સાથે આત્મીય લોકસંવાદ સાધ્યો હતો. ગ્રામ્ય જીવન, ખેતી, યુવાનોના ઘડતર અને સામાજિક જવાબદારી જેવા અનેક વિષયો પર તેમણે ગ્રામજનો સાથે વિસ્તૃત ચર્ચા કરી હતી.
રાજ્યપાલ આચાર્ય દેવવ્રતજીએ પોતાની સાદગીનું ઉદાહરણ પૂરું પાડતાં સદુથલા પ્રાથમિક શાળાના સામાન્ય ઓરડામાં જ રાત્રિ મુકામ કર્યો હતો. રાજ્યના પ્રથમ નાગરિક દ્વારા ગામની શાળામાં સામાન્ય રીતે રોકાણ કરવાના આ નિર્ણયની સ્થાનિક સ્તરે ખાસ નોંધ લેવાઈ હતી.
પ્રાકૃતિક ખેતી તરફ વળવા ખેડૂતોને રાજ્યપાલની અપીલ
રાત્રિ સભાને સંબોધતા રાજ્યપાલ આચાર્ય દેવવ્રતજીએ કૃષિ ક્ષેત્રમાં પ્રાકૃતિક ખેતીનું મહત્વ સમજાવ્યું હતું. તેમણે જણાવ્યું કે આજની પેઢી અને આવનારા ભવિષ્યને સુરક્ષિત રાખવા માટે રાસાયણિક ખેતી પરની નિર્ભરતા ઘટાડીને પ્રાકૃતિક ખેતી તરફ આગળ વધવું જરૂરી છે.
રાજ્યપાલે જણાવ્યું કે ધરતી માતાને રાસાયણિક તત્ત્વો અને ઝેરી અસરોમાંથી મુક્ત રાખવી એ દરેક ખેડૂત તથા નાગરિકની જવાબદારી છે. જો ગામડાંઓમાં મોટા પાયે પ્રાકૃતિક ખેતી અપનાવવામાં આવશે તો ખેડૂતોની જમીન, માનવ આરોગ્ય અને પર્યાવરણ ત્રણેયને લાંબા ગાળે લાભ મળી શકે છે.
તેમણે રાસાયણિક ખેતી, જૈવિક ખેતી અને પ્રાકૃતિક ખેતી વચ્ચેના તફાવતો વિશે પણ સરળ ભાષામાં સમજ આપી હતી. ખેડૂતોને ખર્ચ ઘટાડવા, જમીનની ફળદ્રુપતા જાળવવા અને સ્વસ્થ ખાદ્ય ઉત્પાદન માટે પ્રાકૃતિક ખેતી તરફ આગળ વધવા અનુરોધ કર્યો હતો.
मेहसाणा जिले के प्रवास के दौरान विसनगर तहसील के सदूथला गांव स्थित उमेदपुरी वाड़ी में आयोजित रात्रि सभा में ग्रामवासियों के साथ आत्मीय चर्चा करने का अवसर मिला।
आज की पीढ़ी और आने वाले भविष्य को सुरक्षित रखने के लिए रसायनमुक्त प्राकृतिक खेती अपनाना नितांत आवश्यक है। धरती माता को… pic.twitter.com/jfGhrazYSD
— Acharya Devvrat (@ADevvrat) August 7, 2026
“સંતાનો સંસ્કારી હશે તો સમાજ અને રાષ્ટ્ર મજબૂત બનશે”
રાજ્યપાલ આચાર્ય દેવવ્રતજીએ નવી પેઢીના ઘડતર અને સંસ્કારો અંગે પણ મહત્વપૂર્ણ સંદેશ આપ્યો હતો. તેમણે જણાવ્યું કે શિક્ષણની સાથે સંસ્કાર અને વ્યસનમુક્ત જીવન પણ એટલું જ મહત્વપૂર્ણ છે.
તેમણે કહ્યું કે જો સંતાનો શિક્ષિત, સંસ્કારી અને વ્યસનમુક્ત હશે તો પરિવાર, સમાજ અને દેશની સંપત્તિ વધુ સુરક્ષિત રહેશે. માત્ર સંતાનો માટે સંપત્તિ ભેગી કરવાને બદલે તેમને શિક્ષણ, મૂલ્યો અને સારા સંસ્કારો આપવાનું વધુ મહત્વપૂર્ણ છે.
રાજ્યપાલે યુવાનોને માતા-પિતા અને વડીલોની આજ્ઞાનું પાલન કરવા, જીવનમાં શિસ્ત જાળવવા અને ભારતીય વેદિક પરંપરામાં દર્શાવાયેલા સંસ્કારોને અનુસરવાની અપીલ કરી હતી.
પ્રાકૃતિક કૃષિ માટે ગુજરાતમાં વિશેષ અભિયાન: ઋષિકેશ પટેલ
કાર્યક્રમમાં ઉપસ્થિત રાજ્યના ઊર્જા મંત્રી ઋષિકેશ પટેલે જણાવ્યું હતું કે રાજ્યપાલ આચાર્ય દેવવ્રતજીએ ગુજરાતમાં ખેડૂતોને પ્રાકૃતિક ખેતી તરફ વાળવા માટે સતત વિશેષ અભિયાન ચલાવ્યું છે.
તેમણે જણાવ્યું કે રાજ્યના વિવિધ વિસ્તારોમાં મોટી સંખ્યામાં ખેડૂતો હવે રાસાયણિક ખેતી ઘટાડીને પ્રાકૃતિક કૃષિ તરફ આગળ વધી રહ્યા છે. ખેડૂતોમાં પ્રાકૃતિક ખેતી અંગે જાગૃતિ વધારવામાં રાજ્યપાલ દ્વારા કરવામાં આવી રહેલા પ્રયાસોને સારો પ્રતિસાદ મળી રહ્યો છે.
ઋષિકેશ પટેલે સદુથલા ગામે આવી ખેડૂતો અને ગ્રામજનોને સીધું માર્ગદર્શન આપવા બદલ રાજ્યપાલનો ગ્રામજનો વતી આભાર વ્યક્ત કર્યો હતો.
ગ્રામજનો સાથે સીધો લોકસંવાદ
રાત્રિ સભામાં ગ્રામજનો સાથે રાજ્યપાલે ગ્રામ વિકાસ, કૃષિ, આરોગ્ય, શિક્ષણ, યુવાઓમાં વધતા વ્યસન અને સમાજમાં સંસ્કારોનું મહત્વ જેવા મુદ્દાઓ પર ચર્ચા કરી હતી.
ગ્રામજનોને સંબોધતાં તેમણે જણાવ્યું કે ગામડાં સશક્ત, સ્વસ્થ અને સ્વાવલંબી બનશે ત્યારે જ રાજ્ય અને દેશનો સર્વાંગી વિકાસ શક્ય બનશે. ખેતી અને શિક્ષણ જેવા મૂળભૂત ક્ષેત્રોમાં સામૂહિક પ્રયાસ કરવાની પણ તેમણે અપીલ કરી હતી.
અધિકારીઓ અને ગ્રામજનોની મોટી ઉપસ્થિતિ
સદુથલા ખાતે યોજાયેલી રાત્રિ સભામાં ઇન્ચાર્જ જિલ્લા કલેક્ટર શાલિની દુહાન, જિલ્લા પોલીસ અધિક્ષક હિમાંશુ સોલંકી, નિવાસી અધિક કલેક્ટર મયંક પટેલ, ગામના સરપંચ સહિતના અધિકારીઓ, સ્થાનિક આગેવાનો અને મોટી સંખ્યામાં ગ્રામજનો ઉપસ્થિત રહ્યા હતા.
રાજ્યપાલના આ પ્રવાસ દરમિયાન પ્રાકૃતિક ખેતી, ગ્રામ વિકાસ અને સંસ્કારી નવી પેઢીના નિર્માણનો સંદેશ કેન્દ્રસ્થાને રહ્યો હતો.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
